Read Hmong Njua 2 Xamuyees 12 Bible Online

2 Xamuyees 12 - Hmong Njua bible

2 Xamuyees 12

¹Tug TSWV khaiv Nathaas kws yog tug cev Vaajtswv lug moog cuag Daviv. Nathaas txhaj moog cuag Daviv hab has rua Daviv has tas, “Muaj ob tug txivneej nyob huv ib lub nroog, ib tug yog tuabneeg npluanuj, ib tug yog tuabneeg pluag.

²Tug tuabneeg npluanuj, nwg muaj nyuj muaj yaaj coob heev,

³tabsis tug tuabneeg pluag muaj ib tug mivnyuas yaaj kws nwg nyavnyuas moog yuav lug xwb. Nwg tu tug mivnyuas yaaj ntawd zoo heev, hab tug mivnyuas yaaj ntawd hlub mog nyoos nyob huv nwg tsev nrug nwg cov mivnyuas. Nwg muab nwg tej zaub mov pub rua tug mivnyuas yaaj ntawd noj, ca tug mivnyuas yaaj nrug nwg haus ib lub khob, hab nwg puag rawv tug mivnyuas yaaj rua huv nwg lub xubndlag. Tug mivnyuas yaaj ntawd zoo nkaus le nwg tug ntxhais nkauj ntxawm ntaag.

⁴Muaj ib nub, ib tug qhua txawm tuaj txug huv tug npluanuj lub tsev. Tug pluanuj tsi xaav muab nwg cov tsaj ib tug tua ua zaub rua tug qhua ntawd noj; nwg txawm moog nteg tug tuabneeg pluag tug mivnyuas yaaj lug tua ua ib rooj mov tam nwg tug qhua ntawd lawm.”

⁵Daviv chim heev rua tug tuabneeg npluanuj ntawd, Daviv has tas, “Kuv thov coglug rua tug TSWV kws muaj sa nyob has tas, tsimnyog muab tug tuabneeg kws ua le ntawd tua povtseg lawm!

⁶Yog nwg txhaav tug tuabneeg pluag npaum le caag, ca le kuas nwg them plaub npaug rov qaab, rua qhov nwg ua phem le ntawd hab tsi muaj lub sab hlub le.”

⁷Nathaas teb has tas, “Koj yog tug txivneej ntawd ntaag. Tug TSWV kws yog cov Yixalayees tug Vaajtswv has le nuav: ‘Kuv tsaa koj ua cov Yixalayees tug vaajntxwv hab kuv cawm koj dlim ntawm Xa-ules txhais teg.

⁸Kuv muab nwg lub tebchaws hab nwg cov quaspuj rua koj, kuv tsaa koj ua vaajntxwv kaav cov Yixalayees hab cov Yudas. Yog tej nuav tsi txaus koj sab, kuv tseem yuav muab ob npaug ntxiv rua koj,

⁹vim le caag koj tsi noog kuv tej lug saamfwm? Vim le caag koj yuav ua phem le nuav? Koj muab Uliyas coj moog rua luas tua huv tshaav rog; koj ca cov Amoos muab nwg tua, kuas koj txhaj tau yuav nwg tug quaspuj!

¹⁰Txij nuav moog, koj tej xeebntxwv qee leej yuav raug luas muab tua povtseg ib tam dlhau ib tam, vim koj tsi noog kuv lug hab koj yuav Uliyas tug quaspuj lawm.

¹¹Kuv coglug rua koj has tas, kuv yuav tshoov koj tsev tuabneeg ib tug sab, kuas nwg tsim teebmeem rua koj. Koj yuav pum thaus kuv muab koj cov quaspuj cais tawm ntawm koj moog hab muab cob rua lwm tug txivneej; hab nwg yuav taabmeeg nrug koj cov quaspuj pw nruab nub nrig.

¹²Koj ua txhum nraim nkoog tsi pub leejtwg paub, tabsis kuv yuav ua kuas tej nuav tshwm nruab nub nrig taabmeeg cov Yixalayees suavdlawg qhovmuag pum ntsoov.’ ”

¹³Daviv has tas, “Kuv tau ua txhum rua tug TSWV lawm tag.” Nathaas teb has tas, “Tug TSWV yuav zaam txim rua koj, koj yuav tsi tuag.

¹⁴Tabsis vim koj tau ua tej kev txhum nuav saib tsi taug tug TSWV, koj tug mivnyuas yuav tuag.”

¹⁵Ces Nathaas txawm rov moog tsev lawm. Tug TSWV ua rua tug mivnyuas kws Uliyas tug quaspuj yug rua Daviv ntawd mob nyaav heev.

¹⁶Daviv rau sab ntso thov Vaajtswv kuas tug tub ntawd zoo. Daviv tsi noj ib yaam dlaabtsi le, hab txhua mo Daviv moog huv nwg chaav pw, nwg qhau cev pw huv aav ib mos kaaj ntug le xwb.

¹⁷Daviv cov numtswv tu plaub ntug tuaj nplig Daviv sab kuas nwg sawv, tabsis nwg tsi kaam sawv hab tsi kaam nrug puab noj ib yaam dlaabtsi le.

¹⁸Xyaa nub tom qaab ntawd, tug tub ntawd txawm tuag lawm, Daviv cov numtswv ntshai hab tsi muaj cuabkaav moog qha rua Daviv paub. Puab txhaj sis thaam has tas, “Thaus tug tub ntawd tseem muaj sa, peb moog nrug Daviv thaam, nwg tub tsi teb peb le. Yuav ua le caag peb txhaj moog qha rua Daviv has tas tug mivtub ntawd tuag lawm nua? Nyob tsaam Daviv rov ua tej yaam phem rua Daviv ne.”

¹⁹Thaus Daviv nov puab ib leeg ntxhi rua ib leeg, Daviv paub has tas, tug tub ntawd tuag lawm. Yog le ntawd, nwg txhaj nug puab has tas, “Tug mivtub tuag lawm los?” Puab teb has tas, “Yog, nwg tuag lawm.”

²⁰Daviv sawv tseeg huv aav lug, dlaa dlej, ntsis plaubhau hab hloov rig tsho. Ces Daviv txawm moog pehawm Vaajtswv rua tom tug TSWV lub tsev lawm. Thaus nwg rov qaab lug rua huv lub loog, nwg txhaj taij kuas ua zaub ua mov rua nwg noj hab thaus rau tau mov, nwg txawm noj mov lawm.

²¹Daviv cov numtswv has rua Daviv has tas, “Peb tsi totaub txug zaaj nuav le, thaus tug tub tseem muaj sa, koj quaj nwg heev hab tsi kaam noj mov le; tabsis thaus nwg tuag lawm, koj sawv tseeg lug hab noj mov!”

²²Daviv teb puab has tas, “Yog tag, kuv tau yoo mov hab quaj thaus nwg tseem muaj sa nyob, rua qhov kuv xaav has tas tug TSWV yuav hlub kuv hab tsi pub kuv tug tub tuag.

²³Tabsis nwgnuav nwg tub tuag lawm kuv tseem yoo mov ua dlaabtsi? Kuv puas yuav muaj peevxwm tsaa tau tug tub ntawd sawv rov qaab lug? Muaj ib nub twg kuv yeej yuav moog rua txujkev kws nwg moog hab, tabsis nwg yuav tsi rov lug cuag kuv ib zag le lawm.”

²⁴Tom qaab ntawd, Daviv nplig Npasenpas kws yog nwg tug quaspuj sab. Daviv moog nrug Npasenpas pw, ces nwg txhaj xeeb tub hab yug tau ib tug tub, Daviv tis tug tub ntawd npe hu ua Xalumoos. Tug TSWV hlub tug tub nuav

²⁵hab has rua Nathaas kws yog tug cev Vaajtswv lug kuas moog tis tug tub ntawd npe hu ua Yedidiyas, rua qhov tug TSWV hlub nwg heev.

²⁶Thaus Yau-am moog tua lub nroog Lanpas kws yog cov Amoos lub tuamceeb nroog, hab taabtom txeeb yuav tau lub nroog ntawd.

²⁷Yau-am tso tuabneeg moog qha rua Daviv has tas, “Kuv taabtom tua lub nroog Lanpas, hab kuv tub txeeb tau lub nroog ntawd lub qhovdlej lawm.

²⁸Taamsim nuav koj ca le txhij koj cov tubrog kws seem tuaj tua lub nroog ntawd hab txeeb kuas tau rua koj. Kuv tsi xaav tau ntsejmuag qhov kws kuv txeeb tau lub nroog ntawd.”

²⁹Yog le ntawd, Daviv txhaj txhij nwg cov tubrog moog tua lub nroog Lanpas. Nwg tua yeej hab txeeb tau lub nroog ntawd.

³⁰Daviv muab lub mom kub kws nyaav xyaa caum tsib choj sau cov Amoos tug vaajtswv lub taubhau hle lug, luas muab tej hlaws muaj nqes dlhos tawg paaj paug rua lub mom ntawd. Daviv muab lub mom kub ntawd looj rua Daviv taubhau, hab nwg fuab tau khoom ntau heev huv lub nroog ntawd nqaa lug.

³¹Daviv muab kaw, muab hlau hab muab taus rua cov tuabneeg huv lub nroog ntawd hab yuam kuas puab ua num hab puab thwvcib. Daviv kuas cov tuabneeg kws nyob huv cov Amoos txhua lub nroog ua num ib yaam le ntawd. Ces Daviv hab nwg cov tubrog rov lug rua huv lub nroog Yeluxalees lawm.