Read Hmong Njua 2 Xamuyees 2 Bible Online

2 Xamuyees 2 - Hmong Njua bible

2 Xamuyees 2

¹Tom qaab ntawd, Daviv nug tug TSWV has tas, “Puas tsimnyog kuv moog kaav cov Yudas tej nroog ib lub?” Tug TSWV teb has tas, “Koj ca le moog!” Daviv rov nug has tas, “Lub nroog twg?” Tug TSWV teb has tas, “Lub nroog Henploos.”

²Yog le ntawd Daviv txhaj moog rua nraag lub nroog Henploos, nwg coj nwg ob tug quaspuj kws yog: Ahinau-as kws nwg yuav huv lub nroog Yexelees lug hab Anpinkayis, Nanpaas tug quaspuj kws nwg yuav huv lub nroog Kalemees los nrug nwg moog hab.

³Nwg tseem coj nwg cov tuabneeg hab puab tej quaspuj mivnyuas nrug nwg moog hab nyob thoob plawg tej zog kws nyob puagncig lub nroog Henploos.

⁴Ces cov Yudas txhaj tuaj rua huv lub nroog Henploos hab muab Daviv txhawb meejthawj ua vaajntxwv kaav cov Yudas. Thaus Daviv nov has tas, cov tuabneeg huv lub nroog Yanpes huv xeev Nkile-as tau muab Xa-ules coj moog log lawm,

⁵nwg txhaj khaiv tuabneeg moog fi xuv rua puab has tas, “Thov tug TSWV foom koob moov rua mej, rua qhov mej fwm mej tug vaajntxwv hab coj nwg moog log lawm.

⁶Txij nub nua moog thov tug TSWV ua sab dlawb sab zoo hab ua ncaaj rua mej. Kuv los yuav ua zoo rua mej vim tej kws mej tau ua taag lug lawm.

⁷Ca le cuab zug hab ua sab tawv qhawv! Mej tug Vaajntxwv Xa-ules tuag, los cov Yudas muab kuv txhawb meejthawj hab tsaa kuv ua puab tug vaajntxwv lawm.”

⁸Xa-ules ib tug thawj tubrog kws yog Neles tug tub Aneles, tau tsiv nrug Xa-ules tug tub Isenpauses hlaa tug dlej Yauladees moog rua tim Mahana-ees,

⁹ces Aneles txawm muab Isenpauses tsaa ua vaajntxwv kaav lub xeev Nkile-as, hab kaav cov Aseles, cov Yexelees, cov Efalayees hab cov Npeenyamees, hab kaav taagnrho cov Yixalayees.

¹⁰Nwg muaj plaub caug xyoo rua thaus kws nwg ua cov Yixalayees tug vaajntxwv, hab nwg kaav tau ob xyoos. Tabsis xeem Yudas yeej ibtxwm fwm Daviv xwb,

¹¹Daviv nyob huv lub nroog Henploos kaav cov Yudas tau xyaa xyoo hab rau hli.

¹²Aneles hab Isenpauses cov numtswv rov qaab huv lub nroog Mahana-ees lug rua huv lub nroog Nkinpe-oos.

¹³Xeluyas kws yog Yau-am nam hab Daviv cov numtswv moog ntsib puab ntawm lub paag dlej. Taagnrho puab puavleej moog nyob ntawm lub paag dlej ntawd, ib paab nyob saab paag dlej tim nuav hab ib paab nyob saab paag dlej tim u.

¹⁴Aneles txawm has rua Yau-am has tas, “Ca peb cov tub hluas kws nyob ob saab nuav sis tua rua peb saib.” Yau-am teb has tas, “Tau kawg los mas!”

¹⁵Yog le ntawd, kaum ob leeg txivneej txhaj ua cov sawv cev ntawm Isenpauses hab xeem Npeenyamees, tuaj tua Daviv cov tuabneeg kaum ob leeg.

¹⁶Puab txhua tug nyag tuav nyag tug yeebncuab lub taubhau hab nyag rhu nyag raab ntaaj lug nkaug nyag tug yeebncuab saab taav. Yog le ntawd, taagnrho puab neeg nkaum plaub leeg ntawd txhaj tuag ua ib pawg rua qhov ntawd. Vim le ntawd, txhaj le muab thaaj chaw huv lub nroog Nkinpe-oos ntawd tis npe hu ua “Lub Taj Nraag Ntaaj.”

¹⁷Thaus ntawd txawm muaj kev sis tua nyaav, ces Aneles hab cov Yixalayees txhaj le swb Daviv cov tuabneeg.

¹⁸Xeluyas peb tug tub: Yau-am, Anpisais hab Axahees los puavleej nyob ntawd huv tuabsi. Axahees dlha ceev npaum nkaus le muaslwj,

¹⁹nwg txhaj dlha moog caum nteg Aneles, nwg dlha ncaaj nraim moog rua ntawm Aneles.

²⁰Aneles tig saib rov tom qaab hab has rua Axahees has tas, “Yog koj los Axahees?” Axahees teb has tas, “Yog los mas!”

²¹Aneles has tas, “Tsi xob caum nteg kuv! Ca le moog caum cov tubrog nuav ib tug qaab hab txeeb kuas tau tej kws nwg muaj.” Tabsis Axahees rau sab ntso caum Aneles nteg xwb.

²²Aneles rov has rua Axahees has tas, “Thov tsi xob caum nteg kuv! Vim le caag koj pheej ua kuas kuv tua koj povtseg? Kuv yuav ua le caag tsaa qhovmuag saib koj tug tijlaug Yau-am?”

²³Tabsis nwg pheej tsi tso tseg le; Aneles txhaj tig loo rov lug rhu hlo nwg raab muv nkaug Axahees plaab, ua rua raab muv tshaab plawg rua tom nrausqaum. Axahees txhaj le qaug ntawg rua huv aav tuag kag lawm. Ces txhua tug kws lug txug ntawm qhov chaw kws Axahees tuag ntawd, puab puavleej lug sawv rua ntawd.

²⁴Tabsis Yau-am hab Anpisais tseem dlha caum Aneles qaab. Ces thaus nub poob qho, obtug lug txug rua ntawm lub ncov Roob Amas kws nyob ntawm Nkiyas saab nubtuaj txujkev kws moog rua tom taj mojsaab qhua Nkinpe-oos.

²⁵Cov tuabneeg kws yog xeem Npeenyamees txhaj tuaj sis sau sawv ncig Aneles dlua hab puab moog sawv rua sau ib lub ncov roob.

²⁶Aneles nug Yau-am has tas, “Peb pheej yuav sis tua le nuav moog ibtxhis le los? Koj tsi pum tas, thaus kawg yuav muaj kev ab kev dlaw nkaus xwb nua los? Thaus twg koj maam le cheem koj cov tuabneeg kuas tseg tsi xob caum nteg peb kws yog mej cov kwvtij?”

²⁷Yau-am teb has tas, “Kuv thov coglug rua Vaajtswv tug kws muaj sa nyob has tas, yog koj tsi has mas kuv cov tuabneeg tseem yuav caum nteg koj moog txug pigkig sawv ntxuv hab.”

²⁸Ces Yau-am txhaj tshuab xyu kuas nwg cov tuabneeg tsi xob caum cov Yixalayees ntxiv hab tseg tsi xob sis tua lawm.

²⁹Aneles hab nwg cov tuabneeg txhaj maub moog hlaa lub haav Yauladees ib mos; puab hlaa dlhau tug Dlej Yauladees hab taagkig sawv ntxuv, puab txhaj rov lug txug rua huv lub nroog Mahana-ees.

³⁰Thaus Yau-am tseg tsi caum cov Yixalayees lawm, nwg txhaj hu taagnrho nwg cov tuabneeg lug sis sau ua ke hab suav na ua caag pluj lawm kaum cuaj leeg ntxiv rua Axahees.

³¹Daviv cov tuabneeg tua Aneles cov tubrog kws yog xeem Npeenyamees tuag peb puas rau caum leej.

³²Yau-am hab nwg cov tuabneeg txhaj kwv Axahees lub cevlug log rua ntawm nwg tsev tuabneeg lub toj ntxaas huv lub nroog Npelehees. Ces puab txhaj maub ib mos kaaj ntug plawg rov moog txug ndlua rua nraag lub nroog Henploos.