Read Hmar THUPUONGSUO 21 Bible Online

THUPUONGSUO 21 - Hmar bible

THUPUONGSUO 21

¹Chun, vân thar le hnuoi thar ka hmu a; vân hmasa le hnuoi hmasa chu a bohmang ta a, tuipui khawm a um ta naw a nih.

²Chun, khaw inthieng Jerusalem thar chu, mo a pasal ela ân chei angin inzosa hieuin, Pathien kuoma vâna inthawka hung ṭum ka hmu bawk a.

³Chun, lalṭhungphaa inthawkin rawl inring tak ka hriet a, “Ngai ta, Pathien bâwkte chu mihriem lai a hung um tah, Ama chu an kuomah um a ta, Anni chu a mihai nîng an ta, Pathien ngei chu an kuomah um a ta, An Pathien ni bawk a tih;

⁴An mita inthawkin mitthli po po hrufai a ta; Thina um nâwk ta naw ni a, Lungngai dâm, ṭap dâm, nat dâm khawm, Um nâwk ta bawk naw ni a; Thil hmasahai chu a bo tah,” tiin.

⁵Chun, lalṭhungphaa ṭhung chun, “Ngai ta, thil iengkim ka siem thar ie,” a ta. Chun, “Ziek rawh, hieng thu hi ring a umin ân dik si a,” a ti bawk a.

⁶Chun, ka kuomah, “A hung tlung tah. Kei Alpha le Omega, a Bul le a Tâwp ka nih; dangchâr taphawt kuoma chun Hringna Tuikhura inthawkin a thlâwnin pêng ka tih.

⁷Hnetu taphawt chun chuong chu hluong an tih, kei an Pathien nîng ka ta, anni chu ka nauhai nîng an tih.

⁸Amiruokchu, mi dawi dâm, awinaw dâm, tirdakum dâm, tuolthat dâm, indit hmang dâm, dawithiem dâm, milim bie dâm, khêlinhlip po po dâm chan ding chu mei le kâta kâng dîla chun um a tih; chu chu thi hnina chu a nih,” a ta.

⁹Chun, berbu pasari, hremna nuhnungtak pasaria sip chawi, vântirko pasari laia pakhat chu a hung a; ama chun, “Hung ta, mo, Berâmte nuhmei chu inentir ka ti che,” tiin a mi biek a.

¹⁰Chun, ama chun Thlarauin tlâng lientak insângtakah a mifepui a, Jerusalem khaw inthieng chu, Pathien kuoma vâna inthawka hung ṭum a mîn entir a.

¹¹Pathien ropuina a nei a, a varzie chu lung mantamtak ang, jaspi lung ang el hi a na, krustal lung angin a tle a nih.

¹²Kul nasatak insângtak a nei a, kawtkhâr sâwm le pahni a nei a, kawtkhâr bulahai chun vântirko sâwm le pahni an um a, chuong kawtkhâra chun hming ziek a um bawk a, chuong chu Israel thlahai hnam sâwm le pahnihai hming chu a nih;

¹³saktieng pangah kawtkhâr pathum, hmârtieng pangah kawtkhâr pathum, simtieng pangah kawtkhâr pathum, thlangtieng pangah kawtkhâr pathum a um a.

¹⁴Chun, chu khaw kul chun lungphûm sâwm le pahni a nei a, chuonga chun Berâmte tirko sâwm le pahnihai hming a chuong a.

¹⁵Chun, a mi betu chun, khuo le kawtkhârhai le a kul chu inkhina dingin rângkachak luong a chawi a.

¹⁶Khuo chu inbiel vêlin a um a, a dungtieng chu a khangtieng chen a nih; khuo chu luong chun ân khi a, fîng sîng khat le sâng hni a nih. A dungtieng le a khangtieng le ân sângtieng chu ân ang a nih.

¹⁷Chun, a kul chu ân khi nâwk a, mihriem inkhi dân pangngaiin (chu chu vântirko inkhi dân pângngai chu a nih) tawng za khat sâwmli pali a nih.

¹⁸Chun, a kul chu jaspi lunga siem a nih, khuo chu hlimen inthieng ang ela, rângkachak inthienga siem a nih.

¹⁹Chu khaw kul lungphûmhai chu lung mantam chi tinrênga cheimawi a nih. Lungphûm hmasatak chu jaspi lung a na; a pahnina chu sapphir lung a na, a pathumna chu kalkidon lung a na; a palina chu smaragdin lung a na,

²⁰a pangana chu sardonuk lung a na, a parukna chu sardion lung a na, a pasarina chu kruso lung a na; a parietna chu birul lung a na, a pakuona chu topaz lung a na; a sâwmna chu krusopra lung a na; a sâwmpakhatna chu ngên lung a na; a sâwmpahnina chu amethusto lung a nih.

²¹Chun, kawtkhâr sâwm le pahni chu tuikeplung sâwm le pahni a ni a, kawtkhâr po po chu tuikeplung pakhat senga siem a nih; chun, chu khaw kawtthlêr chu rângkachak inthieng a nih, hlimen entlang thei ang el hi.

²²Chun, a sûnga chun biekin hrim ka hmu naw a; Lalpa Pathien Iengkimthawthei le Berâmte chu an biekin an ni si a.

²³Chu khuo chun a ên dingin nisa a ngai naw a, thla khawm a ngai bawk nawh; Pathien ropuina chun a ên a, an khâwnvar chu Berâmte a ni si a.

²⁴A vara chun hnam tin um an ta, hnuoia lalhai chun an ropuina la lût an tih.

²⁵A kawthai chu sûnah khâr naw tawp an ta, chutaka chun zân hrim a um naw ding a ni si a.

²⁶A sûnga chun hnam tin ropuina le chawimawina la lût an tih.

²⁷Nisienlakhawm, thil inthiengnaw hrim lût dêr naw ni a, thil tirdakum thawhai le khêlinhlip khawm lût naw bawk an tih; Berâmte Hringna Bua hming an ziekhai chau lût an tih.