Read Hmar THUPUONGSUO 15 Bible Online

THUPUONGSUO 15 - Hmar bible

THUPUONGSUO 15

¹Chun, vânah inchikna dang ropuitak le maktak ka hmu a, vântirko pasari hremna pasari chawihai chu; chuong chu hremna nuhnung takhai an nih; chuonga chun Pathien lunginsenna chu a kim ta si a.

²Hlimen ang el tuipui, mei le inpawl ka hmu a, Sahrâng le a lim, inchikna le a hming nambar hnea hung suokhai chu Pathien ṭingṭanghai an kuthaia chawia hlimen tuipui chunga ngîr ka hmu a.

³Chun, Pathien suok Mosie le Berâmte hla an sak a, “Aw Lalpa Pathien Iengkimthawthei, I thilthawhai chu a ropuiin a mak a; Nang, hnam tin Laltak, I lampuihai chu a felin ân dik a nih.

⁴Aw Lalpa, tu am i hming inza naw a, Chawimawi naw ding? Nang chau în thieng si; I thilthaw felhai chu suklang a ni ta leiin, Hnam tinrêngin chibai hung bûk an ti che,” tiin.

⁵Chuong hnunga chun ka hang en a, chun, vâna inhriettirna biekbûk pindan sûngril chu ân hawng a;

⁶chuongchun, pindan sûngrila inthawk chun hremna pasari chawi vântirko pasarihai chu, puon inthieng vârtak silin, an âwm rangkachak kâwngkhia inkhitin an hung suok a.

⁷Chun, thilhring pali laia pakhat chun vântirko pasarihai kuoma chun, Pathien chatuona hring zing lunginsennaa sip rângkachak berbu pasari a pêk a.

⁸Chun, pindan sûngril chu Pathien ropuina le a thilthawtheina khuin a sip ta a; vântirko pasarihai hremna pasari chu a bo hmakhat pindan sûngrila chun tûkhawm an lût thei nawh.