Read Hmar THUPUONGSUO 14 Bible Online

THUPUONGSUO 14 - Hmar bible

THUPUONGSUO 14

¹Chun, ka hang en a, Berâmte chu Zion Tlânga ngîrin le an chala a hming le a Pa hming ziek, mi nuoi khat le sîng li le sâng li a kuoma chun an um a.

²Chun, vâna inthawka rawl ri, tui tamtak ri ang le, vâninrûm ri nasatak ri ang, ka hriet a; chun, ka ri hriet chu ṭingṭang keituhaiin an ṭingṭang an kei ri ang a na,

³lalṭhungpha hmaa le, thilhring pali le upahai hmaa chun hla thar ni âwmtak hi an sak a; chun, hnuoia inthawka intlan tah, mi nuoi khat le sîng li le sâng li chau naw khan chu, tûkhawmin chu hla chu an inchûk thei nawh.

⁴Chuonghai chu nuhmeia insukthiengnaw nawhai chu an nih; nunghâk inthieng ang an ni si a. Chuong chu Berâmte a fena taphawta zuituhai chu an nih. Chuong chu Berâmte le Pathien ta dinga ra hmasatak ni dinga mihriem laia inthawka intlan suok an nih.

⁵An baua khêl a suok hrim miin an hriet ngai nawh, sawisêlbo an ni si a.

⁶Chun, hnuoia umhai kuoma le, hnam tinrêng dâm, chi tinrêng dâm, ṭawng tinrêng dâm kuoma tlânginsampui dinga chatuon Chanchin Ṭha nei vântirko dang vânlaizâwla vuong ka hmu a;

⁷Ama chun rawl inringtakin, “A rorêl hun chu a hung tlung ta leiin Pathien chu ṭi unla, chawimawi ro; vân dâm, hnuoi dâm, tuipui dâm, tui hnâr dâm siemtu chu chibai bûk ro,” a ti a.

⁸Chun, vântirko dang, a pahnina chun, “Babulon khaw ropui, a mi dit chîngna leia lunginsenna uoiin hnam po po indâwntirtu chu, a tlâwm tah!” tiin a hung zui a.

⁹Chun, vântirko dang, a pathumna chun rawl inringtakin, “Tûkhawmin Sahrâng le a lim chibai bûkin a chala manih, a kuta manih inchikna a nei chun, chu mi ngei chun Pathien lunginsenna uoiin,

¹⁰a lunginsenna noa iengkhawm pawl lova siem chu dâwn a ta, vântirko inthienghai mithmua le Berâmte mithmua chun mei le kâta sawisakin um bawk a tih.

¹¹Chun, chuong mihai sawisakna meikhu chu chatuonin hang fêng a ta; Sahrâng le a lim chibai bûktuhai, a hming inchikna nei taphawthai khawm chun, a sûn a zânin châwl hrim nei naw ni hai,” tiin anni chu a hung zui a.

¹²Hitaka hin mi inthieng Pathien thupêkhai le Isu ringna thu zâwmtuhai selna inlang theina a um.

¹³Chun, vâna inthawkin rawlin, “Hienghin ziek rawh: Tuta hnung chu mithi, Lalpaa thihai chu, an hamṭha. Thlarau chun, ‘Anih, an sininrimnahai chu châwl san tâng an tih; an thilthawhai chun a hung zui ve ding a ni si a,’ a tih,” a ti ka hriet a.

¹⁴Chun, ka hang en a, sûm vâr tak ka hmu a. Sûm chunga chun mihriem naupa ang tak hi, rângkachak lallukhum khuma, kâwite ngeitak chawia ṭhung ka hmu bawk a.

¹⁵Chun, vântirko dang, Pathien biekina inthawkin a hung suok a, sûm chunga ṭhung kuoma chun rawl inringtakin, “I kâwite kha keidawk la, ât rawh; ât a hun ta si a; hnuoi bu khu a ngui zo tah khu,” a ta.

¹⁶Chuongchun, sûm chunga ṭhung chun a kâwite chu hnuoiah a thlâk a, hnuoi bu chu an ât ta a.

¹⁷Chun, vântirko dang vâna Pathien biekina inthawkin a hung suok nâwk a, ama khawm chun kâwite ngeitak a chawi bawk a.

¹⁸Chun, vântirko dang, mei chunga thuneitu chu, maichâma inthawkin a hung suok nâwk a; chun, ama chun rawl inringtakin, “I kâwite ngeitak kha keidawk la, hnuoia grêp hrui ra bâwrhai khu zu ât rawh, grêp rahai khu a hmin ṭuo ta khu,” tiin kâwite ngeitak chawitu chu a ko a.

¹⁹Chuongchun, vântirko chun a kâwite chu hnuoiah a thlâk a, hnuoia grêp ra chu a ât a, grêp sâwrna khur lientak, Pathien lunginsenna grêp sâwrna khura chun a the lût a.

²⁰Chun, khaw puo tienga grêp sâwrna khura chun a sir sâwr a, chuongchun, grêp sâwrna khura inthawk chun thisen a hung suok a, fîng sâng khat le za ruk chen sakawrhai thîrbar chena inthûk a nih.