Read Hmar THUPUONGSUO 17 Bible Online

THUPUONGSUO 17 - Hmar bible

THUPUONGSUO 17

¹Chun, vântirko pasari berbu pasari chawihai laia pakhat chun a mi biek a. “Hung ta, tui tamtaka ṭhung, nawchizawr ropuitak hremna chu inentir ka ti che.

²Hnuoia lalhai chun ama chu an dit hlak a, hnuoia umhai khawm chu a mi dit chîngna uoin chun vai ruiin an um hlak,” a ta.

³Chuongchun, ama chun Thlarauin thlalêrah a mi fepui a; chun, Pathien hrilsietna hminga sip, lu sari le ki sâwm nei, sahrâng seninlâr chunga chuong nuhmei ka hmu a.

⁴Chu nuhmei chun puon sen duk le sen lâr a sil a, rângkachak le lungmantam le tuikeplungin ân chei a. Rângkachak no, thil tirdakum, a mi dit chîngna thil inthiengnawa sip a chawi a.

⁵A bâwka chun thurûk, “BABULON KHAW ROPUI, HNUOIA NAWCHIZAWRHAI LE THIL TIRDAKUMHAI NU,” tia hming ziek a um a.

⁶Chun, chu nuhmei chu mi inthienghai thisen le Isu martarhai thisena inruiin ka hmu a. Ka hmu phingleh mak ka ti bêk bêk a.

⁷Chuongchun, vântirko chun ka kuomah, “Ieng leiin am mak i ti a? Nuhmei le a phurtu sahrâng lu sari le ki sâwm nei thurûk hril ka ti che.

⁸Sahrâng i hmu kha a um ta zet a, a um nâwk ta naw a; chun, vânsama inthawkin hung suok a ta, bohmangnaah fêng a tih. Chun, hnuoia umhai, leihnuoi insieng tîra Hringna Bua hming ziek nawhai chun, sahrâng chu an hmu phâleh, a um ta zeta, a um nâwk ta naw a, a hung nâwk ding chu mak la tîng an tih.

⁹Hitaka hin lungril varna nei inlang theina a um. Lu sarihai chu nuhmei ṭhungna tlâng pasarihai chu an nih. Lal pasari khawm an na;

¹⁰pangahai chu an tlâwm ta a, pakhat chu a la um, pakhat chu a la hung um hri naw a; a hung um pha chun sâwtnawtê um ding a nih.

¹¹Chun, sahrâng um ta zeta, um nâwk ta naw ngei khawm kha a parietna a na, pasarihai laia mi kha a ni nghe nghe a; bohmangnaah fêng a tih.

¹²“Chun, ki sâwm i hmuhai kha lal sâwm ram la nei nawhai an nih; dârkâr khat sûng chu sahrâng leh lalhai angin thuneina la hmûng an tih.

¹³Chuongchun, thu hmunkhatin an thilthawtheina le thuneina chu sahrâng pêng an tih.

¹⁴Chuongchun, Berâmte chu do an ta, chun, Berâmte chu hotuhai Hotu le lalhai Lal a ni leiin anni chu hnêng a tih; chun, a kuoma um, kohai, thlanghai, ringumhai chun hne bawk an tih,” a ti a.

¹⁵Chun, ama bawk chun ka kuomah, “Nawchizawr ṭhungna tui i hmuhai kha, mi dâm, mipui dâm, hnam dâm, ṭawng dâm a nih.

¹⁶Chun, ki sâwm i hmu le sahrâng chun nawchizawr chu theidâng an ta, iengkhawm neinaw le saruokin siem an tih, a sa khawm fâng an ta, meiin rawhmang an tih.

¹⁷Pathien thuhai chu a tlung hmakhat chun a dit zâwng an thawna ding le thu thuhmuna an um theina dingin le, an ram chu sahrâng kuoma an pêkna dingin Pathienin an lungrilah a tir ta si a.

¹⁸Chun, i nuhmei hmu kha, khaw ropui, hnuoia lalhai chunga rorêltu chu a nih,”a ta.