Read Hmar THUPUONGSUO 9 Bible Online

THUPUONGSUO 9 - Hmar bible

THUPUONGSUO 9

¹Chun, vântirko pangana chun a hang mût a; chuongchun, arasi, vâna inthawka hnuoia tla sa ka hmu a; chun, vânsam khur chabi chu a kuomah an pêk a,

²Ama chun vânsam khur chu a hawng a; chuongchun, khura inthawk chun mei khu, rawtuina mei khu nasatak khu ang, a hung suok a; chun, khura mei lei chun nisa le boruok chu a hung inthim ta a.

³Mei khua inthawk chun khâuhai hnuoi chungah an hung suok a, hnuoia ainuvêthaiin thilthawtheina an nei ang hin, an kuomah thilthawtheina an pêk a.

⁴An chala Pathien inchikna nei naw mihriemhai chau naw chu, hnuoia hlohna dâm, thilhring hrim hrim dâm, thing hrim hrim dâm khawm suksiet naw ding ti an hril a.

⁵Chun, an kuoma chun mihriemhai chu sukhlum êm lova, thla nga sukrinum lem dingin thu an pêk a; an sukrinumzie chu ainuvêtin mi a seh a, a sukrinum ang hi a nih.

⁶Chuong nia chun mihaiin thina zawng an ta, hmu dêr si naw ni hai; thi inhâwk an ta, nisienlakhawm, thina chun tlân san a tih.

⁷Chun, khâuhai piengzie chu sakawr, indona dinga inzosa ang an nih; lallukhum ang el rângkachak ang an khum a, an hmai khawm mihriem hmai ang a nih.

⁸Nuhmei sam ang hi sam an nei a, an ha khawm chu sakeibaknei ha ang a nih.

⁹Thîr âwmphaw ang hi âwmphaw an nei a; an thla zâp ri chu indona tawlailîr ri, sakawr tamtak indo dinga tlân dur dur ri ang a nih.

¹⁰Ainuvêt mei ang mei an nei a, an meihmawrhaia chun tûr a um bawk a.Thla nga sûng mihriem suknat theina thilthawtheina an nei a.

¹¹Vânsam khur tirko chu an chunga laltakah an nei a, Hebrai ṭawngin a hming chu Abaddon[6] a nih, Grik ṭawng ruok chun a hming chu Apolluon[7] a nih.

¹²Chungrikna hmasatak chu a bo ta a, ngai ta, tuta hnung chungrikna pahni la um a tih.

¹³Chun, vântirko parukna chun a hang mût a; chuongchun, Pathien hmaa rângkachak maichâm kihaia inthawk chun rawl ka hriet a.

¹⁴Chu rawl chun vântirko parukna, tawtawrâwt chawi kuoma chun, “Euphrates vadunga vântirko pali khuophai kha sût rawh,” a ta.

¹⁵Chuongchun, chu dârkâr le ni le thla le kuma ding chun, mihriem hmun thuma ṭhea hmun khat sukhlumtu dinga buotsai tah, vântirko palihai chu an sût ta a.

¹⁶Sipai sakawr chung chuonghai chu an tam tieng sîng ruoka hmun sîng hni an nih; an tam tieng chu mi hril ka hriet a nih.

¹⁷Chun, inlârnaa chun sakawr le an chunga chuonghai chu hieng ang hin ka hmu a nih, mei le ngên le kât ang hi âwmphaw an nei a, Sakawr luhai chu sakeibaknei lu ang hi a nih, an baua inthawk chun mei le meikhu le kâthai a suok a.

¹⁸Chuong hremna pathum hai chun mihriem hmun thuma ṭhea hmun khat chu a sukhlum ta a, mei le meikhu le kât an baua inthawka suok khan.

¹⁹Sakawrhai thilthawtheina chu an baua le an meiah a ni a um chu. An meihai chu rûl ang a na, luhai a nei bawk a; chu chun a nih mi an suknat hlak chu.

²⁰Mihriem, chuong hremnaa sukhlum mahlahai chu, an kut thilthawhaia inthawk chun an sim chuong naw a. Khawhrihai le rângkachak milim dâm, tangka milim dâm, dâr milim dâm, lung milim dâm, thing milim dâm, iengkhawm hmu theilo, hre theilo le lâwn theilo dâm biek chu an ma chuong nawh.

²¹An tuolthathai khawm, an dawi hmanghai khawm, an indithai khawm, an inrûkhai khawm an sim chuong nawh.