Read Hmong Njua Chivkeeb 49 Bible Online

Chivkeeb 49 - Hmong Njua bible

Chivkeeb 49

¹Yakhauj hu taagnrho nwg cov tub lug cuag nwg hab has rua puab tas, “Mej suavdlawg lug nyob ua ib pawg rua ntawm nuav, kuv yuav pav tej xwmtxheej kws yuav tshwm lug rua mej lub neej yaav tom ntej nuav rua mej noog:

²“Yakhauj cov tub, mej sau zog lug ua ib pawg hab noog kuv has. Ca le noog mej txiv Yixalayees tej lug ntuag.

³“Kuv tug tub hlub Lunpees, koj yog kuv lub zug hab yog kuv thawj cov roj ntshaa thaus kuv tseem hluas, yog tug kws muaj sab tawv hab muaj zug tshaaj plawg kuv cov tub huv tuabsi.

⁴Koj nyob tsi tswm ib yaam nkaus le dlej ndlaas, hab koj tsi yog tug kws tseemceeb npaum cov, rua qhov koj tau nce txaaj moog nrug kuv tug nam yau pw, hab koj ua tsi huv rua koj txiv lub txaaj lawm.

⁵“Xime-oos hab Levis yog ob tug kwvtij. Obtug siv ntaaj siv rag moog txob tau plaub tau ntug.

⁶Kuv yuav tsi koom nrug obtug saablaaj, lossis tsi koom nrug obtug ua paab ua pawg, rua qhov obtug tua tuabneeg thaus obtug chim sab, hab obtug pheej muab tej nyuj txu leeg rawg ua si.

⁷Obtug tej kev ua nruj ua tsiv yuav raug lug foom tsi zoo, rua qhov obtug tsi muaj kev hlub, hab obtug txujkev nruj tsiv txhaj raug foom tsi zoo. Kuv yuav ua kuas obtug tawg tsiv moog nyob thoob plawg lub tebchaws Yixalayees. Obtug yuav tawg tsiv moog nrug cov Yixalayees nyob sis xyaw ntsuav.

⁸“Yudas, koj cov tijlaug yuav qhuas koj, Koj yuav tuav rawv koj cov yeebncuab cejdlaab. Koj cov kwvtij yuav qhau cev hlo pe koj ntawm koj xubndlag.

⁹Yudas zoo nkaus le tug mivnyuas tsuv ntxhuav, Nwg tum tsaj noj hab rov qaab lug rua ntawm nwg lub qhov tsua, Qhau cev hlo pw xyaab leeg. Tsi muaj leeg twg muaj cuabkaav moog tsaa nwg.

¹⁰Yudas yuav tuav rawv vaajntxwv tug cwj, hab nwg cov xeebntxwv yog cov tswj teb kaav chaw moog txug thaus tug muaj fwjchim lug kaav txhua tsaav tuabneeg yuav nqaa khoom tuaj pub rua nwg, puab fwm nwg hab noog nwg lug.

¹¹Nwg muab nwg tug mivnyuas neeg luav khi kag rua ntawm tsob txiv maab, Yog tsob txiv maab kws zoo hab txi txiv ncw tshaaj plawg le, Nwg muab tej kua txiv maab kws lab cuag ntshaav lug ntxhua nwg tej khaub dluag.

¹²Nwg ob lub qhovmuag nce ntshaav lab ploog tub yog vim haus cawv txiv maab, nwg tej nav dlawb paug tub yog nwg haus kua mig.

¹³“Xenpuloos yuav nyob ntawm ntug havtxwv. Nwg saab ntug dlej yuav ua qhov chaw nreg nkoj, nwg nrim dlej nrim aav yuav dlaav moog ti nkaus lub nroog Xidoos.

¹⁴“Ixakhas yog tug neeg luav kws muaj zug heev, nwg qhau cev cug nraa.

¹⁵Tabsis nwg pum lub chaw su zoo nkauj kawg nkaus hab lub tebchaws kws nyob kaaj sab lug. Yog le ntawd, nwg txhaj cug nrausqaum tog thauj nraa hab zoo sab hlo ua num nyaav ib yaam le tug qhev.

¹⁶“Daas yuav tau ua tug thawj kaav nwg cov pejxeem. Puab yuav zoo ib yaam le lwm xeem Yixalayees hab.

¹⁷Daas yog tug naab kws nyob rawv ntawm ntug kev, tug naab muaj taug kws zuv rawv ntawm ntug kev, tog rawv tum neeg laujtaws, kuas tug tuabneeg kws caij poob dlhau plawg rua tom qaab.

¹⁸“Tug TSWV, kuv naj nub tog koj txujkev cawm dlim.

¹⁹“Khas yuav raug tej tubsaab muab hlua nplawm, Tabsis nwg yuav tig tau rov qaab lug caum tubsaab.

²⁰“Aseles tej teb yuav zoo qoobloo heev, Nwg yuav npaaj tej zaub mov kws zoo rua vaajntxwv.

²¹“Nathalis yog tug maum muaslwj kws dlha ywj sab ywj ntsws, Nwg yug tau tej tug mivnyuas muaslwj, zoo nkauj ntxim hlub heev.

²²“Yauxej yog tsob ntoo kws cog rua ntawm ntug dlej, Txi txiv ncw ceg nthuav dlauv nab dlhau tej ntsaa laajkaab rua saab nrau.

²³Nwg cov yeebncuab siv zug ntsog ntaus hab nqaa puab tej neevnti hab xub vug caum nwg qaab.

²⁴Tabsis nwg raab neevnti tseem nyob ruaj khov kho, Hab nwg ob txhais npaab muaj zug heev lug ntawm Yakhauj tug Vaajtswv lub fwjchim kws luj kawg nkaus, lug ntawm tug Tswv Yug Yaaj, hab tug tsomkwm cov Yixalayees.

²⁵Tub yog koj txiv tug Vaajtswv ua tug paab koj ntaag, Vaajtswv tug kws muaj fwjchim luj kawg nkaus, nwg foom koob moov rua koj, tso koob moov nrug naag lug sau ntuj lug, hab muaj dlej puv huv nruab tivtxwv tuaj rua sau npoo aav nuav, tau koob moov lug ntawm nam plaab hab nam mig.

²⁶Koj txiv tej koob moov muaj nqes tshaaj tej hauv roob kws ibtxwm nyob thaus u lug lawm tej koob moov, zoo dlua tej kev kaaj sab lug kws lug ntawm tej hauv roob kws nyob moog ibtxhis. Thov kuas tej koob moov nuav nyob rawv sau Yauxej taubhau, Nyob rawv sau tug kws raug cais ntawm nwg cov tijlaug moog lawm lub hauvplaj.

²⁷“Npeenyamees zoo ib yaam le tug maa kws nyaum heev. Nwg naj taagkig hab naj mo tum tau tsaj lug noj.”

²⁸Cov tuabneeg kws has taag lug sau nuav, yog kaum ob xeem Yixalayees, hab yog tej lug kws puab txiv has rua puab thaus nwg foom koob moov tseg rua puab, nwg foom koob moov kuas tsimnyog rua nwg txhua tug tub.

²⁹Yakhauj has rua nwg cov tub has tas, “Nwgnuav kuv yuav tso mej tseg moog nrug kuv cov tuabneeg kws tuag ua ntej lawm nyob. Thaus kuv tuag lawm, mej yuavtsum kwv kuv moog log nrug kuv cov yawmkoob huv lub qhov tsua kws nyob huv Efaloos kws yog tug tuabneeg Hitis thaaj teb

³⁰kws nyob huv Makhepelas ze rua ntawm Maales saab nubtuaj huv tebchaws Kana-aas. Anplahaas yuav lub qhov tsua hab thaaj teb nuav ntawm Efaloos lug ua chaw log tuag.

³¹Qhov chaw nuav yog qhov kws puab log Anplahaas hab Xalas kws yog nwg tug quaspuj; Qhov chaw nuav yog qhov chaw kws puab log Ixaj hab Lenpekas kws yog nwg tug quaspuj hab yog qhov chaw kws kuv log Le-as rua huv lawm.

³²Thaaj teb hab lub qhov tsua nuav yog yuav ntawm cov tuabneeg Hitis lug. Mej coj kuv moog log rua huv.”

³³Thaus Yakhauj qha txhua yaam rua nwg cov tub taag lawm, nwg rov qhau cev pw hab tu sav nrho lawm.