Read Hmar THUPUONGSUO 6 Bible Online

THUPUONGSUO 6 - Hmar bible

THUPUONGSUO 6

¹Chun, Berâmte chun inchikna pasari laia pakhat chu a sût lai ka hmu a; chun, thilhring palihai laia pakhat chun, vâninrûm ang elin, “Hung rawh,” a ti ka hriet a,

²Chuongchun, ka hang en a, chun, ngai ta, sakawr vâr ka hmu a; a chunga chuong chun thalngul a chawi a; chun, a kuoma chun lallukhum an pêk a; chun, hne pum le hne pei dingin a suok ta a.

³Chun, inchikna pahnina chu a hang sût phingleh, thilhring pahnina chun, “Hung rawh,” a ti ka hriet a.

⁴Chuongchun, sakawr dang, a sen mi, a hung suok nâwk a; a chunga chuong kuoma chun hnuoia inthawka inremna lâkpêk theina le, mi inthattir theina an pêk a; chun, a kuomah kâwlhnâm lientak an pêk bawk a.

⁵Chun, inchikna pathumna chu a hang sût phingleh, thilhring pathumna chun, “Hung rawh,” a ti ka hriet a. Chuongchun, ka hang en a, chun, ngai ta, sakawr dum ka hmu a; a chunga chuong chun bûkna a chawi a.

⁶Chun, thilhring palihai laia inthawk chun râwl âwmtak hin, “Duliin[2] bupui[3] tekhâwng khat, duliin buṭei[4] tekhâwng[5] thum, hriek le uoiin ruok chu sukse naw,” a ti ka hriet a.

⁷Chun, inchikna palina chu a hang sût phingleh, thilhring palina rawl chun, “Hung rawh,” a ti ka hriet a.

⁸Chuongchun, ka hang en a, chun, ngai ta, sakawr dâng ka hmu a; a chunga chuong hming chu Thina a na; chun, Mithi Khuoin a hung zui a. Chun, kâwlhnâm dâm, ṭâm dâm, hri dâm, hnuoia sahrânghaia sukhlum dingin chuonghai kuoma chun hnuoi hmun lia ṭhea hmunkhat chunga thuneina pêk a nih.

⁹Chun, inchikna pangana chu a hang sût phingleh, maichâm hnuoia Pathien thu lei le an pawm inhriettirna thu leia thathai thlarau chu ka hmu a;

¹⁰anni chun rawl inringtakin, “Aw Lalpa, mi inthieng le indiktak, ieng chen am rorêl lova hnuoia umhai chunga kan thisen insuona phuba chu la lova i um ding?” tiin an khêk a.

¹¹Chun, an kuoma chun puon vâr an pêk seng a; chun, an suok chanpuihai le an unauhai, anni ang bawka that dinghai khawm chu an kim hmakhat chun an la châwl hri ding a nih ti an hril a.

¹²Chun, inchikna parukna chu a hang sût lai ka en zing a, chun, simkhawleihnuoi nasatakin a hung inhnîng a; chun, nisa chu sahmul saiip puon angin a hung dum a, thla khawm chu a pumin thisen angin a hung um ta a.

¹³Chun, vâna arasihai chu, theichang kûng thlipuiin a nuoi a, a selhai a ṭil ang elin hnuoiah an tla ta a.

¹⁴Vân chu lekhabu zuolmi zuola ân hmang angin, ân hmang ta a; tlâng le thlierkâr tinrêng chu an umnaa inthawkin sawnin an um ta a.

¹⁵Chun, hnuoia lal dâm, mi lien dâm, sipai hotu tak dâm, mi hausa dâm, mi hrât dâm, suok le suok naw tinrênghai chu pûka le tlânga lungpuihaia chun an inbih a.

¹⁶Tlânghai le lungpuihai kuoma chun, “Mi del unla, lalṭhungphaa ṭhung hmêla inthawk le, Berâmte lunginsennaa inthawk hin mi hlie ro;

¹⁷an lunginsenna ni ropuitak chu a hung tlung ta hi; chuongchun, tu am ngîr thei an ta?” an ti a.