Read Hmar THUPUONGSUO 8 Bible Online

THUPUONGSUO 8 - Hmar bible

THUPUONGSUO 8

¹Inchikna pasarina chu a hang sût phingleh, dâr chenve lai vân chu a dei ṭhuop a.

²Chun, vântirko pasari Pathien hmaa ngîr hlakhai chu ka hmu a; an kuomah tawtawrâwt pasari an pêk a.

³Chun, vântirko dang a hung a, rângkachak riminhnik rawna bâwm chawiin maichâm kâwla chun a ngîr ta a; lalṭhungpha hmaa rângkachak maichâm chunga mi inthienghai po po ṭawngṭainahai belsana dingin, riminhnik tamtak a kuomah an pêk a.

⁴Riminhnik raw khu chu vântirko kuta inthawk chun Pathien hmaah a hang fe ta a, mi inthienghai ṭawngṭainahai le chun.

⁵Chun, vântirko chun riminhnik rawna bâwm chu a lâk a, maichâma meiin a suksip a, hnuoiah a peithlâk ta a; chuongchun, vâninrûm dâm, rawl dâm, kâwlinlep dâm, simkhawleihnuoi inhnîng dâm, a hung um ve nghâl ta a.

⁶Chun, vântirko pasari tawtawrâwt pasari chawihai chu mût dingin an inbuotsai ta a.

⁷A hmasatak chun a hang mût a, riel le mei, thisen le inpawl, a hung um nghâl a, chu chu hnuoia pei thlâkin a um ta a; hnuoi hmun thuma ṭhea hmun khat a kâng hmang a, thinghai khawm hmun thuma ṭhea hmun khat a kâng hmang a, hlohna hring po po khawm a kâng hmang ta bawk a.

⁸Vântirko pahnina chun a hang mût a; chuongchun, tlâng lientak meia kâng lai ang tuisuorietah an pei thlâk a.

⁹Chuongchun, tuisuoriet hmun thuma ṭhea hmun khat chu thisenin a hung inchang ta a. Tuipuia thilsiem, hringna neihai chu, hmun thuma ṭhea hmun khat chu an thi ta bawk a, lawnghai khawm hmun thuma ṭhea hmun khat chu suksiet a ni ta bawk a.

¹⁰Vântirko pathumna chun a hang mût a; chuongchun, arasi lientak, meiser anga chawk, vâna inthawkin a hung tla a, vadung hmun thuma ṭhea hmun khat le tuikhurhai chu a del ta a.

¹¹Chu arasi hming chu Sairam a nih. Tui hmun thuma ṭhea hmun khat chu sairamah a hung inchang ta a; chuongchun, chu tui chu an dâwn a, mi tamtak an thi a, a hung khâk tâk leiin.

¹²Vântirko palina chun a hang mût a; chuongchun, nisa hmun thuma ṭhea hmun khat, thla hmun thuma ṭhea hmun khat, arasihai khawm hmun thuma ṭhea hmun khat chu suksiet a ni ta a; chuonghai hmun thuma ṭhea hmun khat chu ân thimna ding le, sûn chu hmun thuma ṭhea hmun khat a var nawna dingin, zân khawm chuong ang bawkin a nih.

¹³Chun, ka hang en a, mupui vânlaizâwla vuongin, rawl inringtakin, “Vantirko pathum tawtawrâwt la mût ding, chu ri la hung um dinghai lei chun hnuoia umhai chung a rik ie, a rik ie, a rik ie!” a ti ka hriet a.