Read Hmar THUPUONGSUO 4 Bible Online

THUPUONGSUO 4 - Hmar bible

THUPUONGSUO 4

¹Chuong thil hnunga chun ka hang en a, chun, ngai ta, vânah kawtkhâr inhawng ka hmu a; chun, rawl ka hriet hmasak, tawtawrâwt ri anga mi bie khan, “Hitaka hin hung rawh, chuongchun, tuta hnunga thil hung um dinghai inentir ka ti che,” a ta.

²Chun, kârlovin Thlarauin ka lo um nghâl ta a; chun, ngai ta, vânah lalṭhungpha a lo inṭhut a, chu ṭhungphaa chun mi pakhat a lo ṭhung bawk a.

³Chu a ṭhung chu jaspi le sardion lung ang elin ân lang a; chun, lalṭhungpha vêla chun sumrisâng, ena smaragdin lung ang, ân zâm a.

⁴Lalṭhungpha vêla chun lalṭhungpha sâwmhni le pali a um a; chun lalṭhungphahaia chun upa sâwmhni le pali puon vâr sila ṭhung ka hmu a, rângkachak lallukhumhai an khum a.

⁵Lalṭhungphaa inthawk chun kâwlinlep dâm, rawl dâm, vâninrûm dâm a hung suok dur dur a. Chun, meiser pasari lalṭhungpha hmaa chun a chawk a, chuong chu Pathien thlarau pasari kha an nih.

⁶Chun, lalṭhungpha hmaa chun hlimen ang el tuipui, krustal lung ang el a um a. Lalṭhungpha vêla le a sîr tinah chun thilhring pali, hnungtieng le hmatieng mita sip an um a.

⁷Thilhring pakhatna chu sakeibaknei ang a na, thilhring pahnina chu sebâwngte ang a na, thilhring pathumna chun mihriem hmêl ang a put a, thilhring palina chu mupui vuong lai ang a nih.

⁸Chun, thilhring pali chu thla paruk seng nei, an pumin an sûng tieng chena mita sip an nih. “Lalpa Pathien Iengkimthawthei, Um ta le, um zing le hung um ding chu, Ân thieng ie, ân thieng ie, ân thieng ie,” tiin sûn le zân an châwl ngai nawh.

⁹Chun, thilhringhai chun lalṭhungphaa ṭhung chatuona hring zing chu an sukropuia, an chawimawia, lâwmthu an hril po leh,

¹⁰upa sâwmhni le pali hai chu lalṭhungphaa ṭhung hmaa chun an bawkkhup a, chatuona hring zing chu chibai an bûk a, an lallukhumhai chu lalṭhungpha hmaa chun an sie a,

¹¹“Nang kan Lalpa le kan Pathien, Ropuina dâm, chawimawina dâm, thilthawtheina dâm chu Hmu tlâk i nih ie, Nangin iengkim i siem a, I dit leia um le siem An ni bawk si a,” tiin.