Read Hmar 1 SAMUEL 14 Bible Online

1 SAMUEL 14 - Hmar bible

1 SAMUEL 14

¹Ni khat chu Saula naupa Jonathan chun a râlthuom chawitu tlangvâl kuoma chun, “Hung ta, khingtieng râl Philistin mi râl vêngtu sipaihai umnaa sawn va fêng ei tih,” a ta. Nisienlakhawm, a pa chu a hril naw a.

²Saula chu Gibea ram hmawr tieng daia Migrona theibufai kûng hnuoiah a um a; a kuoma mi umhai chu za ruk amani lai an na.

³Chun, Silo khuoa thiempu Eli naupa Phinehas naupa Ikabod naupa Ahitub naupa Ahija chu thiempu zakawsîng hâkin a um ve a. Chun, Jonathan chu a fe ti mipuihai chun an hriet naw a.

⁴Jonathanin Philistin mi râl vêngtu sipaihai umnaa fe a tumna kâwn le kâwn inkâra chun a khingtieng khingtieng chun lungpui indaw a um a, pakhat hming chu Bozez a na, a pakhat hming chu Sene a nih.

⁵Lungpui indaw pakhat chu Mikmas hmârtieng panga um a na, a dang pakhat chu Geba zâwn simtieng panga um a nih.

⁶Chun, Jonathan chun, a râlthuom chawitu tlangvâl kuoma chun, “Hung rawh, sertan lo sipaihai umnaa sawn va fêng ei tih; LALPA chun thil a mi thawpêk khiet rawi mawh; LALPA ta ding chun a tam amanih, a tlâwm amania sandam chu iengkhawm a thei nawna a um chuong si naw a,” a ta.

⁷Chun, a râlthuom chawitu chun a kuomah, “I lungrila um angtak chun thaw rawh, ngai ta, i lungril angtak chu ka lungril a nih,” a ta.

⁸Chuongchun, Jonathan chun “Hung ta, an kuoma sawn va kai ei ta, vân suklang ei tih.

⁹Chun, ei kuomah, ‘In kuoma kan hung hmakhat chun la um ro,’ an mi ti chun, ei hmuna chun ngîr zing ei ta,an kuomah hang fe nâwng ei ta,

¹⁰‘Kan kuom tieng hin hung ro,’ an ti ruok chun hang fêng ei ta, LALPAIN ei kutah a mi pêk a ni tah ti inchikna ning a tih,” a ta.

¹¹Chun, an pahni chun Philistin mi râl vêngtu sipaihai hmuna chun an vân suklang a, chun, Philistin mihai chun, “En ta u, Hebrai mihai an inbîkna khursûnga inthawkin an hung suok tah,”an ta.

¹²Chun, râl vêngtu sipaihai umnaa mihai chun Jonathan le a râlthuom chawitu chu, “Hung unla, thil ieng amanih lo inentir kan ti cheu,” tiin an lo ko a. Chun, Jonathan chun a râlthuom chawitu kuoma chun, “Mi hung zui raw khai, LALPA chun anni chu Israelhai kutah a pêk tah a nih,” a ta.

¹³Chuongchun, Jonathan chu a kut le a ke hmangin a hang lâwn a, a râlthuom chawitu chun a zui a; chun, anni chu Jonathan hmaa chun an tlu ta zawt zawt a, a râlthuom chawitu chun a hung that ve pei a.

¹⁴Chuongchun, Jonathan le a râlthuom chawituin an that hmasa tak ṭum chun ṭin chenve hmun ding ang vêla hin mi sâwmhni amani lai an that a nih.

¹⁵Chun, riekhmuna mihai, phûla mi dâm, mipuihai po po chu an inthin a; chun, râl vêngtu sipaihai le râlrûkhai khawm chu an inthin ve a, chun, simkhawleihnuoi ân hning a, nasataka inthinna a um a.

¹⁶Chun, Benjamin ram Gibeaa Saula râl vêngtuhai chun an hang thlîr vêl a, ngai ta, mipuihai chu an ṭe dar hum hum a, khingtieng khingtiengah an invâk nuoi nuoi el a.

¹⁷Chuongchun, Saula chun a kuoma mipui umhai kuoma chun, “Tuhin intiem unla, tuhai hai am an na a kim naw?” a ta. Chun, an hang intiem chun ngai ta, Jonathan le a râlthuom chawitu chu an lo um ve ta naw a.

¹⁸Chun, Saula chun Ahija kuoma chun, “Pathien bâwm chu hang la raw khai,” a ti a. Chuong lai chun Pathien bâwm chu Israel mihai laia um a na.

¹⁹Chun, hieng hi a hung na, Saulân thiempu a biek zing lai dâm chun Philistin mihai riekhmun tienga buoi mur mur chu a zuol ta deu deu a; Saula chun thiempu kuoma chun, “I kut la kîr rawh,”[2] a ta.

²⁰Chuongchun, Saula le mipuihai po po chu an fe khâwm a, indonaa chun an fe ta a; chun, anni le anni kâwlhnâma lo inthaw rak a, lo buoi nuk nuk chu an hmu a.

²¹Chuongchun, chuong lai ram vêla mi riekhmuna hang fe ve, kha hma tienga Philistin mihai kuoma ṭhang Hebrai mihai khawm chu Saula le Jonathan kuoma um Israel mihai kuoma chun an hung ṭhang ve ta a.

²²Chuong ang bawkin Ephraim tlâng rama Israel mi inbihmang po pohai khawm khan Philistin mihai an tlânhmang ti an lo hriet a, anni khawm chun indonaa chun ṭhangin an hnawt zui ve ta ngat ngat a.

²³Chuongchun, LALPAIN chu ni chun Israel mihai chu a sanhim ta a, chun, Beth-aven tlung rakin an thaw a.

²⁴Chun, chu ni chun Israel mihai chu an lunginzîng a; nisienlakhawm, Saula chun, “Ka hmêlmahai chunga phuba ka lâk a, khuo a hung inhnu hmaa tukhawma bu a fâk chun ṭawngsephurin um raw se,” tiin mipui chu a vau a. Chuongchun, tukhawma bu chu intem khawm an intem dêr naw a.

²⁵Chun, mipui po pohai chun ramhnuoi an va tlung a, hnuoia chun khuoizu dâm a lo um a.

²⁶Chun, mipuiin ramhnuoi an va tlung chun khuoizu dâm a lo luong a, nisienlakhawm, tukhawma an liek nawh, mipuihai chun inkhâmna chu an ṭi a nih.

²⁷Nisienlakhawm, Jonathan chu a pa chun mipuihai chu inkhâma a vau lai a hriet ve naw a; chuongchun a hmawl chawi hmawr chu khuoithlâra chun a sunphûm a, a liek a, chuongchun, a mit meng chu a hung fie ta a.

²⁸Chuongchun, mipui laia mi pakhat chun a lo dawn a, “I pa chun mipuihai hi, ‘Vawisûna bu fa taphawt chu ṭawngsephurin um raw se,’ tiin a mi vau tlat a, mipuihai khawm an chau hle hrim a,” a ta.

²⁹Chuongchun, Jonathan chun, “Ka pa hin mihai a suklunginzing el a ni hi maw, en ta unla, khuoizu tlâwmte ka hang intem lei chauin ka mit meng a fie tâkzie hi.

³⁰Mipui hin an râllâk thil an hmu taphawt vawisûn hin an nuom nuomin fa thei hai sienla lem chu a va nasa nâwkzuol âwm de! chu lei tak chun Philistin mihai chu ei that nasa thei naw pha a ni hi,” a ta.

³¹Chuongchun, chu ni chun Mikmasa inthawkin Aijalon chenin Philistin mihai chu an do a; chun, mipuihai chu an châu hle el ta a.

³²Chuongchun, mipuihai chun an râllâk thilhai chu a bawin an baw a, berâmhai, bâwngchalhai, kêltehai an man a, hnuoia chun an sukhlum a, mipuihai chun a thisen pumin an fâk el ta a.

³³Chuongchun, “Ngai ta, mipuihai chun thisen puma fain LALPA chungah thil an suksuol tah,” tiin, Saula chu an hril a. Chun, ama chun, “Ringmawumtakin thil in thaw a nih, lung lientak mi hung inhlumpêk ro,” a ta.

³⁴Chun, Saula chun, “Mipuihai lai chun invâk dar vawng unla, an kuomah, ‘Mi tinin a sebâwng le berâm ka kuomah hung la sienla, hitaka hin hung that sienla, fa raw se, a thisen puma faa LALPA chunga thil suksuol lovin, a tih,’ va ti ro khai,” a ta. Chun, chu zân chun mi po po chun mâni bâwngchal an hung kei seng a, chutaka chun an that a.

³⁵Chun, Saula chun LALPA ta dingin mâichâm a siem a, chu chu LALPA ta dinga mâichâm siem hmasa tak a nih.

³⁶Chun, Saula chun, “Zânah Philistin mihai chu zu thaw inla, zîng khawvar chenin rawk ei tiu khai, tukhawm hla hrim hrim nâwng ei tiu,” a ta. Chun, anni chun, “Ṭha i ti ang angin thaw rawh,” an ta. Thiempu ruok chun, “Hi lai hin Pathien hnai phawt ei tiu khai,” a ta.

³⁷Chun, Saula chun Pathien a râwn a, “Philistin mihai chu ka zu thaw ding am a nih? Israelhai kutah i pêk ding am a nih?” a ta. Nisienlakhawm, chu ni chun a dawn naw a.

³⁸Chun, Saula chun, “Nangni mipui hotuhai po po kha hung hnai ta u khai, vawisûn hin a ieng tak am ei thaw suol a na ti hriet tum ei tiu khai.

³⁹Israelhai sandam hlaktu LALPA hringna sâlin ka hril a nih, ka naupa Jonathan thilthawa khawm lo ni a ni chun a thi ngei ngei ding a nih,” a ta. Nisienlakhawm, mipui laia mi chun tukhawm a dawn hrim hrim an um naw a.

⁴⁰Chuongchun, Israelhai po po kuoma chun, “Nangni hi a tumin um khâwm unla; chun, kei le ka naupa Jonathan hi a tumin um kan tih,” a ta. Chun, mipuihai chun Saula kuomah, “Ṭha i ti ang angin thaw rawh,” an ta.

⁴¹Chuongchun, Saula chun LALPA Israelhai Pathien kuoma chun, “Ân diktak chu hung suklang rawh,” a ta; chun, ṭhum vâwr chu Jonathan le Saula chunga chun a tlu a, mipuihai ruok chu an fihlim a.

⁴²Chun, Saula chun, “Kei le ka naupa Jonathan hriet ṭhena dingin ṭhum vâwr ro,” a ta.

⁴³Chuongchun, Jonathan chunga chun a tlu ta a. Chun, Saula chun Jonathan kuoma chun, “Iengam a na i thaw mi hril raw khai?” a ta. Chun, Jonathan chun a hril a, “Ka hmawl chawi hmawrin khuoizu tlâwmte chu kân tem ngei el a, ngai ta, ka thi ngei ding a nih,” a ta.

⁴⁴Chun, Saula chun, “Pathien chun a thaw thawin thaw el sienla, chu nêka nasa khawma, i thi ngei ding a nih, Jonathan,” a ta.

⁴⁵Chun, mipuihai chun Saula kuoma chun, “Israelhai laia hi sandamna ropuitak thawtu Jonathan hi a thi el ding maw? Teu lo e, LALPA hringna sâlin kan hril a nih, a sam zai khat khawm hi hnuoia tla hlek naw nih; vawisûn hin Pathien sin a thawpui a ni si a,” an ta. Chuongchun, mipui chun Jonathan chu thi lo dingin an sanhim ta a.

⁴⁶Chuongchun, Saulan Philistin mihai a hnawt chu a kîrsan ta a; chun, Philistin mihai khawm chu anni umna hmunah an fe ta a.

⁴⁷Saula chu Israelhai chunga rorêltua a hang ṭhang chun kil tina a hmêlma, Moab mihai, Ammon mihai, Edom mihai, Zoba lalhai dâm, Philistin mihai chu a do a; ân herna tienga taphawt chu a hne pei el a.

⁴⁸Huoitakin a thaw a, Amalek mihai chu a hne a, Israel mihai chu anni rawk hlaktuhai kuta inthawkin a sansuok a nih.

⁴⁹Saula naupasalhai chu Jonathan hai, Isvi hai, Malkisua hai an na, chun a naunuhmei pahnihai hming chu hieng hi a nih: a upa lem hming chu Merab a na, a naupang lem hming chu Mikal a nih.

⁵⁰Saula nuhmei hming chu Ahinoam, Ahimaaz naunu a nih. A sipai hotuhai hming chu Abner, Saula pami Nera naupa a nih.

⁵¹Kis chu Saula pa a na, chun, Abner pa Nera chu Abiel naupa a nih.

⁵²Chuongchun, Saula dam sûng po po chun Philistin mihai le hin nasatakin an indo hlak a; chun, Saula chun mi hrât amanih, mi huoi amanih a hmu taphawt chu a lâk pei hlak a nih.