Read Hmar THUPUONGSUO 18 Bible Online

THUPUONGSUO 18 - Hmar bible

THUPUONGSUO 18

¹Chuong hnunga chun vântirko dang, thuneina nasatak neiin vâna inthawka hung ṭum ka hmu a; a ropuinain hnuoi chu a el ta vawng a.

²Chun, ama chun rawl inringtakin, “Babulon khaw ropui chu a tlâwm tah, a tlâwm tah! khawhrihai umna le, thlarau inthiengnaw tinrêng kulbîng le, vate inthiengnaw le tirdakum tinrêng kulbîng a hung ni tah.

³A mi dit chîng leia a lunginsenna uoin chu hnam po poin an dâwn ta si a; hnuoia lalhai chun ama chu an dit hlak a, hnuoia sumdâwngtuhai chun ân hawitir taluotna chu an hausak pha hlak,” tiin a khêk a.

⁴Chun, vâna inthawkin rawl dangin hienghin a hril ka hriet, “Ka mihai, an rîtlonaahai in ṭhangnawna ding le, a hremnahai in hmu ve nawna dingin a sûnga inthawkin suok ro.

⁵A suolnahai chun vân khawm a tawng ta hiel a, Pathienin a thilthaw felnawhai khawm chu a hriet zing si a.

⁶Amain a pêk ang ngei khan pe thung unla, a thilthawzie ang pei chu a lêt hniin thung unla, a chawkpawlna noa chun a ta dingin a lêt hniin chawkpawlpêk ro.

⁷“Ân sukropui le ân hawitirzie ang pei khan sawisain suklungngai thung ro; a lungril chun, ‘Lalnuin ka ṭhung a nih, hmeithai hrim ka ni naw a, lungngaina hmu dêr naw ningah’, a ti si a.

⁸Chuleiin, ni khat sûngin a hremna hri dâm, lungngaina dâm, ṭâm dâm chu hung tlung vawng a tih; meia rawhmangin um bawk a tih; a rorêltu, Lalpa Pathien chu a hrât si a.

⁹“Chun, hnuoia lal, a dit hlakhai le ân hawitirpui hlakhai chun, a kâng khu chu an hmu pha a chunga ṭapin âwm inchum an ta;

¹⁰sawisakna ṭi leia hlataka ngîrin, Babulon khaw ropui, khaw det chu a chung a rik, a chung a rik! Dârkâr khat chauah i chungah rorêlna chu a hung tlung ta si,” an ti a.

¹¹“Chun, hnuoia sumdâwngtuhai chu a chunga ṭapin an lungngai a, tûkhawma an thuomhnaw an inchâwk ta naw leiin.

¹²An thuomhnawhai chu, rângkachak dâm, tangka dâm, lungmantam dâm, tuikeplung dâm, puon zai inhmi dâm, puon senduk dâm, tuktulungêk puon dâm, puon sen inlâr dâm leh; thing riminhnik tinrêng dâm, saiha bêl tinrêng dâm, thing hlutak le dâr le thîr le sailungvâra siem, bêl tinrêng dâm leh;

¹³thingzungthak dâm, thil riminhnik dâm, riminhnik rawmi dâm, innâlna chi dâm, murra dâm, beraw dâm, uoin dâm, sahriek dâm, beiphit indi tak dâm, bu dâm, sebâwng dâm, berâm dâm leh; sakawr dâm, tawlailîr dâm, suok dâm leh; mihriem hringna dâm leh a nih.

¹⁴‘Ra i lungrilin a châkhai chun a fe hmang san che a, thil tuihnâi le mawi po po chun an bohmang san che a, hmu nâwk ta naw tawp an tih,’ an ti a.

¹⁵“Chuong thila sumdâwngtu, ama leia hung hausahai chu ṭap le lungngai pumin a sawisakna chu ṭi leia hlataka ngîrin,

¹⁶‘Khaw ropui, puon zai inhmi le puon sen duk le puon sen inlâr sila, rângkachak le lungmantam le tuikeplunga inchei chu, a chung a rik, a chung a rik!

¹⁷Dârkâr khat chauah sum chuong zozai chu teplo a lo ni ta hi,’ tîng an tih.

¹⁸“Chun, lawng hotu taphawt dâm, lawnga fe hlak taphawt dâm, lawng mi dâm, tuipuia sinthaw taphawt dâm chu hlataka ngîrin, a kâng khu chu thlîr pumin, ‘Hi khaw ropui tluk hi khâwlai khuo am um a ta?’ tiin an khêk a.

¹⁹Chun, ṭap le lungngai pumin, A chung a rik ie, a chung a rik ie! “A neinungna leia tuipuia lawng neituhai po po an hung hausakna khaw ropui chu, dârkâr khat sung chaua inram a hung ni ta hi!” tia khêkin an luah pilvut an the a.

²⁰“Aw vân le nangni mi inthienghai, tirkohai dâm, zâwlneihai dâm, lâwm ro, ama chun in chunga ro a rêlna chun Pathienin a chungah ro a rêl ve ta hi,” tiin.

²¹Chun, vântirko hrâttak hin burawtnawina lung lientak ang hi lung a lâk a, tuipuiah a peithlâk a, “Babulon khaw ropui chu hieng anga nasa hin peithlâk nîng a tih, tûkhawmin hmu nâwk ta naw tawp an tih.

²²Ṭingṭang keituhai dâm, iengkhat mût thiemhai dâm, theihle mûttuhai dâm, tawtawrâwt puhai ri dâm i sûngah hre nâwk ta naw tawp an ta; themthiem kawng hrim hrimah themthiem hrim khawm i sûngah hmu nâwk ta naw tawp an ta; burawtnawina ri khawm i sûngah hre nâwk ta naw tawp an tih.

²³Khâwnvar khawm i sûngah var nâwk ta naw tawp a ta; pasal le mo ri khawm i sûngah hre nâwk ta naw tawp an tih. I sumdâwngtuhai chu hnuoia mi lienhai an ni si a; i dâwiin hnam po po hlêm an ni kha.

²⁴A sûngah zâwlneihai dâm, mi inthienghai dâm, hnuoia that po pohai thisen dâm chu an hmu a,” a ti a.