Read Hmar THUPUONGSUO 3 Bible Online

THUPUONGSUO 3 - Hmar bible

THUPUONGSUO 3

¹Chun Sardisa kohran tirko kuoma chun hieng hin ziek rawh: “ ‘Pathien Thlarau pasari le arasi pasari nei khan hieng thu hi a hril a nih: I thil thawziehai ka hriet, thi zing si a, hring hming i put hi.

²Invêng la, thil la um, thi vâng vânghai kha sukdet rawh; i thilthawhai hrim ka Pathien mit tlung zoin ka hmu si nawh.

³Chuongchun, i changta le i hriet ta kha hre zing rawh; chun, chu chu pawm la, sim rawh. în vêng naw chun inru angin hung ka ta, ieng hun âm ka hung phâwk ding che hre si naw ti ni a.

⁴Nisienlakhawm, Sardisa khan an puonhai sukthiengnaw naw hming tlâwmtê i nei a nih; anni chu puon vâr silin ka kuomah lêng ve hlak an tih; chuong ang thaw tlâk an ni si a.

⁵A hnetu taphawt chu chuong ang chun puon vârhai insiltir nîng a tih; chun, Hringna Bua inthawkin a hming chu thai hmang naw tawp ka tih, ka Pa hmaa le vântirkohai hmaa chun a hming chu ṭan lem ka tih.

⁶Thlarauin kohranhai kuoma thu a hril hi na nei chun hre raw se, a tih,’ tiin.

⁷“Chun, Philadelphiaa kohran tirko kuoma chun hieng hin ziek rawh: “ ‘Mi inthieng, mi indiktak, David chabi nei, tu ikhâr lo dinga hawnga, tu ihawng lo dinga khârtu khan, hieng thu hi a hril a nih:

⁸I thilthawziehai ka hriet. Ngai ta, tûkhawm ikhâr thei naw kawtkhâr hawng sa i hmaah kân umtir, thilthawtheina tlâwmtê i nei leiin: chu chu sa khawm chun ka thu i pawm a, ka hming khawm în phat naw kha.

⁹Ngai ta, Setan inkhâwmna inhai laia mi, Juda tak ni lova, khêl hrila Juda intihai laia mi chu, ka tir ding a nih, ngai ta, i ke bulah chibai hung inbûktir ka ta, ka hmangai che ti inhriettir bawk ka tih.

¹⁰Ka selna thu i pawm lei khan, hnuoia umhai fie dinga khawvêl po po chunga fiena hun hung tlung dinga inthawk chun, kei khawmin humhim ka ti che.

¹¹Ka hung vak ding a nih, tûkhawmin i lallukhum chu an lâkpêk nawna ding chein, i thil nei sa kha kawl tlat rawh.

¹²A hnetu taphawt chu ka Pathien biekina chun banah siem ka ta, chutaka inthawk chun suok ta naw ni; chun, amaa chun ka Pathien hming leh, ka Pathien khuo Jerusalem Thar, ka Pathien kuoma mi vâna inthawka hung ṭum ding hming leh, ka hming thar leh ziek ka tih.

¹³Thlarauin kohranhai kuoma thu a hril hi na nei chun hre raw se, a tih,’ tiin.

¹⁴“Chun, Laodikeia tirko kuoma chun hieng hin ziek rawh: “Amen, thuhretu ringum le indiktak, Pathien thilsiem bul khan, hieng thu hi a hril a nih;

¹⁵I thilthawziehai ka hriet, i dei chuong naw a, i lum chuong naw hi; i dei amanih, i lum amanih ka nuom a nih.

¹⁶Chuongchun, lum si lova, dei si lova, i lum dep dep leiin ka baua inthawk peisâk ka ti che.

¹⁷‘Ka hausa a, sum ka hau a, iengkhawm ka tlasam nawh,’ i ti lei le, nang mi rimsi, lungsietum, pasie, mitdel, saruok chu i ni ti în hriet naw leiin,

¹⁸i hung hausak theina dingin rângkachak meia sukthieng dâm, puon i sil theina ding le i saruok zamaw chu ân lang nawna dingin puon vâr dâm, i hmu theina dingin i mita i nâl ding mitna hlo dâm ka kuoma inchaw dingin ka ngên che.

¹⁹Ka hmangai taphawt chu ka kâwkin ka thunun hlak; chuongchun, ṭhahnem ngai la sim rawh.

²⁰Ngai ta, kawtkhâr bula ngîrin ka nawk hi; tûkhawmin ka rawl hrea kawt a hawng chun a kuomah lût ka ta, a kuomah zânbu fâng ka ta, ama khawmin ka kuomah fa bawk a tih.

²¹A hnetu taphawt chu ka lalṭhungphaah ka kuomah inṭhungtir ka tih; kei khawmin ka hne a, ka pa kuomah lalṭhungphaa ka ṭhung ang khan.

²²Thlarauin kohranhai kuoma thu a hril hi na nei chun hre raw se, a tih,” a ti a.