Read Hmar THUPUONGSUO 11 Bible Online

THUPUONGSUO 11 - Hmar bible

THUPUONGSUO 11

¹Chun, luong, hmawl ang hi pêkin ka um a, chuongchun, tûin amanih, “Tho la, Pathien biekin le maichâm chu inkhi la, a sûnga betuhai khawm tiem rawh.

²Biekin puotienga inhuonna sûng tuollai ruok chu inkhi sa naw, chu chu Jentailhai kuoma pêk a ni ta si a; anni chun khaw Inthieng chu thla sawmli pahni sir dêng an tih.

³Chun, ka thu hretu pahnihai kuoma chun thu pêng ka ta, chuongchun, saiip puon silin ni sâng khat za hni sâwmruk sûng po thu hril an tih,” a ta.

⁴Chuong chu Oliv thing pahni le khâwnvar siena pahni, khawvêl Lal hmaa ngîrhai chu an nih.

⁵Anni chu tûkhawmin suknat an tum chun, an baua inthawkin mei a hung suok a, an hmêlmahai chu a kânghmang hlak. Tûkhawmin anni chu suknat tum ang sienla, chuong ang bawka sukhlumin an um ding a nih.

⁶Chuonghai chun an thu hril sûng po ruo sûr naw dinga vân sukping theina an nei a; an nuom pha phaa thisena inchangtir dingin tuihai chungah thu an nei a, khawvêl hi hremna tinrênga hrem dingin thu an nei bawk a.

⁷Chun, an inhriettirna thu chu an hril zo phaa vânsama inthawka Sahrâng hung suok ding chun anni do a ta, hnêng a ta, sukhlum a tih.

⁸Chun, an ruong chu khaw ropui kawtthlêra chun um zing a ta; chu khaw ropui chu thlarau tieng thua chu Sodom le Aigupta an ti a nih, chutaka bawk chun an Lalpa chu hemdein a um kha.

⁹Chun, mihai laia mi dâm, chihai laia mi dâm, ṭawnghai laia mi dâm, hnamhai laia mi dâmin ni thum le a chenve an ruong chu en an ta, an ruonghai chu thlâna phûm phal naw ni hai.

¹⁰An thi leiin hnuoia umhai chu lâwm an ta, hlimna siem an ta, thilpêkhai inthawn tuo bawk an tih; zâwlnei pahni hai chun hnuoia umhai chu an sukrimsik hlak leiin.

¹¹Chun, ni thum le a chenve hnunga chun Pathien kuoma inthawka hringna thuok an sûngah a hung lût a, an kein an ngîr ta a, chuongchun, a hmutuhai chun an ṭi ta bêk bêk a.

¹²Chun, an kuomah, “Hitaka hin hung ro,” tiin vâna inthawkin râwl inringtak an hriet a. Chuongchun, sûm lai chun vânah an hang fe ta a; an hmêlmahai chun an hmu zing a.

¹³Chun, chu lai tak chun simkhawleihnuoi nasatakin a hung inhnîng a, khuo chu hmun sâwma ṭhea hmun khat a chim ta a, simkhawleihnuoi inhnînga chun mi sâng sari an thi a; a danghai chun an ṭi a, vân Pathien chu an chawimawi ta a.

¹⁴Chungrikna pahnina chu a bo ta a, ngai ta, chungrikna pathumna chu a hung um vak ding a nih.

¹⁵Chun, vântirko pasarina chun a hang mût a, chuongchun, “Khawvêl ram chu ei Lalpa le a Krista ram a hung ni tah, ama chun chatuonin ro rêl a tih,” tiin vâna chun rawl inringtakin a hung suok nghâl ta a.

¹⁶Chuongchun, Pathien hmaa an lalṭhungphaa upa sâwmhni le pali ṭhunghai chu an bawkkhup a, Pathien chibai an bûk a.

¹⁷“Aw Lalpa Pathien, Iengkimthawthei, um zing le um tah, i thilthawtheina ropuitak chu laa ro i rêl leiin lâwmthu kan hril che.

¹⁸Hnamhai chu an lunginsen a, chun, i lunginsenna chu a hung tlung ve thung a, mithi rorêlpêk hun le, i suok zâwlneihai kuoma dâm, mi inthienghai kuoma dâm, i hming inza mi lien le mi chînhai kuoma dâm, an lâwmman pêk hun le, hnuoi suksetuhai suksiet ve thung hun chu a hung tlung bawk a,” tiin.

¹⁹Chun, vâna Pathien biekin chu ân hawng a, chuongchun, biekina chun a thuthlungna bâwm chu a hung inlang ta a; chun kâwlinlep dâm, rawl dâm, vân inrûm dâm, simkhawleihnuoi inhnîng dâm, riel nasatak dâm, a hung um nghâl ta a.