Read Hmar THUPUONGSUO 20 Bible Online

THUPUONGSUO 20 - Hmar bible

THUPUONGSUO 20

¹Chun, vântirko vânsam chabi le khaidiet lientak chawia, vâna inthawka hung ṭum ka hmu a.

²dragon, rûlpui tar chu (chu chu Diebol le Setan a nih) a man a, kum sâng khata dingin a khuop a,

³vânsama chun a pei lût a, a khâr khum a, kum sâng khat chu ân vawi hmakhat chu hnam tin a hlêm nâwk ta nawna dingin a châr nel ta a; chu hnunga chun sâwtnawtêa dingin insuo nâwk ding a nih.

⁴Chun, lalṭhungphahai ka hmu a, a chungah mi an ṭhung a, an kuoma chun rorêlna an pêk a. Chun, Isu inhriettirna thu lei le, Pathien thu leia lu tanhai thlarau le sahrâng le a lim chibai bûk lova, an bâwka manih, an kuta manih inchikna nei nawhai thlarau chu ka hmu bawk a. Chuonghai chu an hung hring a, kum sâng khat sûnga dingin Krista leh rorêlin an um a.

⁵(Mithi danghai ruok chu kum sâng khat chu ân vawi hmakhat chu an la hring hri naw a.) Chu chu thonâwkna hmasa chu a nih.

⁶Thonâwkna hmasaa ṭhanghai chu an hamṭhain an inthieng a nih; chuonghai chunga chun thi hnina chun thu hrim a nei naw a. Pathien le Krista thiempuhai nîng an ta, ama leh kum sâng khat rorêlin um lem an tih.

⁷Chun, kum sâng khat chu ân vawi pha chun Setan chu ân tângnaa inthawka insuoin um a ta,

⁸hnuoi kil lia hnamhai, Gog le Magog chu, hlêma, indonaa ṭhuoi khâwm dingin fe suok a tih; chuonghai tamzie chu tuipuia phaiphin ang el an nih.

⁹Chun, hnuoi khang tieng dâpin a tungin an fe a, mi inthienghai le khuo ditumtak chu an inhuol ta a, chun, vâna inthawkin mei a hung tla a, anni chu a kânghmang ta a.

¹⁰Chun, anni hlêmtu, Diebol chu Sahrâng le zâwlnei tehlêm umna, mei le kât dîla chun an pei ta a; chuongchun, chatuonin a sûn a zâna sawisakin um an tih.

¹¹Chun, lalṭhungpha lientak vârtak le a chunga ṭhung chu ka hmu a, a hmaa inthawk chun hnuoi le vân an tlân hmang a, an ta dingin hmun hrim a um ta naw a.

¹²Chun, mithihai a lien a chîn, lalṭhungpha hmaa ngîr ka hmu a. Chun, lekhabuhai an phar a,lekhabu dang Hringna bu chu an phar bawk a, mithihai chu lekhabuhaia ziek an thilthaw ang peiin rêlpêkin an um ta a.

¹³Tuisuoriet chun a sûnga mithi umhai chu ân suoktir a, Thina le Mithi Khuo chun an sûnga mithi umhai chu an insuoktir bawk a; chun, mi tin an thilthaw ang peia rêlpêkin an um ta a.

¹⁴Chun, Thina le Mithi Khuohai chu mei dîlah an pei a. Chu chu thi hnina chu a nih, mei dîl chu.

¹⁵Tûkhawm Hringna Buah a hming ziek an hmu naw chun mei dilah an pei bawk a.