Read Hmar 1 SAMUEL 17 Bible Online

1 SAMUEL 17 - Hmar bible

1 SAMUEL 17

¹Chun, Philistin mihai chun indo dingin an sipaihai an kei khâwm ṭeu el a. Judai ram sûng Soko khuoah an pungkhâwm a; Ephes-dammim hmunah Soko khuo le Azeka khuo inkâra chun ṭhanghmun an khuor a.

²Chun, Saula le Israel mihai chu an pungkhâwm a, Ela ruomah ṭhanghmun an khuor a, Philistin mihai chu lo dang dingin an inzar dar a.

³Chun, Philistin mihai chu tlâng pangah an um a, chun, Israel mihai chu khingtieng tlâng panga chun an um a, an inkâra chun ruom a um a.

⁴Chun, Philistin mihai ṭhanghmuna inthawk chun an mi hrât, Goliath, Gath khuoa mi, tawng ruk le khâp khata insâng hi a hung suok a.

⁵Dâr lukhum hi a khum a, âwmphaw a hâk a, a âwmphaw rikzie chu dâr shekel sâng nga a nih.

⁶A ngala chun dâr ngalphaw a bun a, a ruongzânga chun dâr feite a pai a.

⁷A fei ngul chu puonkawl ang hi a na, a fei lu chu thîr shekel za ruka rik a nih; chun, a phaw chawitu chu a hmaa chun a fe a.

⁸Chun, a ngîr a, Israelhai sipaihai chu a ko a, an kuomah, “Iengdinga indo dinga in hung inzar dar am a na? Kei Philistin mi, nangni Saula siehlawhai in nih a ni naw am a nih? Mi inthlang unla, ka kuomah hung thla raw se.

⁹A mi thaw thei a, a mi sukhlum chun in siehlawah um kan ta, amiruokchu, keiin ka ngam a, ka sukhlum chun kan siehlawah um in ta, kan rawngbâwl in tih,” a ta.

¹⁰Chun, Philistin mi chun, “Vawisûn hin chu Israelhai sipaihai chu ka cho a nih, mi pakhat hung thaw unla, lo inthâwng kan tih,” a ta.

¹¹Chun, Saula le Israelhai po poin chu Philistin mi thuhril an hriet chun an ṭi a, an thlaphâng ta hle a.

¹²Chun, David chu Jesai naupa a na, ama chu Bethlehem-Judaa Ephrath mi kha a na, naupasal pariet a nei a; ama chu Saula inlal lai chun tartak a ni ta a, tarsiea ngai a ni tah.

¹³Chun, Jesai naupasal upahai pathum chun indonaa chun Saula an zui a. A naupasal pathum indonaa fehai hming chu a upa tak Eliab hai, a dawttu Abinadab hai, a pathumna chu Samma hai an nih.

¹⁴Chun, David chu a naupang tak a na, chun, a upahai pathum chun Saula an zui a.

¹⁵David chu Saula kuoma inthawk- in a pa berâm enkawl dingin Bethlehema chun a va fe a va fe hlak a.

¹⁶Chun, Philistin mi chun zîngkâr le zântieng po hin a va hnai hlak a, ni sâwmli sûng zet chu a vân târlang hlak a.

¹⁷Chun, Jesai chun a naupa David kuoma chun, “Bu zeu epha khat le hi bei tlang sâwm hi chawi la, i unauhai kuomah riekhmunah va fepui vak raw khai;

¹⁸chun, nêne tui kîng tlang sâwm hi an pâwla sâng hotu chawipêk la, chun, i unauhai iengtin am an um hung indawn la, an chanchin hrietna hung phur rawh.

¹⁹Saula le anni le Israel mi po po chu Philistin mihai doin Ela ruoma chun tûn an um a nih,” a ta.

²⁰Chun, David chu zîngkâr a tho a, berâmhai chu vêngtu pakhat ân kawltir a, Jesaiin thu a pêk ang chun a chawi a, a fe ta a; chun, indona hmuna suok mêk sipaihai chu inthaw dinga an lo khêk dur dur lai takin ama chu tawlailîr umna hmun chu a va tlung a.

²¹Chun, Israel mihai le Philistin mihai chu indo ding chun an lo inzar a, sipai le sipai chu an lo inep a.

²²Chun, David chun a thuomhnaw chu thuomhnaw enkawltu kuoma chun a sie a, indona hmun tieng chun a va tlân a; a uhai chu chibai a va bûk a.

²³Chun, anni a biek lai chun, ngai ta, an mi hrât Gath khuoa Philistin mi a hming Goliath chu Philistin mihai sipai pâwl laia chu a hung suok a, a thuhril ngai bawk kha a hung hril a, chu chu David chun a lo hriet zing a.

²⁴Israel mihai po po chun ama chu an hei hmu chun an tlânsie a, an ṭi êm êm el a.

²⁵Chun, Israel mihai chun, “Kha mihriem a hung suokpa kha in hmu am? Israel mihai cho dinga hung suok a ni ngei el; tukhawm ama sukhlum taphawt chu lalin ama chu sum tiengin sukhausâng a ta; chun, a naunu pêng a ta, chun, a pa sûngkuohai chu Israelhai lai hin zalênin inumtir a tih,” an ta.

²⁶Chun, David chun a kâwla ngîrhai kuoma chun, “Hi Philistin mi hi sukhlum a, Israelhai hmingsietna sukbotu chu iengti anga thaw ding am nîng a ta? Hi sertan lo Philistin mi hi tu am a na Pathien hring sipaihai a hei cho vei chu?” a ta.

²⁷Chun, mipuihai chun hieng ang hin an dawn a, “A sukhlumtu taphawt chu kan hril anga kha thaw ding a nih,” an ta.

²⁸Chun, a u, a upa tak Eliab chun mihai kuoma a thu hril lai chu a lo hriet a: chuongchun, Eliab chu David chunga chun a lunginsen ta thut a, “Iengdinga i hung thla ve am a na? Thlalêra berâm tlâwmte um kha tu am în vêngtir leh? I chapozie le i lungril ṭhat nawzie ka hriet a nih: indo dâm en dingin i hung vei rawk a,” a ta.

²⁹Chun, David chun, “Ieng am ka thaw ta leh? A san a um a ni naw am a nih?” a ta.

³⁰Chun, ama chun mi dang kuom tieng a nghatsan a, a hril ngai bawk a hril a; chun, mipuihai chun a hmaa an dawn ang bawk khan an dawn a.

³¹Chun, David thuhril chu an hrietin Saula kuomah an hrilsâwng a; chun, ama chun a ko a.

³²Chun, David chun Saula kuomah, “Ama lei chun tu lungril khawm ṭi naw raw se; i siehlaw hin chu Philistin mi chu va thâwng ka tih,” a ta.

³³Chun, Saulân David kuomah, “Nang chu, hi Philistin mi hi thaw dingin fe thei êm naw ti nih ie, tleirâwl el i la ni si a, ama chu a tleirâwl tîra inthawka indo mi a ni si a,” a ta.

³⁴Chun, David chun Saula kuomah, “I siehlaw hin ka pa berâm ka vêng hlak a, sakeibaknei amanih, savawm amanih a hunga berâm ruol laia berâmte dâm a lâk hin,

³⁵ka hnawt a, ka thaw a, a baua inthawk chu ka sansuok hlak a nih; chun, mi thaw dinga a hung inthawk dâm hin a bakhmulah ka man a, ka thaw a, ka sukhlum hlak a nih.

³⁶I siehlaw hin sakeibaknei le savawm khawm ka sukhlum ve ve ta hlak a; chu sertan lo Philistin mi chu anni ang bawk chun um ve el a ti maw le, Pathien hring sipaihai a cho vei a,” a ta.

³⁷Chun, David chun, “Sakeibaknei kutbâwra inthawk le, savawm kutbâwra inthawka mi sansuoktu LALPA chun chu Philistin mi kuta inthawk chun mi sansuok a tih,” a ta. Chun, Saula chun David kuoma chun, “Fe raw le, i kuomah LALPA um a tih” a ta.

³⁸Chun, Saula chun David chu ama thuomin a thuom a, dâr lukhum ân khumtir a, âwmphaw ân hâktir a,

³⁹Chun, David chun thuom chunga chun a kâwlhnâm a pai a, fe a hang tum a, chuong ang chun a la thaw sin ngai si naw a. Chun, David chun Saula kuomah, “Ka fepui thei dêr âwm naw a, hieng ang hin ka la thaw sin ngai nawa a nih,” a ta. Chuongchun, David chu ân hlîp ta a.

⁴⁰Chun, a hmawl chu a chawi a, vadungtêa lung inmûm ṭhelṭhawl panga a thlang a, a berâm vêngna mansaa chun a pai a; chun, a vailungdêng chu a chawi a, Philistin mi chu a va hnai ta a.

⁴¹Chun, Philistin mi chu a hung a, David chu a hung pan hnai a; chun, phaw chawitu chu a hmaa chun a fe a.

⁴²Chun, Philistin mi chu a hang ngha vêl a, David chu a hmu chun a hmusit hle el a; sâr hlerhlawr, mit meng mawitak, tleirâwl el a ni si a.

⁴³Chun, Philistin mi chun David kuoma chun, “Ui am ka nia hmawl le dâm i mi hung pan chu le?” a ta. Chuongchun, Philistin mi chun a pathienhai sâlin David chu ṭawngsie ân phur ta a.

⁴⁴Philistin mi chun David kuomah, “Hung ta, i sahai kha ramsahai le chunglêng vatehai lo infâktir ka tih,” a ta.

⁴⁵Chuongchun, David chun Philistin mi kuoma chun, “Nang chu kawlhnâm dâm, fei dâm, phaw dâm chawiin i hung inthawk a, kei chu sipaihai LALPA Israel sipaihai LALPA i cho hmingin ka hung inthawk lem a nih.

⁴⁶Vawisûn hin LALPAIN nang hi ka kutah a mi pêk ding a nih, chun, that ka ti che a, i lu ka tanpêk ding che a nih; chun, Philistin sipaihai ruong chu vawisûn hin ramsahai le chunglêng vatehai kân fâktir ding a nih; chuongchun, hnuoi chunga mi po po hin Israelhai lai hin Pathien a um ti hre thei an tih;

⁴⁷chun, hitaka pungkhâwmhai po po hin LALPA chun kâwlhnâm le feiin a sandam nawh ti hre thei an tih; indona chu LALPA indona a ni sih a, ama chun kan kuta hin nangni hi a mi pêk ding a nih,” a ta.

⁴⁸Chun, Philistin mi chu a hung inthawka David chu thaw dinga a hung hnai chun David chu sipaihai tieng chun Philistin mi chu thaw dingin a tlân ta vat a.

⁴⁹Chun, David chun a mansa chu a hang pur a, lung a keidawk a, a vailungdêng chun a hei dêng a, Philistin mi chu a bâwk taka chun a hei dêng a, a bâwka chun lung chu a lût a, a tlu bawkkhup ta dêr el a.

⁵⁰Chuongchun, David chun Philistin mi chu vailungdêng le lungin a ngam a, Philistin mi chu a dêng a, a that ta a; David chun kâwlhnâm a chawi dêr naw a.

⁵¹Chuongchun, David chu a tlân a, Philistin mi kâwla chun a va ngîr a, a kâwlhnâm chu a lâk a, a bâwma inthawk chu a phawi a, chu chun a that a, a lu a tan ta a. Chun, Philistin mihai chun an mi hrât chu a thi ti an hriet chun an tlânse ta a.

⁵²Chun, Israel mihai le Juda mihai chu an tho a, an khêk a, Philistin mihai chu Gath chen le Ekron kul kawtkhâr chen rakin an hnawt ta a. Chun, Philistin mihai laia hliemhai chu Saaraim lampui intluonin Gath le Ekron chen chun an tlu phung el a nih.

⁵³Chun, Israel mihai chun Philistin mihai an hnawt chu an kîrsan a, an riekhmun chu an suom ta a.

⁵⁴Chun, David chun Philistin mi lu chu a lâk a, Jerusalemah a fepui a, a râlthuom ruok chu a puon inah a sie a.

⁵⁵Chun, Saulan Philistin mihai thaw dinga David a fe lai a hmu khan sipai hotu Abner kuoma chun, “Abner, hi tleirâwl hi tu nau am a na?” a ta. Chun, Abner chun, “I hringna sâlin ka hril a nih, aw lalpa, ka hriet dêr naw a,” a ta.

⁵⁶Chun, lal chun, “Hi naupang hi tu nau am a na, indawn suok raw khai,” a ta.

⁵⁷Chun, David chu Philistin mi a that a hung chu Abner chun a ṭhuoi a, Philistin mi lu chu chawi pumin Saula kuomah a fepui a.

⁵⁸Chun, Saula chun, “Tu naupa am i nih a, tlangvâl?” a ta. David chun a dawn a, “Bethlehem mi i siehlaw Jesai naupa ka nih,” tiin, a dawn a.