Read Hmar THUPUONGSUO 22 Bible Online

THUPUONGSUO 22 - Hmar bible

THUPUONGSUO 22

¹Chun, ama chun, a khawlai taka, hringna tui vadung, krustal lung anga tle, Pathien le Berâmte lalṭhungphaa inthawka hung suok, a mîn entir a.

²Chun, vadung pang tuoka chun Hringna Thing, chi tum sâwm le pahnia ra, thla kipa ra, a um a; chu thing hnahai chu hnam tin sukdamna ding a nih.

³Chun, ṭawngsie hrim um nâwk ta naw ni a, Pathien le Berâmte lalṭhungpha chu um lem tâng a tih; chuongchun, a suokhai chun a rawng bâwl an ta,

⁴a hmêl hmûng an ta, a hming chu an bâwkah chuong bawk a tih.

⁵Chun, zân um nâwk ta naw ni a; khâwnvar le nisa var ngai naw ni hai a; Lalpa Pathien chun anni a ên ding a ni si a; chuongchun, chatuonin ro rêl an tih.

⁶Chun, ama chun ka kuomah, “Hieng thu hi ring a umin ân dik a nih; chuongchun, Lalpa zâwlneihai thlarau Pathien chun, thil hung tlung vak dinghai chu a suokhai kuoma inentir dingin, a vântirko a tir a nih.

⁷Chun, ngai ta, ka hung vak ding a nih,” a ta. Hi lekhabu hrillâwkna pawm taphawt chu an hamṭha.

⁸Kei Johan hieng thil po po hmutu le hretu chu ka nih. Chun, ka hrieta ka hmu chun hieng thil mîn entirtu vântirko ke bulah Pathien chibai bûka bûk dingin ka bawkkhup a.

⁹Ama chun ka kuoma, “Hienghin chu thaw naw raw khai; kei chu nangma le i unau zâwlneihai le, hi lekhabu pawmtuhai suok chanpui ka ni annâwm, Pathien chibai bûk lem rawh,” a ta.

¹⁰Chun, ama chun ka kuomah, “Hi lekhabu hrillâwkna thuhai hi ip naw; a hun chu a hung tlung ding a ni ta si a.

¹¹Mi felnaw chu sukfelnawin um zing raw se, mi inthiengnaw chu sukthiengnawin um zing raw se, mi fel chu sukfelin um zing raw se, mi inthieng chu sukthiengin um zing raw se.

¹²“Ngai ta, ka hung vak ding a nih; mi tin an thilthaw ang peia pêk dingin ka lâwmman ka kuomah a um a.

¹³Kei Alpha le Omega, a Hmasatak le a Nuhnungtak, a Bul le a Tâwp ka nih.

¹⁴Hringna Thing chunga chun thu an nei theina ding le, kawtkhâra chun khuoa an lût theina dinga an puon sâwpfaihai chu an hamṭha.

¹⁵Tuola chun, ui dâm, dawithiem dâm, indit chîng dâm, tuolthat dâm, milim bie dâm, khêl ngaina le khêlinhlip taphawthai chu um an tih.

¹⁶“Kei Isu hin kohranhai ta dingin hieng thu hi in kuomah inhriettir dingin ka vântirko chu ka hung tir a nih. David bulpui le a thla arasi vartak, sikhawvar chu ka nih,” a ta.

¹⁷Thlarau le mo chun, “Hung rawh,” an ti a. A hre taphawt chun, “Hung rawh,” ti raw se. Dangchâr taphawt hung raw se; a nuom taphawtin hringna tui hi a thlâwnin la raw se.

¹⁸Hi lekhabu hrillâwkna thu hre taphawt chu kân hriettir; tûkhawmin hieng thu hi a belsa chun, a lekhabua hremna ziekhai hi, Pathienin a chungah belsa vêng a tih;

¹⁹chun, tûkhawmin hi hrillâwkna lekhabu thua inthawka thu a lâkhmang chun hi lekhabua ziek Hringna Thing le Khaw Inthienga a chan chu Pathienin la hmang vêng a tih.

²⁰Hieng thu inhriettirtu hin, “Anih, ka hung vak ding a nih,” a tih. Amen, hung ta la, Lalpa Isu.

²¹Lalpa Isu lunginsietna chu mi inthienghai kuomah um raw se. Amen.