Read Hmong Njua 2 Xamuyees 19 Bible Online

2 Xamuyees 19 - Hmong Njua bible

2 Xamuyees 19

¹Muaj tuabneeg moog qha rua Yau-am has tas, “Vaajntxwv Daviv quaj nyav hab nyuaj sab heev rua Axaloos.”

²Yog le nub ntawd, Daviv cov tubrog txujkev zoo sab kws tua yeej rog txhaj hloov lug ua txujkev nyuaj sab, rua qhov puab nov has tas vaajntxwv quaj nyav nwg tug tub heev.

³Puab txhaj le rov mluag mlob lug rua huv nroog, ib yaam le tej tubrog kws swb rog txaajmuag ntsuav dlha huv tshaav rog rov qaab lug.

⁴Vaajntxwv muab ntaub lug npug nwg lub ntsejmuag hab tsaa suab hlo quaj has tas, “Kuv tug mivtub, kuv tug tub Axaloos! Axaloos kuv tug mivtub!”

⁵Yau-am txhaj moog rua tom vaajntxwv tsev hab has rua vaajntxwv has tas, “Nub nua koj rhuav koj cov tuabneeg ntsejmuag. Cov tuabneeg ntawd tub yog cov kws cawm koj hab koj cov tub, cov ntxhais, cov quaspuj hab koj cov nam yau txujsa dlim ntawm txujkev puamtsuaj.

⁶Koj ntxub cov kws hlub koj hab nyam cov kws ntxub koj. Ua le koj ua nuav yeej qha has tas, koj tej numtswv hab koj cov tuabneeg tsi muaj txaj ntsig dlaabtsi rua koj le. Kuv paub has tas nub nua yog Axaloos muaj sa nyob hab peb tuag taag, mas koj yuav zoo sab heev.

⁷Nwgnuav koj ca le moog has ib lu lug nplig koj cov tuabneeg sab. Kuv thov tuav tug TSWV lub npe coglug has tas, yog koj tsi moog, pigkig sawv ntxuv, puab yuav tsi muaj ib tug nrug koj nyob le lawm. Qhov ntawd yuav ua rua koj tau kev txomnyem sab nyaav dlua tej kws koj muaj thaus koj hluas lug txug naj nub nua.”

⁸Ces vaajntxwv txhaj sawv tseeg hab moog nyob ze rua ntawm lub roojvaag nroog. Nwg cov tuabneeg nov has tas nwg tuaj nyob rua ntawd, puab txhaj lug sawv puagncig nwg. Dlhau ntawd cov Yixalayees nyag txawm rov moog nyag tsev taag lawm.

⁹Cov pejxeem nyob thoob plawg tebchaws sis caav ntsoog qeeg, ib leeg has rua ib leeg has tas, “Tub yog Vaajntxwv Daviv cawm peb dlim ntawm peb cov yeebncuab, nwg paab kuas peb dlim ntawm cov Filitees, tabsis nwgnuav nwg tsiv Axaloos hab tawm huv lub tebchaws nuav moog lawm.

¹⁰Peb tau muab roj laub rua Axaloos taubhau tsaa nwg ua peb tug vaajntxwv, tabsis nwg raug tua tuag rua huv tshaav rog lawm. Txawm yuav tsi muaj leejtwg moog coj Vaajntxwv Daviv rov qaab lug le los?”

¹¹Tej lug kws cov Yixalayees has nuav nrov nchaa moog txug rua Vaajntxwv Daviv. Nwg txhaj khaiv Xadaus hab Anpiyathas kws yog ob tug povthawj moog nug cov Yudas tej thawjcoj has tas, “Vim le caag mej txhaj yog cov kws tuaj tog vaajntxwv rov qaab lug rua huv nwg lub loog lig dlua lwm paab huv tuabsi?

¹²Mej tub yog kuv cov kwvtij, yog kuv roj kuv ntshaav ntaag. Vim le caag mej yog cov kws tuaj tog kuv lig dlua luas tej huv tuabsi?”

¹³Hab Daviv tseem kuas obtug moog has rua Amaxas has tas, “Koj yog kuv ib tug kwvtij. Txij nub nua moog kuv yuav tsaa koj ua tug thawj saib cov tubrog hloov Yau-am chaw. Yog kuv tsi ua lawv le kuv has, thov Vaajtswv tua kuv povtseg!”

¹⁴Daviv tej lug txhaj ua rua cov Yudas muab sab npuab Daviv. Puab txhaj tso tuabneeg moog has rua Daviv hab nwg cov numtswv kuas rov qaab lug.

¹⁵Thaus vaajntxwv Daviv rov lug, nwg ntsib ib cov Yudas taabtom tuaj txug ntawm tug dlej Yauladees, puab yog cov kws nyob huv lub nroog Nkilenkas puab tuaj coj nwg hlaa dlej.

¹⁶Tuab lub sijhawm ntawd, Nkelas tug tub Sime-is kws yog xeem Npeenyamees maaj nrooj huv lub nroog Npahulees tuaj cuag Vaajntxwv Daviv nraag tug dlej Yauladees.

¹⁷Nwg coj cov Npeenyamees ib txheeb leej txivneej nrug nwg tuaj. Hab Xinpas kws yog Xa-ules tsev tuabneeg tug tubkhai coj nwg kaum tsib tug tub hab neeg nkaum leej tubkhai tuaj hab, puab tuaj txug rua ntawm tug dlej Yauladees ua ntej vaajntxwv lug txug ntawd.

¹⁸Puab hlaa dlej moog rua saab tid, tog coj vaajntxwv tsev tuabneeg hlaa dlej hab ua txhua yaam kws vaajntxwv kuas puab ua. Thaus vaajntxwv taabtom sawv kev yuav hlaa dlej, Sime-is txawm txhus caug ndlua hawm vaajntxwv

¹⁹hab has tas, “Vaajntxwv, thov koj zaam txim rua tej kws kuv tau ua txhum rua koj, thaus koj tawm huv lub nroog Yeluxalees tuaj. Thov tsi xob muab zaaj ntawd lug tawmtsaam kuv lossis thov koj tsi xob xaav txug zaaj ntawd le.

²⁰Vaajntxwv, kuv yeej paub has tas, kuv tau ua txhum lawm tag, vim le nuav cov xeem kws nyob peg qaumteb, kuv txhaj yog thawj tug kws xub tuaj ntsib koj nub nua ntaag.”

²¹Xeluyas tug tub Anpisais teb has tas, “Yeej tsimnyog muab Sime-is tua povtseg, rua qhov nwg tsawm foom tug kws tug TSWV xaiv ca ua vaajntxwv lawm.”

²²Tabsis Daviv has rua Anpisais hab Anpisais tug tijlaug Yau-am has tas, “Leejtwg thov tswvyim ntawm meb? Meb tsim teebmeem rua kuv los? Nwgnuav kuv yeej yog cov Yixalayees tug vaajntxwv hab nub nua kuv yuav tsi muab cov Yixalayees ib tug twg tua povtseg le.”

²³Hab Daviv has rua Sime-is has tas, “Kuv coglug rua koj, koj yuav tsi raug tua povtseg le.”

²⁴Mefinpauses kws yog Xa-ules tug xeebntxwv tuaj cuag vaajntxwv. Nwg yeej tsi ntxuav nwg ob txhais kutaw, tsi chais nwg cov fwjtxwv lossis ntxhua nwg tej rig tsho txij thaus vaajntxwv tsiv huv Yeluxalees moog txug nub kws vaajntxwv rov yeej lub tebchaws le.

²⁵Thaus Mefinpauses tuaj peg Yeluxalees tuaj cuag vaajntxwv, vaajntxwv has rua Mefinpauses has tas, “Mefinpauses, vim le caag koj txhaj tsi nrug kuv moog?”

²⁶Mefinpauses teb has tas, “Vaajntxwv koj yeej paub has tas, kuv yog ib tug tuabneeg saav ceg. Kuv tub has rua kuv tug tubkhai kuas nwg muab eeb pem rua kuv tug neeg luav, rua kuv caij nrug koj moog, tabsis nwg ntxeev sab rua kuv lawm hab.

²⁷Nwg tuaj has tsi zoo rua koj, tabsis koj zoo nkaus le Vaajtswv tug timtswv, koj txhaj ua lawv le koj pum zoo xwb.

²⁸Taagnrho kuv txiv tsev tuabneeg yeej tsimnyog koj muab tua povtseg huv tuabsi lawm, tabsis koj pub kuv nrug koj noj koom tsum sau koj lub rooj. Vaajntxwv, kuv yeej tsi muaj cuabkaav yuav thov kuas koj hlub kuv ntxiv lawm.”

²⁹Vaajntxwv teb has tas, “Koj tsi xob has dlaabtsi ntxiv lawm. Kuv has rua koj has tas, Xinpas meb ca le moog muab Xa-ules tej qubtxeeg qubteg coj lug faib rua meb.”

³⁰Mefinpauses teb has tas, “Ca le muab rua Xinpas tuab leeg yuav xwb, qhov kws koj rov lug tsev thaajyeeb lug tub ua rua kuv zoo sab kawg le lawm.”

³¹Npaxilais yog tuabneeg Nkile-as kws nyob huv lub nroog Launkelees, nwg tuaj paab coj vaajntxwv hlaa tug Dlej Yauladees.

³²Npaxilais yog ib tug tuabneeg laug heev, nwg tub muaj yim caum xyoo lawm. Npaxilais yog ib tug tuabneeg npluanuj hab tau xaa zaub mov tuaj pub rua vaajntxwv, thaus kws vaajntxwv tseem nyob huv Mahana-ees.

³³Vaajntxwv has rua Npaxilais has tas, “Koj ca le nrug kuv moog nyob huv lub nroog Yeluxalees, kuv yuav ua tug saib koj moog le.”

³⁴Tabsis Npaxilais teb has tas, “Kuv yuav nyob tsi ntev lawm, kuv yuav ua le caag nrug koj moog nyob tau huv lub nroog Yeluxalees?

³⁵Kuv tub muaj yim caum xyoo lawm, hab tsi muaj ib yaam dlaabtsi yuav ua rua kuv zoo ntxiv lawm. Kuv noj mov hab haus dlej los kuv tub tsi nov qaab, txawm yog luas tej suab hu nkauj los kuv tub tsi nov. Ntshai kuv tsuas muaj yuav ua kev nyuaj sab rua vaajntxwv kws yog kuv tug tswv lawm xwb.

³⁶Tsi tsimnyog kuv moog txais yuav tej nqe zug kws tseemceeb ntawd le. Ca kuv nrug koj moog kuas dlhau tug dlej Yauladees rua saab tid xwb.

³⁷Ca kuv rov qaab moog tsev hab moog tuag ze kuv nam kuv txiv tej toj ntxaas. Vaajntxwv, ntawm nuav yog kuv tug tub Khihas, nwg yuav yog tug tu koj. ca le coj nwg nrug koj moog hab koj xaav paab nwg le caag los koj ca le paab nwg lawv le koj pum zoo.”

³⁸Vaajntxwv teb has tas, “Kuv yuav coj nwg nrug kuv moog hab kuv yuav paab nwg txhua yaam lawv le koj xaav kuas kuv paab. Hab kuv yuav paab koj txhua yaam kws koj thov kuv paab.”

³⁹Daviv hab nwg cov tuabneeg txawm hlaa tug dlej Yauladees lug lawm. Daviv txhaj nwj Npaxilais hab foom koob moov rua Npaxilais, ces nwg txawm rov moog tsev lawm.

⁴⁰Thaus vaajntxwv hlaa dlej, mas yog cov Yudas hab cov Yixalayees ib nraab tuaj paab coj nwg hlaa. Vaajntxwv moog rua huv lub nroog Nkilenkas hab lub nroog Khihas los puab puavleej nrug nwg moog hab.

⁴¹Ces cov Yixalayees txawm moog cuag vaajntxwv hab has rua nwg tas, “Vaajntxwv, vim le caag peb cov kwvtij kws yog cov Yudas, puab xaav has tas, puab txhaj yog cov kws tsimnyog tuaj tog koj hab paab xaa koj, koj tsev tuabneeg hab koj cov tuabneeg hlaa tug dlej Yauladees xwb?”

⁴²Cov Yudas teb has tas, “Peb ua le ntawd, rua qhov vaajntxwv yog peb tuab xeem. Vim le caag qhov nyuas nuav tseem yuav ua rua mej chim hab? Nwg yeej tsi muab zaub mov lug them lossis nwg yeej tsi tau muab ib yaam dlaabtsi rua peb le los sas!”

⁴³Cov Yixalayees teb has tas, “Txawm yog Vaajntxwv Daviv yog mej tuab xeem los peb yeej muaj tug nyob huv nwg ntau tshaaj mej kaum npaug! Vim le caag mej yuav saib peb tsi muaj nqes le? Mej puas ncu has tas, peb yog thawj cov kws xub has kuas moog tog vaajntxwv rov qaab lug!?” Tabsis cov Yudas tseem hajyam ntxeev lug luj tshaaj cov Yixalayees hab.