Read Hmar THUPUONGSUO 16 Bible Online

THUPUONGSUO 16 - Hmar bible

THUPUONGSUO 16

¹Chun, pindan sûngrila inthawk chun rawl inringtakin, vântirko pasarihai kuoma chun, “Fe unla, Pathien lunginsenna berbuhai chu hnuoiah bunthla ro,” a ti ka hriet a.

²Chun, a hmasatak chu a fe a, a berbu chu hnuoiah a bunthlâk a; chuongchun, Sahrâng inchikna neihai le a lim chibai bûkhai chunga chun pânsie natakin ân chang ta a.

³Chun, a pahnina chun a berbu chu tuipuiah a bunthlâk a; chuongchun, mithi thisen angin thisenin ân chang ta a; chun, thilhring tinrêng tuipuia umhai chu an thi ta vawng a.

⁴Chun, a pathumna chun a berbu chu vadungahai le tuikhurahai a bunthlâk a; chuongchun, thisenin ân chang ta a.

⁵Chun, tui vântirko chun, “Nang Mi Inthieng, hieng anga ro i rêl leiin, nang um zing le um tah, i fel ie.

⁶Anni chun mi inthienghai le zâwlneihai thisen an insuo a; chun, nangin dâwn dinga thisen ma i pêk thung hi dâwn tlâk an ni hrim deh,” a ti ka hriet a.

⁷Chun, maichâm chun, “Anih, Aw Lalpa Pathien, Iengkimthawthei, i rorêlhai chu ân dikin a fel a nih,” a ti ka hriet a.

⁸Chun, a palina chun a berbu chu nisaah a bunthlâk a; chuongchun, nisa chu meia mihriem em ût dingin thilthawtheina an pêk a.

⁹Chuongchun, mihai chu lumtaka em ûtin an um a, chuong hremna chunga thuneitu Pathien hming chu an hrilsiet a, ama chawimawi dingin an sim chuong nawh.

¹⁰Chun, a pangana chun a berbu chu Sahrâng lalṭhungphaah a bunthlâk a; chuongchun, a ram chu a hung inthim ta vawng a. Chun, an nat leiin an lei an se a,

¹¹an nahai le an pânnahai leiin vâna Pathien chu an hrilsiet a; an thilthawhai chu an sim chuong nawh.

¹²Chun, a parukna chun a berbu chu tuipui Euphratesa chun a bunthlâk a; chuongchun, nisa suokna tieng panga lal hung dinghai ta dinga lampui chu inzosa a hung ni theina dingin, a tui chu a kang intan ta a.

¹³Chun, dragon baua inthawk le Sahrâng baua inthawk le, zâwlnei tehlêm baua inthawk chun thlarau inthiengnaw pathum u ni âwmtak, hung suok ka hmu a.

¹⁴Chuong chu khawhri thlarau, thilmak thaw hlakhai an nih. Anni chu Pathien Iengkimthawthei ni ropuia indonaa ṭhuoi khâwm dingin khawvêl po poa lalhai kuomah an fe a.

¹⁵(Ngai ta, inru angin ka hung ding a nih; inringa a puon dierkei zing chu a hamṭha, chuong naw chun, saruokin lêng a ta, a zamaw hmu rawi an tih).

¹⁶Hmun pakhat Hebrai ṭawnga Har-Magedon an tia chun an ṭhuoi khâwm ta a.

¹⁷Chun, a pasarina chun a berbu chu boruokah a bunthlâk a; chuongchun, pindan sûngrila, Lalṭhungphaa inthawkin, “A kim tah,” tiin rawl inringtak a hung suok a.

¹⁸Chun, kâwlinlep dâm, rawl dâm, vâninrûm dâm, a hung um ta a, simkhawleihnuoi khawm nasatakin ân hnîng a, hnuoia mihriem uma inthawk chuong ang hrima nasa a la um ngai nawh, simkhawleihnuoi inhnîng chuong ang lâwma nasa le ropui chu.

¹⁹Chuongchun, khaw ropui chu hmun thumah a hung inṭhe a, hnam tin khuohai chu a hung chim a; chun, a lunginsen nasatna uoin no chu a kuoma pêk dingin Babulon khaw ropui chu Pathien hmaa hriet zingin a lo um ta a.

²⁰Chun, thlierkâr tinrêng a bo ta vawng a, tlânghai khawm a um ta naw a.

²¹Chun, riel lientak talent tluk raua rik seng, vâna inthawkin mihriemhai chungah a tla a; chun, mihriemhai chun riela hremna lei chun Pathien an hrilsiet ta a; chu hremna chu a nasa bêk bêk si a.