Read Hmong Njua Chivkeeb 44 Bible Online

Chivkeeb 44 - Hmong Njua bible

Chivkeeb 44

¹Yauxej has rua nwg tug tubkhai kws saib nwg lub tsev has tas, “Koj muab nplej ntim rua huv cov tuabneeg nuav tej naab kuas ntau txaus nkaus puab thauj moog, hab muab puab tej nyaj ntsaws nyag le rov rua huv nyag lub ncauj naab.

²Koj muab kuv lub khob nyaj ntsaws rua huv tug kwv ntxawg lub ncauj naab, ntsaws ua ke nrug nwg cov nyaj kws coj tuaj yuav nplej.” Tug tubkhai moog ua lawv nraim le Yauxej has kuas nwg ua.

³Taagkig kaaj ntug, nwg txawm tso cov tijlaug caab puab tej neeg luav sawv kev rov qaab moog tsev lawm.

⁴Puab nyavnyuas sawv kev lug tsi dleb ntawm ntug nroog, Yauxej has rua tug tubkhai kws saib nwg lub tsev has tas, “Koj ca le maaj nrooj moog caum cov tuabneeg ntawd. Thaus koj caum cuag puab lawm, koj nug puab has tas, ‘Vim le caag mej ua qhov phem pauj qhov zoo?

⁵Vim le caag mej nyag kuv tug tswv lub khob nyaj? Lub khob ntawd yog lub kws nwg naj nub haus dlej, hab yog lub kws siv saib moov. Mej tau ua txhum luj heev lawm lauj!’ ”

⁶Thaus tug tubkhai moog caum cuag puab, nwg txawm has tej lug nuav rua puab.

⁷Puab teb nwg has tas, “Tug tswv, koj has le ko, yog has txug dlaabtsi? Peb yeej tsi tau ua le nuav ib zag le.

⁸Koj tub paub lawm has tas, tej nyaj kws peb tshawb tau huv peb tej naab nplej peg tebchaws Kana-aas, peb tub nqaa rov tuaj rua mej huv tuabsi lawm. Yuav ua caag peb txhaj nyag tau nyaj lossis kub huv koj tug tswv lub tsev?

⁹Tug tswv, yog koj tseem tshawb tau lub khob ntawd ntawm peb cov nuav ib tug twg, yuavtsum muab tug ntawd tua povtseg, dlua le peb cov yuav zoo sab hlo moog ua koj qhev.”

¹⁰Nwg teb has tas, “Kuv pum zoo ua le mej has ko ntaag, tabsis tug kws tau muab lub khob lawm txhaj yuav moog ua qhev xwb; mej cov kws tsi tau muab, mej ca le moog tsev kaaj sab lug.”

¹¹Yog le ntawd, puab txhaj maaj nrooj tsaws puab tej naab rua huv aav, hab puab nyag dlaws nyag lub ncauj naab.

¹²Yauxej tug tubkhai ua tuab zoo tshawb, pib tshawb ntawm tug tijlaug hlub lub naab lug txug rua ntawm tug kwv ntxawg lub naab txhaj tshawb tau lub khob nyob huv Npeenyamees lub naab.

¹³Cov tijlaug txhaj dlua rhe puab tej tsho povtseg tu sab heev, puab tsaws nraa rua puab tej neeg luav thauj hab rov lug rua huv nroog.

¹⁴Thaus Yudas hab nwg cov kwvtij rov lug txug huv Yauxej tsev, Yauxej tseem nyob huv. Puab txhus caug ndlua rua huv aav pe Yauxej,

¹⁵Yauxej has rua puab tas, “Ua caag mej laam ua le ko? Mej tsi paub has tas tug tuabneeg kws zoo le kuv nuav, muaj peevxwm paub tej xwmtxheej kws yuav muaj lug yaav tom hauv ntej nua los?”

¹⁶Yudas teb has tas, “Tug tswv, peb yuav teb le caag rua koj? Peb yuav ua le caag tawv dlhau koj? Peb yuav ua le caag has tau tas peb tsi muaj txim? Vaajtswv tsi npog peb lub txim le lawm. Tsi yog tug kws luas tshawb tau koj lub khob huv nwg lub naab txhaj ua koj qhev xwb, tabsis taagnrho peb suavdlawg yuav ua koj qhev.”

¹⁷Yauxej teb has tas, “Tsi yog le ntawd! Kuv tsi ua le mej has ko! Tsuas yog tug kws muab kuv lub khob lawm txhaj yuav tau ua kuv tug qhev xwb. Dlua le mej cov yuav tau rov moog tsev kaaj sab lug hab moog has qha rua mej txiv.”

¹⁸Yudas txawm moog cuag Yauxej hab thov has tas, “Tug tswv, thov koj pub kuv nrug koj thaam ob peb lus. Thov koj tsi xob chim rua kuv, koj yeej zoo ib yaam le Falaus lawm ntaag.

¹⁹Tug tswv, koj nug peb has tas, ‘Mej txiv puas tseem nyob lossis mej puas tshuav kwv lawm hab?’

²⁰Peb teb koj has tas, ‘Peb txiv tseem nyob, nwg tub laug heev lawm hab peb tshuav ib tug kwv ntxawg kws yug rua thaus peb txiv tub laug heev lawm. Tug tub nuav tug tijlaug tuag lawm, hab nwg nam tshuav tuab tug tub ntawd txhaj tseem ua neej nyob xwb, mas nwg txiv hlub nwg kawg le.’

²¹Tug tswv, koj has kuas peb coj nwg tuaj ntawm nuav, rua qhov koj xaav pum nwg,

²²hab peb tub teb rua koj has tas, tug tub ntawd txiv tso tsi taug nwg tseg le, yog nwg tso leej txiv tseg, ces nwg txiv yeej yuav tuag xwb.

²³Ces koj has tas, ‘Yog mej tsi coj mej tug kwv ntxawg nrug mej tuaj, ces mej yuav tsi pum kuv ntsejmuag ib zag ntxiv le lawm.’

²⁴“Thaus peb rov qaab moog txug peb txiv, peb muab koj tej lug ntawd pav huv tuabsi rua nwg noog.

²⁵Ces nwg kuas peb rov tuaj hab yuav mivntsiv mov moog noj.

²⁶Peb teb nwg has tas, ‘Peb tsi kaam moog lawm, yog peb tsi coj peb tug kwv ntxawg nrug peb moog, peb yuav tsi muaj cuabkaav moog tshwm ntsejmuag rua tug nom nraag pum peb ntxiv lawm. Yog peb tug kwv ntxawg nrug peb moog mas peb txhaj kaam rov moog.’

²⁷Peb txiv has rua peb tas, ‘Mej tub paub lawm has tas Laxees kws yog kuv tug quaspuj yug tau ob tug tub nua rua kuv xwb.

²⁸Ob tug tub nuav muaj ib tug tub ncaim kuv lawm. Kuv xaav has tas tsuv tub tum nwg hab muab dlua ndluag ua tej dlaim taag, rua qhov txij thaus ntawd lug kuv yeej tsi pum nwg le lawm.

²⁹Yog nwgnuav mej tseem coj tug nuav ncaim kuv moog hab tseem muaj xwm lug raug nwg, mas ntshai tej kev quaj ntsuag kws mej tau ua rua kuv ntawd, yuav txuv kuv tug laug txujsa le lauj.’ ”

³⁰Yudas has ntxiv tas, “Tug tswv, yog kuv tsi coj tug tub nuav nrug kuv rov qaab, thaus kuv moog txug tsev, kuv txiv tsi pum tug tub nuav nrug kuv rov qaab, ces nwg yeej yuav npu paa tuag. Nwg muab nwg txujsa cog nkaus rua nwg tug tub nuav xwb,

³¹hab nwg tub laug heev lawm, ces nyob tsaam tej kev quaj ntsuag kws peb ua rua nwgnuav yuav txuv nwg txujsa.

³²Tsi taag le nuav xwb, kuv tseem tau coglug muab kuv txujsa pauv tug tub nuav rua kuv txiv hab. Kuv coglug rua nwg lawm, yog has tas kuv tseem tsi coj tug tub nuav rov moog rua nwg, ces kuv yog tug ris lub txim nuav moog taag kuv simneej.

³³Tug tswv, thov koj tso tug tub nuav nrug cov tijlaug rov moog tsev, ca kuv nrug koj nyob ua koj qhev hloov tug tub nuav chaw.

³⁴Yog tsi tau tug tub nuav nrug kuv rov moog tsev, kuv yuav ua le caag muaj cuabkaav rov moog cuag tau kuv txiv? Kuv tsi xaav pum txujkev puamtsuaj nuav lug raug kuv txiv le.”