Read Hmar THUPUONGSUO 10 Bible Online

THUPUONGSUO 10 - Hmar bible

THUPUONGSUO 10

¹Chun, vântirko hrâttak dang pakhat, sûma inthuom, vâna inthawka hung ṭum ka hmu a; a lua chun sumrisâng ân zâm a, a hmai chu nisa ang a na, a kehai chu mei ban ang a nih.

²A kuta chun lekhabu chîtê phawk sa a chawi a, a ke changtiengin tuisuoriet a sir a, a vawitiengin khawmuol a sir a;

³sakeibaknei inhûk angin rawl inringtakin a khêk ta a. A khêk zo chun vâninrûm pasarihai chun an rawl an insuo ta a.

⁴Chun, vâninrûm pasarihai chun an rawl an insuo phingleh ziek ka tum a; chuongchun, “Vâninrûm pasarihai thu hril chu ip tlat la ziek naw,” tiin vâna inthawkin rawl ka hriet a.

⁵Chun, vântirko tuipui le khawmuola ngîr ka ihmu chun a kut chang tieng vân tieng a phar a,

⁶chatuona hring zing, vân, a chunga thil umhai le hnuoi, a chunga thil umhai le, tuipui, a sûnga thil umhai le siemtu chu sâlin, “Hun um ta naw ni.

⁷nisienlakhawm, vântirko pasarina rawl ri a um phaleh, a mût ding ṭêpin, Pathien thurûk chu kim tâng a tih, a suok zâwlneihai kuoma a chanchin ṭha hril ang khan,” a ti a.

⁸Chun, vâna inthawka rawl ka ihriet khan a mi biek nâwk a, “tuipui le khawmuola ngîr vântirko kuta lekhabu phar sa saw va la rawh,” a ti ka hriet a.

⁹Chun, vântirko kuoma chun ka va fe a, a kuomah, “Lekhabu chîtê kha mi pe rawh,” ka ti a. Ama chun ka kuomah, “La la, fa zo vawng rawh, chuongchun, i phîng chu sukkhâng a ta, i baua ruok chun khuoizu angin thlum a tih,” a ta.

¹⁰Chun, vântirko kuta inthawkin lekhabu chîtê chu ka lâk a, ka fâk zo vawng a; chuongchun, ka baua chun khuoizu angin a thlum a; nisienlakhawm, ka fâk zo phingleh, ka phîng chu a kha zo ta a.

¹¹Chun, ka kuomah, “Mi tamtak dâm, hnam tamtak dâm, ṭawng tamtak dâm, lal tamtak dâm chungchâng thu hril nâwk i tih,” an ti a.