Read Hmar 3 JOHAN 1 Bible Online

3 JOHAN 1 - Hmar bible

3 JOHAN 1

¹Upa chun: Dittak Gaia, titakzeta ka ihmangai kuoma chun,

²Dittak, i thlarau chun malsâwmna a hmu angin, iengkima malsâwmna i hmu le i dam theina dingin ka ṭawngṭai hlak a nih.

³Unauhai hungin, i takzie, (thutaka i um hlakzie) an mi hung inhriettir lai khan, ka lâwm bêk bêk si a.

⁴Ka nauhai thutakah an um ti ka hriet nêka lâwmna nasa lem hrim ka nei nawh.

⁵Dittak, unauhai hi mikhuol el ni hai sienkhawm, an chunga i thaw taphawtah ringumtakin i thaw hlak a;

⁶chuongchun, anni chun kohranhai hmaah i hmangaina an inhriettir ta a; an inzinnaah Pathien mi thaw âwm hrima i ṭhangpui chun ṭhâng a tih;

⁷Jentailhai kuoma inthawkin iengkhawm la lovin a Hming lei chun an inthawk suok si a.

⁸Chuongchun, thutak thawpuituhai ei ni theina dingin chuong ang mi chu eini chun ei lâwm ding a nih.

⁹Kohranhai kuoma khan thu tlâwmtê chu ka ziek tah; nisienlakhawm, Diotrepha, anni laia chunghnung nuom hlak khan, a mi lâwm si nawh.

¹⁰Chuleiin, ka hung chun chu a thilthawhai inhriet suoktir nâwk ka tih, kan chungthu suol hrilin a bautamzie hi; chu khawm chu hun a ti naw a, ama ngeiin unauhai a lâwm naw a, a lâwm nuomhai khawm a khap a, kohrana inthawkin a hnawt dawk hlak.

¹¹Dittak, suol chu inchûk naw la, ṭhat chu inchûk lem rawh. Thil ṭha thawtu chu Pathiena inthawk a na, thil suol thawtu chun Pathien a hmu ngai nawh.

¹²Demetri chun mi po po inpâk a hlaw a, thutaka inpâk ngei a hlaw bawk a; anih, keini khawmin kan inpâk a nih; kan inpâkna hi ân dik a nih ti i hriet.

¹³I kuomah thu tamtak ziek ding ka nei a, nisienlakhawm, lekhatui le lekhazieknain i kuoma ziek ka nuom naw a;

¹⁴sâwtnawtê hnunga hmu che ka beisei lem a, chuongchun, inhmatuoin inbieng ei tih.

¹⁵Thlamuongna i chungah um raw se. Ei ruolhaiin chibai an bûk che. An hming lam sengin ruolhai chu chibai mi bûk pêk rawh.