Read Hmar 1 SAMUEL 5 Bible Online

1 SAMUEL 5 - Hmar bible

1 SAMUEL 5

¹Chuongchun, Philistin mihai chun Pathien bâwm chu an lâk a, Ebenezera inthawk chun Asdod khuoah an fepui ta a.

²Chun, Philistin mihai chun Pathien bâwm chu an lâk a, Dagon biekna inah an lâklût a, Dagon kâwla chun an sie a.

³Chun, Asdod khuoa mihai chun a zînga zîngkâr an hang tho chun, ngai ta, LALPA bâwm hmaa chun Dagon chu a hmaia hnuoi sikin a lo tlu dêr el a. Chun, Dagon chu an lâk a, a umna hmuna chun an sie nâwk a.

⁴Chun, a zîngnâwk zîngkâr an hang tho chun, ngai ta, LALPA bâwm hmaa chun Dagon chu a hmaia hnuoi sikin a lo tlu dêr el a; Dagon lu le a kutpha bâwr khing hni bawng chu kawtkhâr bula chun a lo inhlum ngul el a; Dagon chu a taksa chau a lo um el ta a.

⁵Chu chu lei chun Dagon thiempu amanih, Dagon biekna ina hung hlakhai hrim hrim khawmin Asdod khuoa Dagon kawtkhâr bul chu tu chen khawm hin an la sir ngam naw a nih.

⁶LALPA kut chu Asdod khuoa mihai chunga chu a ril ta hle el a, sietna ân tlungtirpêk tâwl ta a, Asdod khuo le a vêl khuohai chu pânsiein a hrem tâwl bawk a.

⁷Chuongchun, Asdod khuoa mihaiin chuong ang chu a nih ti an lo hrietin, “Israelhai Pathien bâwm hi ei kuoma hin um zing da raw se ie, ei chunga le ei pathien Dagon chunga a kutthlâk a na êm el,” an ta.

⁸Chuongchun, Philistin lal po pohai chu an kuomah an ko khâwm a, “Israelhai Pathien bâwm hi iengtin am ei thaw ding a na?” an ta. Anni chun, “Israelhai Pathien bâwm chu Gath khuoah va fepui ro,” tiin an dawn a; chuongchun, Israelhai Pathien bâwm chu an va fepui ta a.

⁹Chun, chuonga an fetlungpui chun, LALPA kut chun khuo chu a hung sukbuoi ta a, khuoa mihriemhai chu a chîn a lienin a hrem a, pânse hri an chungah ân lêngtir a.

¹⁰Chuongchun, Pathien bâwm chu Ekronah an infetir a. Pathien bâwm chun Ekron a va tlung chun, Ekron khuoa mihai chu, “Israelhai Pathien bâwm chu eini le ei mihai sukhlum dingin ei kuomah an hung lâk tah,” tiin an khêk ta rak el a.

¹¹Chuongchun, Philistin lalhai po po chu an ko khâwm a, “Israelhai Pathien bâwm hi infe hmangtir unla keini le kan mihai a mi sukhlum nawna dingin a umna hmun pângngaiah fe nâwk raw se,” an ta. Khaw pumpuia chun thina khawp buoina nasatak a um a; Pathien kut chun chu khuo chu a del hle si a.

¹²A thi mahlahai khawm chu pânsiein an na tâwl a; chuongchun, chu khaw khêkri chun vân khi a hang tlung hiel a nih.