Read Hmar 1 SAMUEL 7 Bible Online

1 SAMUEL 7 - Hmar bible

1 SAMUEL 7

¹Chun, Kiriath-jearim khuoa mihai chu an zu fe a, LALPA bâwm chu an zu lâk a, tlânga Abinadab ina chun an lâklût a, a naupa Eleazar chu LALPA bâwm enkawltu dingin an suktum a.

²Chun, Kiriath-jearima bâwm a um sûng chu sâwttak a na, kum sâwmhni zet a nih; chun, Israel sûnghai po po chun LALPA chu an lunglên nâwk ta a.

³Chun, Samuel chun Israel sûnghai po po kuoma chun, “In lungril takzeta LALPA tieng hung ngha tak tak in ni chun, ram dang pathienhai le Astaroth dâm in laia chu sie hmang dai ta unla, in lungril chu LALPA ta dingin buotsai unla, ama rawng chau chu bâwl ro; chuongchun, Philistin mihai kuta inthawk hi a sansuok ding cheu a nih,” a ta.

⁴Chun Israel mihai chun Baalhai le Astarothhai chu an sie hmang a, LALPA rawng chau chu an bâwl ta a.

⁵Chun, Samuel chun, “Israel mihai po po chu Mizpaah ko khâwm vawng unla, LALPA kuomah ṭawngṭaipêk ka ti cheu,” a ta.

⁶Chuongchun, Mizpaa chun an fe khâwm ta a; chun, tui an chawi a, LALPA hmaa chun an bunthlâk a, chu ni chun bu an nghei a, chutaka chun, “LALPA chunga chun ei lo suol tah a nih,” an ta. Chun, Samuel chun Mizpaa chun Israel mihai ro a rêlpêk a.

⁷Chun, Philistin mihai chun Israel mihai Mizpaah an um khâwm ti an hriet chun Israel mihai do dingin Philistin lalhai chu an hang inthawk a. Chu chu Israel mihaiin an lo hriet chun Philistin mihai chu an lo ṭi a.

⁸Chuongchun, Israel mihai chun Samuel kuoma chun, “Philistin mihai kuta mi sandam dinga LALPA i mi kopêk chu ma naw raw khai,” an ta.

⁹Chun, Samuel chun berâmte nêne ne lai a lâk a, pumrawhmang thilinhlân dingin LALPA kuomah ân hlân a, Israel mihai ta dingin Samuel chun LALPA chu a ko a; chun, LALPA chun a hung dawn a.

¹⁰Chun, Samuelin pumrawhmang thilinhlân ân hlân lai tak chun Philistin mihai chun Israel mihai chu thaw dingin an hung hnai a, nisienlakhawm, chu ni chun LALPAIN Philistin mihai chungah vân nasatakin ân rûmtir ta dur dur el a, a sukbuoi ta a; Israel mihai hmaa chun an tlâwm ta dêr el a.

¹¹Chun, Israel mihai chu Mizpaa inthawk chun an suok a, Philistin mihai chu an hnawt a, Beth-kar hnuoi an tlung chenin an that pei a.

¹²Chuongchun, Samuel chun lung a lâk a, Mizpa le Sen inkâra chun a phun a, “Hi chen hi LALPAIN a mi ṭhangpui a nih,” tiin a hminga chun Ebenezer ân bûk a.

¹³Chuongchun, Philistin mihai chu an tlâwm ta a, Israelhai rama chun an fe nâwk ta naw a. Chun, LALPA kut chun Philistin mihai chu Samuel dam sûng po chun a tai ta zing a.

¹⁴Chun, Philistin mihaiin Israelhai khuo an lâkhai chu Ekrona inthawka Gath chenin Israel mihai an pêk kîr nâwk a, a ram chu Israel mihaiin Philistin mihai kuta inthawkin an sansuok a. Chun, Israel mihai le Amor mihai chu inremin an um a.

¹⁵Samuel chun a dam sûngin Israel mihai ro a rêl a.

¹⁶Kum tinin Bethel le Gilgal le Mizpa hi a kan vêl hlak a, chuong hmunahai chun Israel mihai ro a rêl hlak a.

¹⁷Chun, a in umna a ni leiin Rama khuoa chun a fe nâwk hlak a; chutaka chun Israel mihai ro a rêl a, chutaka chun LALPA ta dingin maichâm a siem a.