Read Hmar THUPUONGSUO 12 Bible Online

THUPUONGSUO 12 - Hmar bible

THUPUONGSUO 12

¹Chun, thilmak ropuitak vânah a hung inlang ta a; nuhmei nisaa inthuom, a ke hnuoia thla um, arasi sâwm le pahnia siem lallukhum khum a hung um a;

²ama chun nau a vawn a; nauhase nain ân rûm a.

³Chun, thilmak dang vânah a hung inlang nâwk a; ngai ta; dragon sen lientak lu sari le ki sâwm nei, lallukhum pasari khum a hung um a.

⁴A mei chun vân arasi hmun thuma ṭhea hmun khat chu a kei a, hnuoiah a peithlâk ta a. Chun, a nei phaa a nau chu a lem theina dingin dragon chu nuhmei nau nei ding hmaa chun a ngîr zing a.

⁵Chun, naupasal, hnam po po chunga thîr hmawla rorêl ding a nei a, chun, a nau chu Pathien kuoma le a lalṭhungphaa chun zuk lâkin a um ta a.

⁶Chun, nuhmei chu thlalêra Pathien ibuotsai hmun a neinaa chun a tlân hmang a, chutaka chun ni sâng khat za hni sâwmruk an châwm theina dingin.

⁷Chun, vâna chun indona a hung um a; Mikael le a vântirkohai chun dragon chu an do a;

⁸dragon le a tirkohai khawm chun an do ve a; nisienlakhawm, an hne ta naw a, an hmun chu vânah a um ta bawk nawh.

⁹Chun, dragon lientak, Rûlpui tar, Diebol le Setan an ti, khawvêl po po hlêmtu chu, an pei thlâk ta a; hnuoiah an pei a, a tirkohai khawm an pei thlâk sa ve a.

¹⁰Chun, vâna chun rawl inringtakin, “Tuhin chu ei Pathien sandamna le thilthawtheina le ram chu a hung tlung ta a, a Krista thuneina leh; ei unauhai hêktu, ei Pathien hmaa a sûn a zâna hêk hlaktu chu, an pei thlâk ta si a.

¹¹Berâmte thisen lei le an inhriettirna thu leiin, ama chu an hne a nih; thi ngam khawpin an hringna an ngainêp bawk a.

¹²Chuleiin, aw vânhai le a sûnga umhai, lâwm ro! Hnuoi le tuipuia um po pohai, in chung a rik ie! Diebol chun hun tlâwmte chau a nei tah ti hrea lunginsen bêk bêka in kuoma a hung thla ta leiin,” a ti ka hriet a.

¹³Chun, dragon chun hnuoia pei thlâk a nih ti ân hriet phingleh naupasal neitu nuhmei chu a suknawmna ta a.

¹⁴Chuongchun, thlalêra a hmuna chun a vuong lût theina dingin nuhmei chu mupui lientak thla khing hni an pêk a, chutaka chun rûlpui hmu phâk nawah hun khat le hunhai le hun chenve sûng po châwm an tih.

¹⁵Chun, rûlpui chun tuiin a lên hmang theina dingin nuhmei hnunga chun vadung ang elin a baua tui a pik suok a.

¹⁶Nisienlakhawm, hnuoiin nuhmei chu a ṭhangpui a, hnuoi chun a bau a ka a, dragonin abaua inthawka a pik suok vadung chu a lem zo ta a.

¹⁷Chuongchun, dragon chu nuhmei chunga chun a hung lunginsen a, a thla la um Pathien thupêkhai zâwm a, Isu inhriettirna thu pawmhai chu do dingin a fe ta a.

¹⁸Chuongchun, dragon chu tuisuoriet ṭieuphoa chun a ngîr ta a.