Read Hmar THUPUONGSUO 13 Bible Online

THUPUONGSUO 13 - Hmar bible

THUPUONGSUO 13

¹Chun, Sahrâng ki sâwm le lu sari nei, tuipuia hung suok ka hmu a, a kihaia chun lallukhum sâwm a uma, a luhaia chun Pathien hrilsietna hminghai a um bawk a.

²Chun, ka Sahrâng hmu chu keitê ang a na, a kehai chu savawm ke ang a nih; a bau chu sakeibaknei bau ang a nih; chun, dragon chun a kuomah a thilthawtheina le a lalṭhungpha le thuneina nasatak a pêk a.

³A lu pakhat chu thipui khawp raua hliem angin ka hmu a, nisienlakhawm, thipui khawp rau dinga hliem chu a dam ta a; chuongchun, hnuoia mi po poin Sahrâng chu mak an ti a, an zui a.

⁴Chun, Sahrâng kuoma chun a thuneina chu a pêk leiin dragon chu Pathien chibai bûkin an bûk a; chun, “Sahrâng ang hi tu am a uma, tuin am do thei a ta?” tiin Sahrâng khawm chu an bûk bawk a.

⁵Chun, uongna le Pathien hrilsietna thu hrilna bau a kuoma pêk a na, thla sâwmli pahni châng dingin thuneina pêk a ni bawk a.

⁶Chuongchun, Pathien hrilsein a bau a ka ta a, a hming le a umna, vâna umhai chu hrilse dingin.

⁷Chun, mi inthienghai a do le a hne phal a na, chi tinrêng dâm, mi tinrêng dâm, ṭawng tinrêng dâm, hnam tinrêng dâm chunga thuneina a kuoma pêk a ni bawk a.

⁸Chuongchun, hnuoia um po po, leilung insieng tîra that tah Berâmtê Hringna Bua hming ziek naw po chun, Pathien chibai bûkin bûk an tih.

⁹Tûkhawmin na a nei chun hre raw se.

¹⁰Tûkhawm sala um ding ani chun salah a um hlak, tûkhawmin kâwlhnâma mi a that chun kâwlhnâma that ding a nih. Hitaka hin mi inthienghai selna le ringna inlang theina a um.

¹¹Chun, Sahrâng dang hnuoia hung suok ka hmu a; berâmte kî ang ki pahni a nei a, dragon ṭawng angin a ṭawng a.

¹²Sahrâng hmasa thuneina po po ang kha a mithmuah a hmang a, Hnuoi le a chunga um po pohai chu Sahrâng hmasa lem, thipui khawp rau dinga hliem dam nâwk chu, chibai ân bûktir bawk a.

¹³Chun, mihriem mithmuah vâna inthawka hnuoia mei intlâktir thei khawp rauin thilmak ropuitak a thaw hlak.

¹⁴Hnuoia umhai kuomah, Sahrâng kâwlhnâma hliem hnung la dam chawimawina dingin ama lim an siem ding a ni ti hrilin, Sahrâng mithmua thilmak thaw dinga thu a ihmu, chuong thilmak lei chun hnuoia umhai chu a hlêm bawk a.

¹⁵Chun, Sahrâng lim chu a ṭawng theina ding le, Sahrâng lim chibai bûk naw taphawt ân sukhlumtir theina dingin Sahrâng lim kuoma chun inthuokna pêk phal a nih.

¹⁶Chun, mi po po a lien a chînin, a hausa a pasiein, suok le suok nawhai khawm, an kut chang tienga manih, an chala manih inchikna ân neitir tâwl a;

¹⁷inchikna, Sahrâng hming amanih, a hming nambar amanih, neihai chau naw chun, tûkhawmin iengkhawm an inchâwkin an zawr thei nawna dingin.

¹⁸Hitaka hin varna inlang theina a um. Hriet theina nei chun Sahrâng nambar chu sût raw se; mihriem nambar a ni si a; a nambar chu za ruk sâwmruk paruk a nih.