Read Hmar 1 SAMUEL 13 Bible Online

1 SAMUEL 13 - Hmar bible

1 SAMUEL 13

¹Ro a rêl ṭan chun Saula chu kum sâwmthuma upa a na; Israelhai chungah kum hni ro a rêl a.

²Chun, Saula chun Israelhai laia mi sâng thum a thlang a, sâng hni chu Mikmasa le Bethel tlângah Saula kuomah an um a; sâng khat chu Benjamin rama Gibeaa Jonathan kuomah an um a; a dang po chu anni puon inah ân fetir vawng a.

³Chun, Jonathan chun Gebaa Philistin râl vêngtu sipaihai a thaw a, chu chu Philistin mihai chun an lo hriet a. Chuongchun, Saula chun, “Hebrai mihai khan lo hre seng raw hai seh,” tiin an ram po poah tawtawrâwt ân mûttir a.

⁴Chun, Israelhai po po chun Saula chun Philistin râl vêngtu sipaihai a thaw ti le Israelhai khawmin Philistin mihai theida an phur a nih ti an lo hriet ta a. Chuongchun, a mipuihai chu Gilgala chun Saula kuomah an pungkhâwm ta ṭeu el a.

⁵Chun, Philistin mihai chu Israelhai do ding chun an pungkhâwm ta ṭeu el a, tawlailîr sîng thum, sakawr chung chuong mi sâng ruk, sipai chu tuipui kama phaiphin zât zet an nih; chun, an hang fe a, Beth-aven saktieng panga Mikmasa chun ṭhanghmun an khuor a.

⁶Chun, Israel mihai chun hnawchêpin an um ti an inhriet chun, (mihai chu an lunginzîng ta hle el a) mihai chu pûka hai, chîmbuka hai, lungpui phêna hai, kula hai, khur sûnga hai an inbi a.

⁷Hebrai mi ṭhenkhat chu Jordan râla Gad le Gilead rama dâm an tlân a; Saula ruok chu Gilgala chun a la um zing a, mipuihai chun inthin dawr dawr pumin an zui a.

⁸Samuelin ni a ruot angin ni sari chu a nghâk a, nisienlakhawm, Samuel chu Gilgala chun a la fe ta naw rawp a; chuongchun, mipui chun an tlân dar san ta a.

⁹Chun, Saula chun, “Pumrawhmang thilinhlân ding le inremna thilinhlân dinghai chu hitakah ka kuomah hung la ro,” a ta. Chuongchun, pumrawhmang thilinhlân chu ân hlân a.

¹⁰Chun, pumrawhmang thilinhlân chu ân hlân zo chaua, ngai ta, Samuel chu a hung tlung ta a; chun, Saula chun chibai bûk dingin ama tuok dingin a fe a.

¹¹Chun, Samuel chun, “Ieng am a ni leh i lo thaw chu?” a ta. Saula chun, “Mipuihai chun an mi fe hmangsan ta a; nang hlak chu ni ruot nia chun i hung tlung ta naw a; Philistin mihai hlak chu Mikmasa chun an pungkhâwm huk tah ti ka hriet si a.

¹²Chuleiin, ‘Philistin mihai chun Gilgala hin an mi hung thaw ding a ni ṭep si a, LALPA lunginsietna hlak ka la hni si naw a,’ ka ti a. Chuleiin, pumrawhmang thilinhlân chu inhlân naw thei ka ni naw a nih,” a ta.

¹³Chun, Samuel chun Saula kuoma chun, “I thil thaw dân hi ân vêtthlâk ngawt el: LALPA i Pathien thupêk, thu a pêk che hi i zâwm naw a nih; LALPA chun Israelhai chunga în lalna hi kumkhuoa dinga sukdet tum chu a ni a.

¹⁴Nisienlakhawm, tuhin în lalna chu tâwp tâng a tih; LALPAIN thu a pêk che i zâwm naw leiin LALPA chun ama lungril ang put mi a zawng a, mihai chunga hotu ni dingin LALPAIN a ruot tah a nih,” a ta.

¹⁵Chun, Samuel chu a tho a, Gilgala inthawk chun Benjamin rama Gibea khuoa chun a hang fe a. Chun, Saula chun a kuoma mi umhai chu a tiem a, za ruk lai an na.

¹⁶Chun, Saula le a naupa Jonathan le an kuoma mi umhai chu Benjamin rama Geba khuoa chun an um a; nisienlakhawm, Philistin mihai chun Mikmasa chun ṭhanghmun an khuor a.

¹⁷Chun, râlrûk pâwlhai chu Philistin mihai ṭhanghmuna inthawkin pâwl thumin an hung suok a; pâwl khat hai chun Shual rama Ophra tieng pan lampui an hraw a,

¹⁸chun, pâwl khat chun Beth-horon tieng pan lampui an hraw a; chun, pâwl khat chun thlalêr dep Zeboim ruom tieng ngha ramri lampui chu an hraw a.

¹⁹Israel ram pumpuia chun thirsu hrim hrim an um naw a; Philistin mihai chun, “Hebrai mihai hi kâwlhnâmhai amanih, feihai amani hi siem hlau rawi an tih,” an ti a nih.

²⁰Nisienlakhawm, Israel mihai po po chu bâwngtuthlaw dâm, hmawl hmawra inbûk thîr dâm chu intâtngeitir dingin Philistin mihai kuomah an zu fe hlak a;

²¹chuong an hnuoi inletna thîr ngei le bâwng tuthlaw tâtna man chu sekel hmun thuma ṭhea hmun hni a na, an hreipui le hmawl hmawra thîr inbûk tât man chu sekel hmun thuma ṭhea hmun khat a nih.

²²Chuongchun, an indo ni chun Saula le Jonathan kuoma mi umhai chun kâwlhnâm amanih, fei amanih nei hrim hrim an um dêr naw a; Saula le a naupa Jonathan ruok chun an nei a.

²³Chun, Philistin râl vêngtu sipaihai chu Mikmas kâwna chun an suok ta a.