Read Hmong Njua Chivkeeb 21 Bible Online

Chivkeeb 21 - Hmong Njua bible

Chivkeeb 21

¹Tug TSWV foom koob moov rua Xalas lawv le tej lug kws nwg tau cog tseg lawm,

²Xalas txhaj xeeb tub hab yug tau ib tug tub rua Anplahaas thaus kws Anplahaas laug heev lawm. Tug tub nuav yug lawv le lub caij kws Vaajtswv teem tseg ca lawm.

³Anplahaas txhaj tis tug tub ntawd lub npe hu ua Ixaj,

⁴ces thaus Ixaj noobnyoog muaj yim nub, Anplahaas txhaj muab nwg ua kevcai txav tawv, lawv le Vaajtswv tau saamfwm tseg lawm.

⁵Anplahaas noobnyoog muaj ib puas xyoo rua thaus yug Ixaj.

⁶Xalas txhaj has tas, “Vaajtswv tau muab txujkev zoo sab hab lub ntsejmuag luag ntxhi rua kuv. Txhua tug kws nov zaaj nuav puab puavleej zoo sab nrug kuv luag.”

⁷Xalas has ntxiv tas, “Leejtwg tseem yuav has tau rua Anplahaas tas, Xalas tseem tu taug mivnyuas hab los? Txawm le ntawd los kuv tub yug tau ib tug tub rua Anplahaas thaus nwg noobnyoog laug heev lawm.”

⁸Tug tub ntawd luj hlub zoo, hab nub kws nwg tseg tau mig lawm, Anplahaas txhaj ua ib rooj noj haus luj heev.

⁹Muaj ib nub Hankas kws yog tuabneeg Iziv tug tub Yisamayees kws nwg yug rua Anplahaas, taabtom ua si nrug Xalas tug tub Ixaj.

¹⁰Xalas pum le ntawd, nwg txhaj moog has rua Anplahaas has tas, “Ca le ntab tug ntxhais qhev nuav hab nwg tug tub tsiv moog. Tsi tsimnyog ca tug quaspuj nuav tug tub tau koj tej qubtxeeg qubteg ib yaam le, tsuas yog kuv tug tub Ixaj xwb txhaj tsimnyog tau.”

¹¹Zaaj nuav ua rua Anplahaas ntxhuv sab kawg le, rua qhov Yisamayees los yog nwg tug tub ib yaam nkaus hab.

¹²Tabsis Vaajtswv has rua Anplahaas has tas, “Koj tsi xob ntxhuv sab txug tug tub hab tug ntxhais qhev Hankas nuav hlo le. Ca le ua lawv nraim le Xalas has rua koj, rua qhov koj yuav muaj xeebntxwv coob lug ntawm Ixaj lawv le kuv tau coglug tseg rua koj lawm.

¹³Kuv tseem yuav pub rua tug ntxhais qhev ntawd tug tub kuas muaj tub coob heev hab puab yuav ua tau ib tsaav tuabneeg. Nwg los yeej yog koj tug tub ib yaam nkaus.”

¹⁴Nub tom qaab thaus sawv ntxuv Anplahaas ntim zaub mov hab ib naab tawv dlej muab rua Hankas kwv sau xubpwg. Anplahaas tsaws hlo tug tub rua Hankas ris rua nrau nrausqaum hab ntab obtug tsiv tawm moog. Hankas txhaj ua ib sab moog hab ncig moog ncig lug tom taj suabpuam Npesenpas.

¹⁵Thaus dlej taag lawm, nwg txhaj muab tug mivnyuas tso pw rua huv ib koog ntoo,

¹⁶hab nwg moog nyob nrug dleb kwvyees le ib ncua neev. Nwg txawm xaav has tas, “Kuv tsi xaav saib kuv tug tub tu sav le.” Thaus nwg moog nyob ntawd, nwg txawm tsaa suab hlo quaj.

¹⁷Vaajtswv nov tug mivnyuas ntawd lub suab quaj, hab Vaajtswv tug timtswv txhaj has sau ntuj tuaj rua Hankas has tas, “Hankas, koj ntxhuv sab ua dlaabtsi? Tsi xob ntshai. Vaajtswv tub nov koj tug tub lub suab quaj lawm.

¹⁸Ca le sawv tseeg moog, hab tsaws hlo nwg puag ua tuab zoo ntxag nwg. Kuv yuav pub kuas nwg muaj xeebntxwv fuamvaam coob moog ua tau ib tsaav tuabneeg.”

¹⁹Ces tug TSWV txhaj qheb Hankas lub qhovmuag, hab nwg pum ib lub qhov tshij. Nwg txhaj moog cug dlej ntim puv nkaus rua huv lub naab tawv hab muab mivntsiv rua tug tub haus.

²⁰Vaajtswv yeej nrug nraim tug tub ntawm moog txug thaus nwg luj hlub lawm, nwg nyob huv lub taj suabpuam Palaas, hab nwg yog ib tug kws txawj tua nqaj heev.

²¹Nwg nam moog yuav tau cov tuabneeg Iziv ib tug ntxhais lug rua nwg ua quaspuj.

²²Thaus lub sijhawm ntawd Vaajntxwv Anpimelej nrug Fikaules, tug thawj kws saib nwg cov tubrog tuaj, hab has rua Anplahaas tas, “Vaajtswv yeej nrug nraim koj nyob hab paab koj ua txhua yaam huv tuabsi.

²³Yog le ntawd, kuv thov coglug tseg taabmeeg Vaajtswv has tas, koj yuav tsi dlaag kuv, kuv tej mivnyuas, lossis kuv tej xeebntxwv hlo le. Kuv tub yeej ua zoo rua koj lawm, yog le ntawd, koj yuavtsum tau coglug ua zoo rua kuv hab lub tebchaws kws koj nyob nuav.”

²⁴Anplahaas teb has tas, “Kuv txaus sab coglug le ntawd ntaag.”

²⁵Anplahaas ywg rua Anpimelej txug lub qhov tshij kws Anpimelej cov tubkhai tuaj txeeb tau lawm.

²⁶Anpimelej teb has tas, “Kuv tsi paub has tas yog leejtwg txeeb. Koj yeej tsi tau qha zaaj nuav rua kuv le, yog thawj zag kws kuv tau nov koj pav txug zaaj nuav xwb.”

²⁷Ces Anplahaas muab tug puav yaaj hab nyuj pub rua Anpimelej, ces obtug txhaj sis coglug.

²⁸Anplahaas muab xyaa tug mivnyuas yaaj cais tawm huv nwg paab tsaj,

²⁹hab Anpimelej nug has tas, “Vim le caag koj ua le ntawd?”

³⁰Anplahaas teb has tas, “Ca le txais yuav xyaa tug mivnyuas yaaj nuav moog. Qhov kws kuv ua le nuav, yog ua kuas koj nrug leeg paub has tas, kuv yog tug khawb lub qhov tshij nuav ntaag.”

³¹Yog le ntawd, txhaj hu qhov chaw ntawd ua Npesenpas, rua qhov obtug tau sis coglug rua ntawm thaaj chaw ntawd.

³²Tom qaab kws obtug coglug nyob ntawm Npesenpas taag lawm, Anpimelej hab Fikules txhaj rov qaab moog rua tebchaws Filitees lawm.

³³Ces Anplahaas txawm cog ib tsob ntoo tamalis rua ntawm thaaj chaw Npesenpas ntawd hab pehawm tug TSWV kws yog Vaajtswv tug muaj sa nyob moog ibtxhis.

³⁴Anplahaas nyob huv tebchaws Filitees tau ntev heev.