Read Hmar RORELTUHAI 8 Bible Online

RORELTUHAI 8 - Hmar bible

RORELTUHAI 8

¹Chun, Ephraim mihai chun a kuomah, “Iengtiziea hienga i mi thaw a, Midianhai do dinga i fe laiin i mi ko ve naw am a ni a?” an ti a. An hal nasa hle el a.

²Ama chun an kuomah, “Nangni nêkin tuhin ieng am ka thaw bîk leh? Abiezer mihai grêp lo nêk chun Ephraim mihai grêp hmu ṭhel zawng hi a nasa lem ni lo am a nih?

³Pathien chun Midian lalhai, Oreb le Zeeb chu in kutah a hung pêk ta cheu a, nangni nêkin kei hin ieng am ka thaw thei chuong leh?” a ti a. Chuongchun, chu thu a hang hril chun a chunga an lunginsen chu a re ta a.

⁴Chun, Gideon le a kuoma mi za thum umhai chun Jordan vadung chu an zu tlung a, an kai a, châu sa sain an hnawt pei a.

⁵Chun, Sukkoth khuoa mihai kuoma chun, “Hieng ka hnungzuihai hi, ka hni cheu hi, beiphêkhai pe ta u khai, an châu ta êm el a, Midianhai lal Zeba le Zalmunna ka hnawt a nih,” a ti a.

⁶Sukkoth khuoa mi lienhai chun, “Zeba le Zalmunna chu i kuta umsa ang hrieua chuonga i sipaihai bei kan hang pêk el ding chu?” an ti a.

⁷Gideon chun, “Aw le, LALPAIN Zeba le Zalmunna chu ka kuta a mi pêk pha chun in taksa chu thlalêra hling le hlohlingneihai chun sun thlêr dei duoi ngei ka ti maw le,” a ti a.

⁸Chutaka inthawk chun Penuelah a hang fe a, an kuomah chuong ang bawk chun a hril nâwk a, chun Penuel khuoa mihai chun Sukkoth khuoa mihai dawn dân bawkin an lo dawn ve a.

⁹Chun, Penuel khuoa mihai kuoma chun, “Inremna thu phura ka hung kîr nâwk pha chun, hi kul hi chu hung sukchim ngei ka tih,” tiin a hril bawk a.

¹⁰Tuhin Zeba le Zalmunna chu an sipaihai, khawsak nauhai sipaihai thi mahlahai po po, sîng khat le sâng nga lai leh Karkorah an um a, kâwlhnâm chawi mi ṭhieu nuoi khat le sîng hni an thi si a.

¹¹Chun, Gideon chu Noba le Jogbeha saktienga puon ina[14] umhai lampuia chun a hang fe a, sipaihai chu a hang thaw a, sipaihai chu lungmuongtakin[15] an lo um si a.

¹²Chun, Zeba le Zalmunna chu an tlânse ta a; chuongchun, a hnawt a, Midian lal pahni Zeba le Zalmunna chu a man a, sipaihai po po chu a chawkbuoi[16] ta a.

¹³Chun, Joas naupa Gideon chu indonaa inthawkin Heres lam tunga chun a hung kîr nâwk ta a.

¹⁴Chun, Sukkoth khuoa tlangvâl pakhat a man a, thu ân dawn a; ama chun Sukkoth khuoa mi lienhai le upahai hming chu a ziekpêk vawng a, sâwmsari pasari an nih.

¹⁵Chun, Sukkoth khuoa mihai kuoma chun a hang fe a, “Zeba le Zalmunna hi en ta u, hienghai hi annâwm, ‘Zeba le Zalmunna chu i kuta umsa ang hrieua, chuonga i mi châuhai bei kan hang pêk el ding chu,’ tia in mi tielnahai kha,” a ti a.

¹⁶Chuongchun, chu khuoa upahai chu a man a, thlalêr hling le hlohlingneihai chun Sukkoth mihai chu ân chûktir a.

¹⁷Chun, Penuel khaw kul chu a sukchim a, khuoa mihai khawm chu a that a.

¹⁸Chun, Zeba le Zalmunna kuoma chun, “Tabor tlânga in mi thathai kha mi ieng ang am an ni a?” a ti a. Anni chun, “Nanga ang ang hi an nih, lal nau hawina an nei seng el,” an ti a.

¹⁹Ama chun, “Ka unau, ka nu naupahai ngei an nih in sawnnaw, LALPA chu a hring zing ang hin, anni chu lo hla ta chu ni unla ka that naw ding cheu bah,” a ti a.

²⁰Chun, a naupa upa tak Jether kuoma chun, “Khai le nangin that rawh,” a ti a. Nisienlakhawm, tlangvâl chun a kâwlhnâm chu a phawi naw a, tleirâwl chau a la ni leiin a ṭi a nih.

²¹Chun, Zeba le Zalmunna chun, “Nang kha hung inthawk la mi hung thaw ta la, patling le patling inthaw ding a nih annâwm,” an ti a. Chun, Gideon chu a tho a, Zeba le Zalmunna chu a that ta a; chun, an sanghâwngseihai rînga rîngawrhai chu a lâk a.

²²Chuongchun, Israel mihai chun Gideon kuomah, “Nangin kan chungah ro rêl ta raw khai, nang le i naupasalhai le i naupasalhai nauhai chen khawmin; nangin Midianhai kuta inthawk hin i mi sansuok ta si a,” an ti a.

²³Gideon chun an kuomah, “Kei chun chu in chunga hin ro rêl naw ning ah, ka naupa hlakin in chungah ro rêl naw bawk a tih; LALPAIN in chungah ro rêl lem a tih,” a ti a.

²⁴Gideon ma chun an kuomah, “Thil pakhat ruok chu hni cheu ka nuom a, mi tinin in râllâk nabe kha mi pe seng ta unla,” a ti a (Ismael mihai an ni leiin rângkachak nabe an nei a nih).

²⁵Anni chun, “Pe mawl kan ti che,” an ti a. Chuongchun, puon an pha a, mi tinin an râllâk nabe chu an the suok ta seng a.

²⁶Chun, chuong rângkachak nabe a hni khâwm chu a rikzie chu rângkachak shekel sâng khat le za sari a nih, rîngawrhai, nabehai, Midian lalhai puon senduk tiemsa lovin an sanghâwngseihai khaidiet hli khawm ṭhang lovin.

²⁷Chun, Gideonin chuonghai chun thiempu zakawsîng a siem a, a umna Ophra khuoa chun a sie a; chutaka chun chu chu bein Israelhai po po chu an lo uire zo ta a, Gideon le a sûnghai ta ding khawma châng a lo ni ta a.

²⁸Chuongchun, Midianhai chu Israel thlahai hmaa chun suktlâwmin an lo um ta a, an châng thei ta naw a. Gideon dam sûng chu ram chu kum sâwmli râlmuongin a um a.

²⁹Chun, Joas naupa Jerubbaal chu a fe a, ama inah a um ta a.

³⁰Gideon chun ama nei ṭhieu naupasal sâwmsari a nei a, nuhmei tamtak nei a ni leiin.

³¹Sekema a thâikêmin naupasal a neipêk bawk a, a hmingah Abimelek a sak a.

³²Joas naupa Gideon chu tar kûna damin a thi a, Abiezrithai ta Ophra a pa Joas thlâna chun an phûm ta a.

³³Chun, Gideon a thi phing chun Israel mipui chu an hnungtawl nâwk nghâl ta a. Baalhai kuoma chun, an hung uire ta a, Baal-berith chu an pathienah an hung siem a.

³⁴Chun, Israel mipui chun an vêla hmêlmahai po poa inthawka sansuoktu LALPA an Pathien chu an hriet ta naw a;

³⁵Jerubbaal (Gideon) chu Israelhai chunga theitâwpa ṭhat insuo hlaktu sûnghai chunga khawm chun ṭhat an inchu ve ta nâw bawk a.