Read Hmar THUPUONGSUO 7 Bible Online

THUPUONGSUO 7 - Hmar bible

THUPUONGSUO 7

¹Chu hnunga chun khawmuola le tuipuia le, thing hrim hrima chun thli hrim a hrâng nawna dingin, hnuoi thli pali chu chelin hnuoi kil lia ngîr vântirko pali ka hmu a.

²Chun, vântirko dang, Pathien hring inchikna chawi, nisa suoknaa hang fe ka hmu bawk a; chun, ama chun vântirko pali, khawmuol le tuipui suksiet theina pêka umhai kuoma chun, rawl inringtakin,

³“Ei Pathien suokhai chu an chala kan inchik hmakhat chu khawmuol le tuipui le, thinghai chu sukse hri naw ro,” tiin a khêk a.

⁴Chun, an inchik zât chu ka lo hriet a, Israel thlahai hnam tina mi nuoi khat le sîng li le sâng li an inchik a.

⁵Juda hnama mi sîng khat le sâng hni, Reuben hnama mi sîng khat le sâng hni, Gad hnama mi sîng khat le sâng hni,

⁶Aser hnama mi sîng khat le sâng hni, Naphtali hnama mi sîng khat le sâng hni, Manasse hnama mi sîng khat le sâng hni,

⁷Simeon hnama mi sîng khat le sâng hni, Levi hnama mi sîng khat le sâng hni, Issakar hnama mi sîng khat le sâng hni,

⁸Zebulun hnama mi sîng khat le sâng hni, Josef hnama mi sîng khat le sâng hni, Benjamin hnama mi sîng khat le sâng hni an inchik ta a nih.

⁹Chu hnunga chun ka hang en a, chun, ngai ta, mipui nasatak tûkhawm itiem sêng naw, hnam tin laia mi dâm, chi tin laia mi dâm, mi tin laia mi dâm, ṭawng tin laia mi dâm puon vâr sila, tûm kâu chawiin, lalṭhungpha hma le Berâmte hmaa ngîr ka hmu a;

¹⁰chuonghai chun rawl inringtakin, “Ei Pathien lalṭhungphaa ṭhung kuoma le, Berâmte kuomah sandamna,” tiin an khêk a.

¹¹Chun, vântirko po pohai chu lalṭhungpha le upahai le thilhring palihai vêla chun ngîrin an um a; chun, lalṭhungpha hmaa chun bawkkhupin.

¹²“Amen, malsâwmna dâm, ropuina dâm, varna dâm, Lâwmthu hrilna dâm, chawimawina dâm, Thilthawtheina dâm, hrâtna dâm, Chatuonin ei Pathien kuomah um raw se, Amen” tiin Pathien chibai an bûk a.

¹³Chun, upahai laia pakhat chun, ka kuomah, “Hieng silfen vâra inthuomhai hi tuhai am an na, khâwtaka inthawka hung am an ni a?” tiin a mi biek a.

¹⁴Kei chun a kuomah, “Pu, nangin i hriet annâwm,” ka ta. Ama chun ka kuomah, “Hienghai hi rinum nasataka inthawka suokhai kha an nih, an silfenhai Berâmte thisena sâwpin an sukvâr ta a.

¹⁵Chuleiin, Pathien ṭhungpha hmaah an um a nih, chun, a sûn a zânin a biekina chun a rawng an bâwl hlak a; lalṭhungphaa ṭhung chun an chungah puon in chu zâr a tih.

¹⁶An phîng ṭâm ta naw ni a, dangchâr ta bawk naw ni hai; nisain em naw ni a, lum hrim hrim khawmin sukrinum ta bawk naw nih.

¹⁷Berâmte, lalṭhungpha laia um chu an vêngtu nîng a ta, hringna tuikhurahai ṭhuoi a tih; chun, Pathienin an mita inthawk mitthli po po hrufai tâng a tih,” a ta.