Read Hmar THUPUONGSUO 19 Bible Online

THUPUONGSUO 19 - Hmar bible

THUPUONGSUO 19

¹Chuong hnunga chun vânah mipui nasatakhai rawl inringtak ni âwmtak hin, “Halleluia, sandamna dâm, ropuina dâm, thilthawtheina dâm, ei Pathien ta a nih.

²A rorêlnahai chu ân dikin a fel a nih. Ama chun nawchizawr ropuitak, a mi dit chîng leia hnuoi sukkhawhlotu chu, a ro a rêl a, a suokhai thisen insuo phuba chu a kutin a lâk ta hi, an ti ka hriet a.”

³Chun, “Halleluia! A khu chu chatuonin a tungin fêng a tih,” an ti nâwk a.

⁴Chun, upa sâwmhni le pali le thilhring palihai chu an bawkkhup a, “Amen, Halleluia,” tiin Pathien lalṭhungphaa ṭhung chu chibai an bûk a.

⁵Chun, lalṭhungphaa inthawkin rawl a hung suok a, “Nangni a suok po po, ân zâtu mi lien le mi chînhai, ei Pathien chu inpâk ro,” a ta.

⁶Chun, mipui nasatak rawl ang le, tui tamtak ri ang le, vâninrûm nasatak ri angin, “Halleluia, Lalpa ei Pathien Iengkimthawthei chun ro a rêl ta hi.

⁷Hlimtakin lâwm inla, ama chawimawi ei tiu, Berâmte nuhmei nei chu a hun ta si a; a mo khawm ânzo tah,” a ti ka hriet.

⁸Puon zai inhmi faitak, vârtak sil phal pêk a ni a, (puon zai inhmi chu mi inthienghai thilthaw fel a ni si a.)

⁹Chun, ‘Berâmte nuhmei neina ruoiṭhea fielhai chu an hamṭha ie,’ tiin ziek rawh,” a mi ti a. Chun, ka kuomah, “Hieng thu hi Pathien thu tak a nih,” a ti bawk a.

¹⁰Chuongchun, Pathien chibai bûka bûk dingin a ke bulah ka bawkkhup a. Chun, ama chun ka kuomah, “Hienghin thaw naw raw khai, kei chu nangma le i unau, Isu inhriettirna thu pawmhai suok chanpui ka ni annâwm; Pathien chibai bûk lem rawh; Isu inhriettirna thu chu thu hrilna thlarau a ni si a,” a ta.

¹¹Chun, vân inhawng ka hmu a; chun, ngai ta, sakawr vâr le a chunga chuong Ringum le Indiktak, an iti chu ka hmu bawk a; ama chun feltakin ro a rêl a, mi a do hlak.

¹²A mithai chu meichawk ang a na, lallukhum tamtak a khum a, achun, hming ziek ama chau naw chun tûkhawmin an ihriet naw a nei a.

¹³Puon thisen kai a sil a, a hminga chun, “Pathien Thu,” an ta.

¹⁴Vâna sipaihai chun, puon zai inhmi vârtak, faitak silin, sakawr vârhai chunga chuongin an zui a.

¹⁵Chun, a baua inthawkin kâwlhnâm ngeitak a suok a, chu chu hnam tin a sâtna ding a nih; chun, thîr hmawlin an ro rêl a ta; Pathien Iengkimthawthei lunginsen nasatna grêp sâwrna khura chun sir sâwr a tih.

¹⁶Chun, a puona le a êlpuia chun, “Lalhai Lal le hotuhai Hotu,” tia hming ziek a um.

¹⁷Chun, nisaa khin vântirko ngîr ka hmu a; ama chun vânlaizâwla vate vuong po pohai kuoma chun rawl inringtaka khêkin, “Pathien ruoi ropuitak ṭhenaa chun hung inkhâwm ro,

¹⁸lal sa dâm, sipai hotu sa dâm, mi hrât sa dâm, sakawr sa le a chunga chuong sa dâm, mi po po suok le suok naw, a lien a chîn khawm an sa in fâk theina dingin,” a ti a.

¹⁹Chun, Sahrâng dâm, hnuoia lalhai dâm, an sipaihai dâm, sakawr chunga chuong kha do ding le a sipaihai chu do dinga an inkhâwm ka hmu a.

²⁰Chun, Sahrâng chu an man a, zâwlnei tehlêm-Sahrâng inchikna nei le a lim chibai bûktuhai a hlêmna hlak thilmak a mithmua thawtu kha-an man sa a. An pahni chun kâta kâng mei dîla chun a hringin an pei a.

²¹Mi danghai chu sakawr chunga chuong kâwlhnâm, a baua inthawka suok khan sâthlum an ni ta a; vate po po chu an sahai fain an khawp ta vawng a.