Read Hmong Njua Chivkeeb 41 Bible Online

Chivkeeb 41 - Hmong Njua bible

Chivkeeb 41

¹Tau ob xyoos txwm nkaus tom qaab ntawd, Falaus ua ib zaaj npau suav has tas, nwg sawv ntawm ntug dlej Niles,

²thaus ntawd nwg pum xyaa tug maum nyuj rog rog tawm huv dlej tuaj noj tej zaub kws nyob ntawm ntug dlej.

³Ces muaj dlua xyaa tug maum nyuj ntxaug ntxaug tshuav pobtxhaa xwb, tawm huv tug dlej Niles tuaj nrug xyaa tug maum nyuj rog rog ntawd sawv ua ke ntawm ntug dlej,

⁴ces xyaa tug maum nyuj ntxaug ntxaug ca le muab xyaa tug maum nyuj rog rog noj nqog taag huv tuabsi lawm. Ces Falaus txawm tsim dlheev lug.

⁵Nwg rov qaab tsaug zug hab ua dlua ib zaaj npau suav tas muaj ib tsob nplej txhawv tau xyaa naab, mas puv hab sav zoo kawg le.

⁶Ces muaj dlua xyaa naab nplej txhawv tuaj yog npluag xwb, rua qhov raug cov cua tom taj suabpuam tuaj ntsawj,

⁷xyaa naab nplej npluag ntawd ca le muab xyaa naab nplej puv puv noj nqog huv tuabsi lawm. Falaus txawm tsim dlheev lug, ua cav yog nwg ua npau suav xwb.

⁸Taagkig kaaj ntug Falaus ntxhuv sab heev, nwg txhaj khaiv tuabneeg moog hu cov tuabneeg kws txawj saib yaig hab tej tuabneeg txawj ntse kws nyob huv tebchaws Iziv tuaj huv tuabsi. Nwg txawm pav nwg ob zaaj npau suav ntawd rua puab noog, tabsis tsi muaj leejtwg txhais tau nwg ob zaaj npau suav ntawd le.

⁹Ces tug laub cawv maam le has rua Falaus has tas, “Tsimnyog nub nua kuv yuavtsum tau lug leeg kuv lub txim kws kuv tau ua txhum rua koj taag lug lawm.

¹⁰Falaus, koj tau chim rua tug thawj kws saib ua mov hab kuv, koj txhaj muab wb coj moog kaw rua huv tug thawj kws saib cov faajxwm lub tsev lojcuj.

¹¹Muaj ib mos wb nyag txawm ua nyag ib zaaj npau suav, hab wb ob zaaj npau suav ntawd nyag muaj nyag ntsab lug.

¹²Tug tub hluas Henplais kws raug kaw nrug wb nyob ua ke rua huv, nwg yog tug thawj kws saib cov faajxwm tug tubqhe. Wb pav wb ob zaaj npau suav rua nwg noog, hab nwg txhais tau wb ob zaaj npau suav ntawd rua wb.

¹³Mas txhua yaam txawm muaj lawv le nwg has tag: koj muab kuv tso rov lug ua kuv tej num qub, tabsis koj muab tug saib cov ua mov txav cejdlaab lawm.”

¹⁴Falaus txhaj khaiv tuabneeg moog tso Yauxej lug, hab taamsim ntawd luas txawm moog coj nwg tawm huv tsev lojcuj lug. Tom qaab kws nwg chais fwjtxwv hab hloov nwg cev rig tsho taag lawm, nwg txawm lug sawv ntawm Falaus xubndlag.

¹⁵Falaus has rua Yauxej has tas, “Kuv ua ib zaaj npau suav tabsis tsi muaj leejtwg txhais tau zaaj npau suav ntawd le. Mas kuv nov has tas, thaus koj nov luas tej ua npau suav, koj yeej muaj peevxwm txhais tau tej npau suav ntawd.”

¹⁶Yauxej teb has tas, “Falaus, kuv tsi muaj peevxwm txhais tau koj zaaj npau suav, tabsis Vaajtswv yuav pub rua kuv txhais koj zaaj npau suav rua koj.”

¹⁷Falaus has tas, “Kuv ua npau suav mas kuv sawv ntawm ntug Dlej Niles.

¹⁸Thaus ntawd muaj xyaa tug maum nyuj rog rog hab zoo nkauj heev tawm huv tug Dlej Niles tuaj noj zaub ntawm ntug dlej.

¹⁹Ces muaj dlua xyaa tug maum nyuj ntxaug ntxaug tshuav pobtxhaa xwb. Kuv yeej tsi tau pum dlua tej nyuj phem hab ntxaug le ntawd nyob huv tebchaws Iziv nuav hlo le.

²⁰Cov maum nyuj ntxaug ntxaug ntawd ca le muab cov maum nyuj rog zoo nkauj noj nqog taag,

²¹tabsis tsi muaj leejtwg yuav paub, rua qhov cov maum nyuj ntawd tseem ntxaug hab phem ib yaam le qub. Ces kuv txawm tsim dlheev lug lawm.

²²Kuv rov ua dlua ib zaaj npau suav pum ib tsob nplej txhawv tau xyaa naab nplej puv puv hab sav zoo heev.

²³Ces muaj dlua ib tsob nplej txhawv tau xyaa naab nplej npluag hab qhuav taw nreeg kws yog raug cov cua tom taj suabpuam tuaj ntsawj,

²⁴cov naab nplej npluag ca le nqog cov naab nplej puv puv hab sav zoo ntawd huv tuabsi lawm. Kuv tub pav zaaj npau suav nuav rua cov tuabneeg kws txawj saib yaig noog taag, tabsis tsi muaj leejtwg yuav txhais tau lub ntsab rua kuv le.”

²⁵Yauxej has rua Falaus has tas, “Ob zaaj npau suav nuav lub ntsab lug yog tuab yaam xwb, yog Vaajtswv qha rua koj paub txug tej xwmtxheej kws yuav muaj lug yaav tom ntej nuav.

²⁶Xyaa tug maum nyuj rog rog yog xyaa xyoo, hab xyaa naab nplej kws puv zoo nkauj los yog xyaa xyoo ib yaam nkaus hab, ob zaaj npau suav nuav puavleej yog tuab lub ntsab lug xwb.

²⁷Xyaa tug maum nyuj ntxaug ntxaug kws tawm tuaj tom qaab hab xyaa naab nplej npluag kws raug cov cua tom taj suabpuam ntsawj ntawd, yog xyaa xyoo kws yuav muaj kev tshaib nqhes heev.

²⁸Falaus, koj ob zaaj npau suav yeej muaj tseeb ib yaam le kws kuv qha rua koj nuav ntaag, Vaajtswv qha rua koj paub txug tej kws nwg yuav ua ntawd.

²⁹Xyaa xyoo sau nuav yuav muaj qoobloo ntau nplua mag thoob plawg tebchaws Iziv.

³⁰Tom qaab ntawd yuav muaj kev tshaib nqhes heev xyaa lub xyoos, hab suavdlawg yuav tsi ncu txug xyaa lub xyoo kws muaj qoobloo lawm, rua qhov txujkev tshaib nqhes yuav ua rua lub tebchaws nuav raug kev puamtsuaj.

³¹Thaus ntawd suavdlawg yuav ncu tsi txug lub sijhawm kws lub tebchaws nuav muaj qoobloo nplua mag, rua qhov muaj kev tshaib nqhes luj kawg nkaus le.

³²Tej kws koj tau ua npau suav pum ob zag ntawd txhais has tas Vaajtswv tub teem ib lub sijhawm tseg ca kuas muaj tej ntawd tshwmsim lug, Vaajtswv yuav ua kuas tej ntawd muaj lug sai sai tom ntej nuav ntaag.

³³“Nwgnuav koj ca le nrhav ib tug tuabneeg txawj ntse hab muaj tswvyim zoo, hab tsaa nwg ua tug saib lub tebchaws nuav.

³⁴Hab koj yuavtsum tau tsaa dlua ib paab numtswv moog ua cov sau suavdlawg tej qoobloo ib feem tsib ntawm xyaa lub xyoo kws muaj qoobloo ntau heev nuav lug ca.

³⁵Koj has kuas puab ca le sau tej qoobloo huv xyaa lub xyoo kws muaj qoobloo ntawd tseg ca, hab tso cai rua puab moog sau tej nplej lug ntim rua huv tej txhaab ca rua txhua lub nroog, hab tso tuabneeg zuv huv tuabsi.

³⁶Sau tej qoobloo nuav lug ca, txhaj le tau yug lub tebchaws, thaus muaj kev tshaib nqhes lug raug cov tuabneeg Iziv xyaa lub xyoo ntawd. Yuavtsum ua le nuav tsoom pejxeem txhaj tsi tuag tshaib.”

³⁷Falaus hab nwg tsoom numtswv puavleej pum zoo ua lawv le zaaj kws Yauxej has nuav,

³⁸hab Falaus has rua puab tas, “Peb yuav nrhav tsi tau ib tug tuabneeg nyob qhov twg kws muaj Vaajtswv tug ntsujplig nrug nwg nyob le Yauxej lawm.”

³⁹Falaus has rua Yauxej tas, “Vaajtswv tub qha tej nuav rua koj paub lawm, yeej tsi muaj leejtwg yuav totaub hab muaj tswvyim npaum le koj.

⁴⁰Kuv yuav tsaa koj ua tug saib taagnrho kuv lub tebchaws, hab kuv cov pejxeem yuav noog koj tej lug saamfwm. Tsuas yog ca kuv ua tug luj dlua koj xwb.

⁴¹Nwgnuav kuv tsaa koj ua tug tswj lub tebchaws Iziv.”

⁴²Falaus hle nwg ntiv nplhaib kws yog lub homthawj ntawm nwg tug ntivteg lug hab muab looj rua Yauxej tug ntivteg. Falaus muab cev rig tsho ntaub maag kws zoo heev rua Yauxej naav, hab muab txuj saw kub lug rua Yauxej coj ntawm cejdlaab.

⁴³Falaus muab nwg lub tsheb neeg kws yog lub ob rua Yauxej caij, hab Falaus cov tub faajxwm moog ua Yauxej ntej qw has tas, “Zaam kev! Zaam kev!” Falaus tsaa Yauxej ua tug kaav taagnrho lub tebchaws Iziv lawm.

⁴⁴Falaus has rua Yauxej tas, “Kuv yog Falaus, tabsis yog koj tsi tau tso cai mas cov tuabneeg kws nyob huv tebchaws Iziv nuav tsi muaj cai ua tau ib yaam dlaabtsi le.”

⁴⁵Falaus tis dlua ib lub npe tshab rua Yauxej hu ua Xefanas Paneyas hab nwg muab Pautifelas kws yog tug Povthawj kws nyob huv lub nroog Heli-aupulis, tug ntxhais Axenas rua Yauxej yuav ua quaspuj. Hab Yauxej tawm moog ncig thoob plawg tebchaws Iziv.

⁴⁶Thaus Yauxej pib ua num rua Falaus kws yog cov Iziv tug vaajntxwv, Yauxej noobnyoog muaj peb caug xyoo. Yauxej tawm huv Falaus lub loog moog ncig saib num thoob plawg tebchaws Iziv.

⁴⁷Xyaa lub xyoo kws qoobloo zoo hab ntsu heev ntawd, cov tuabneeg huv tebchaws Iziv ua tau qoobloo ntau kawg nkaus le,

⁴⁸hab Yauxej sau taagnrho tej qoobloo kws cov tuabneeg ua tau ntawm xyaa lub xyoo nyob huv tebchaws Iziv, lug khaws ca huv tuabsi rua huv tej nroog. Nwg sau tej qoob kws luas ua huv tej teb nyob ibncig lub nroog twg muab sau lug ntim ca rua huv lub nroog ntawd.

⁴⁹Yauxej sau tau tej qoob lug khaws ca ntau cuag le tej xuabzeb nraag ntug havtxwv, sau tau ntau heev nwg txhaj tsi suav has tas muaj pistsawg taw hab pistsawg taas.

⁵⁰Ua ntej xyoo kws muaj kev tshaib nqhes lug txug, Yauxej tug quaspuj kws hu ua Axenas kws yog tug povthawj Pautifelas tug ntxhais yug tau ob tug tub rua Yauxej lawm.

⁵¹Yauxej has tas, “Vaajtswv ua rua kuv tsi ncu txug kuv tej kev txomnyem hab ua rua kuv tsi ncu kuv tsev tuabneeg le lawm”; yog le ntawd nwg txhaj muab nwg tug tub hlub tis npe hu ua Manaxes.

⁵²Hab nwg tseem has tas, “Vaajtswv pub kuv muaj tubki huv lub tebchaws kws kuv muaj kev ntxhuv sab;” yog le ntawd nwg txhaj muab nwg tug tub yau tis npe hu ua Efalayees.

⁵³Xyaa lub xyoo kws suavdlawg muaj kev zoo sab rua tej qoobloo kws ntsu heev nyob huv tebchaws Iziv ntawd xaus lawm,

⁵⁴ces xyaa lub xyoo kws muaj kev tshaib nqhes txawm pib muaj tuaj, lawv le Yauxej has tseg lawm tag. Txhua lub tebchaws puavleej muaj kev tshaib nqhes, tabsis tshuav tebchaws Iziv txhaj tseem muaj mov noj xwb.

⁵⁵Thaus cov tuabneeg Iziv pib muaj kev tshaib plaab, puab tuaj quaj thov mov ntawm Falaus. Falaus kuas puab ca le moog cuag Yauxej hab ua lawv le Yauxej kuas puab ua.

⁵⁶Thaus muaj kev tshaib nqhes moog thoob lub tebchaws lawm, Yauxej txhaj qheb txhua lub txhaab nplej muag rua cov tuabneeg Iziv.

⁵⁷Tej tuabneeg nyob txhua qhov chaw thoob plawg tebchaws puavleej tuaj yuav nplej ntawm Yauxej huv tebchaws Iziv, rua qhov muaj kev tshaib nqhes thoob plawg txhua qhov chaw.