Read Hmar THUPUONGSUO 2 Bible Online

THUPUONGSUO 2 - Hmar bible

THUPUONGSUO 2

¹“Ephesia kohran tirko kuoma chun hieng hin ziek rawh: “ ‘A kut changtienga arasi pasari chawia, rângkachak khâwnvar siena pasari laia inlawn inlawn khan, hieng thu hi a hril a nih:

²I thilthawzie dâm, i sininrimzie dâm, i selzie dâm, mi suolhai i ngaitheinawzie dâm ka hriet. Tirko ni si lova tirko intihai chu I fie bawk a, khêlhlip an nih ti i lo hriet ta a.

³Selna i nei bawk a, ka hming leiin i tuor ta a, i châu si naw a.

⁴Nisienlakhawm, demna che ka nei a nih, i hmangaina hmasatak kha i bân tâk leiin.

⁵Chuongchun, i tlûktâkna chu hre zing la, simin, i thil thaw hmasa takhai kha thaw nâwk rawh; chuong naw chun, i kuomah hung ka ta, i sim naw chun i khâwnvar siena kha a hmuna inthawkin sawn ka tih.

⁶Nisienlakhawm, hi hi i ṭhatna chu a nih. Nikolahai thilthawhai i theida hi; chu chu kei khawmin ka theida ve a nih.

⁷Thlarauin kohranhai kuoma thu a hril hi na nei chun hre raw se. A hnetu taphawt chu Pathien Paradisa Hringna Thinga chu infâktir ka tih,’ tiin.

⁸“Chun, Smurnaa kohran tirko kuoma chun hieng hin ziek rawh: “ ‘Hmasatak le Nuhnungtak, thia hung hring nâwk ta khan, hieng thu hi a hril a nih:

⁹I rinumzie dâm, i pasietzie dâm, (nisienlakhawm i hausa si), Juda tak ni lova, Setan inkhâwmna inhai ni lem si a, Juda intihai i hrilsiet zie dâm ka hriet.

¹⁰I tuor dinghai hi ṭi naw; ngai ta, fiea i um theina dingin, Diebol chun nangni laia mi ṭhenkhat intângna inah a khum ding cheu a nih; chun, ni sâwm rinum tuor in tih. Thi chenin ringumin lo um rawh, chuongchun, hringna lallukhum pêng ka ti che.

¹¹Thlarauin kohranhai kuoma thu a hril hi na nei chun hre raw se. A hnetu taphawt chu thi hnina chun iengkhawm law naw ni, a tih,’ tiin.

¹²“Chun, Pergamosa kohran tirko kuoma chun hieng hin ziek rawh: “ ‘Kâwlhnâm ngeituo ngeitak neitu khan hieng thu hi a hril a nih:

¹³Setan lalṭhungpha innghatna hmuna um i nih ti ka hriet. Nisienlakhawm, ka hming i ṭan tlat a, chun, ka thu hretu ringum Antipa, Setan umna hmuna nangni laia an that lai khawm khan, i ringna in phat chuong nawh.

¹⁴Nisienlakhawm, tlâwmin demna che ka nei: Balaam inchûktirna pawmtu mi ṭhenkhat i kawl a, ama chun Balak chu Israel mipuihai sukthlû a, milim biekna sa infâktir ding le, inditna suola intlûktir dingin ân chûktir a nih..

¹⁵Nang khawmin Nikolahai inchûktirna thu chuong ang bawka pawm tuhai amanih i umpui bawk a nih.

¹⁶Chuongchun, sim rawh, chuong naw chun i kuomah hung vak ka ta, ka baua kâwlhnâm chun anni hung do ka tih.

¹⁷Thlarauin kohranhai kuoma thu a hril hi na nei chun hre raw se. A hnetu taphawt kuom ngeia chun manna thuphmang laia kha pêng ka ta, lung vâr khawm pêng ka tih, chu lung chunga hming thar ziek leh; chu hming chu a changtu chau naw chun tûkhawmin an hriet nawh, a tih,’ tiin.

¹⁸Chun, Thuatiraa kohran tirko kuoma chun hieng hin ziek rawh: “ ‘Pathien Naupa, mit meichawk ang nei, a kephahai dâr tle mi ang khan, hieng thu hi a hril a nih:

¹⁹I thilthawzie dâm, i hmangaizie dâm, i awizie dâm, i rawngbâwlzie dâm, i selzie dâm ka hriet, i thilthaw nuhnungtakhai chu a tîr nêk khan a nasa lem ti ka hriet bawk.

²⁰Nisienlakhawm, demna che ka nei; nuhmei, Jezebel, Zâwlneinu inti kha, i ngai thei leiin; ama chun ka suokhai chu indit le milim biekna thil fâk inchûktirin, a ṭhuoi hmang bawk hlak a nih.

²¹Simna dingin a kuomah hun bi ka tuk a, nisienlakhawm, mi dit a chîng chu a sim nuom nawh.

²²Ngai ta, ama chu khumah ka pei ding a nih, a rêtpuituhai khawm chu, a thil thaw chînghai chu an sim san naw chun, rinum nasatakah pei bawk ka tih.

²³A nauhai chu hriin sukhlum ka ta; chuongchun, kei lungril le lungvar entu ka ni ti kohranhai po po chun hrieng an tih; chun in thaw ang peiin pe seng ka ti cheu.

²⁴Nisienlakhawm, nangni Thuatiraa mi dang um, chu inchûktirna thu pawm lova, Setan thil inthûk an itihai hre naw taphawt kuoma chun, phurrik dang hrim bel naw ning cheu ka ti a nih.

²⁵In nei sa ruok kha chu ka hung hmakhat chun kawl tlat ro.

²⁶A hnetu taphawt le a tâwp chena ka thilthawhai pawmtu chu hnam tin chungah thu inneitir ka tih;

²⁷chun, ama chun bêlhemtu bêlhai kawinawi dapa a um angin thîr hmawlin ro rêlpêk a tih,

²⁸keiin ka Paa inthawka thuneina ka hmu ang bawk hin. Chun, Sikhawvar chu ama pêng ka tih.

²⁹Thlarauin kohranhai kuoma thu a hril hi na nei chun hre raw se, a tih, tiin.