Read Hmong Njua 2 Xamuyees 24 Bible Online

2 Xamuyees 24 - Hmong Njua bible

2 Xamuyees 24

¹Muaj ib zag tug TSWV chim heev rua cov Yixalayees, tug TSWV txhaj tshoov Daviv sab kuas nwg ua rua puab tau kev txomnyem. Tug TSWV has rua Daviv has tas, “Koj ca le moog suav kuas taagnrho cov Yixalayees hab cov Yudas saib muaj npaum le caag.”

²Yog le ntawd, Daviv txhaj has rua Yau-am kws yog nwg tug thawj tubrog has tas, “Koj ca le coj koj cov numtswv nrug koj moog txheeb cov pejxeem Yixalayees txhua xeem npe thoob plawg huv lub tebchaws saab tom nuav moog ti nkaus saab tom u. Kuv xaav paub saib peb muaj pejxeem coob npaum le caag.”

³Tabsis Yau-am teb vaajntxwv has tas, “Vaajntxwv, thov kuas tug TSWV kws yog koj tug Vaajtswv pub cov pejxeem Yixalayees fuamvaam coob dlua qub ib puas npaug ntxiv cov kws taamsim nuav muaj lawm, hab thov kuas koj muaj sa nyob ntev pum nwg ua tej nuav. Tabsis vaajntxwv, vim le caag koj txhaj xaav kuas ua tej nuav?”

⁴Vaajntxwv has tawv qhawv kuas Yau-am hab nwg cov numtswv ua lawv le vaajntxwv tej lug xwb; puab txhaj tawm moog suav cov pejxeem Yixalayees lawm.

⁵Puab moog hlaa tug Dlej Yauladees hab moog su rua ntawm lub nroog Alu-es saab nraag. Lub nroog ntawd nyob huv plawv lub haav kws yog xeem Khas cheebtsaam aav. Puab txhaj tawm ntawm qhov chaw ntawd nce toj moog rua saab qaumteb peg Yaxes,

⁶hab moog rua huv lub nroog Nkile-as moog rua huv lub nroog Kades kws nyob huv cov Hitis cheebtsaam aav. Dlhau ntawd, puab moog rua huv lub nroog Daas hab puab tawm huv lub nroog Daas moog rua saab nubpoob moog txug rua huv lub nroog Xidoos.

⁷Ces puab moog rua saab qaabteb, moog txug rua huv lub nroog Teles kws muaj ntsaa yeej thaiv, hab puab ncig moog txhua nrho cov Hivis hab cov Kana-aas tej nroog, thaus kawg puab lug txug rua huv lub nroog Npesenpas kws nyob huv xeev Yudas saab qaabteb.

⁸Yog le ntawd, puab txhaj moog ncig thoob plawg lub tebchaws tau cuaj lub hlis hab neeg nkaum nub, puab maam le rov lug txug rua huv lub nroog Yeluxalees.

⁹Puab lug qha rua vaajntxwv has tas, cov Yixalayees tej txivneej kws ua taug tubrog muaj yim pua txheeb leej hab cov Yudas muaj tsib puas txheeb leej.

¹⁰Tabsis tom qaab kws Daviv txheeb npe taag lawm, nwg nyuaj sab kawg le, nwg has rua tug TSWV has tas, “Kuv ua le nuav mas yog kuv yuam kev ua txhum lawm! Thov koj zaam txim rua kuv. Rua qhov kuv tau ua tej yaam kws ruag kawg le.”

¹¹Tug TSWV has rua Nkas kws yog Daviv tug cev Vaajtswv lug tas, “Koj ca le moog qha rua Daviv has tas, kuv muab peb yaam rua nwg xaiv, kuas nwg xaiv ib yaam xwb. Nwg xaiv yaam twg, kuv yuav muab yaam ntawd rua nwg.” Taagkig kaaj ntug thaus Daviv sawv lawm,

¹³Nkas txhaj moog ntsib Daviv hab pav tug TSWV tej lug rua Daviv noog lawv le tug TSWV has, hab nwg has tas, “Saib koj yuav xaiv yaam twg? Koj yuav ca koj lub tebchaws raug kev tshaib nqhes peb lub xyoos lossis yuav ca koj tsiv nkaum koj cov yeebncuab peb lub hlis lossis yuav ca kaab mob aws mob ntshaa lug raug koj lub tebchaws peb nub? Koj ca le ua tuab zoo xaav hab qha rua kuv paub, kuv yuav coj koj tej lug moog qha rua tug TSWV.”

¹⁴Daviv teb has tas, “Nyuaj kuv sab kawg le! Tabsis kuv tsi xaav ca tuabneeg rau txim rua peb, thov ca tug TSWV tuab leeg rau txim rua peb xwb, rua qhov nwg muaj lub sab taabncuab.”

¹⁵Yog le ntawd, tug TSWV txhaj tso kaab mob aws lug rua cov Yixalayees, pib kag thaus sawv ntxuv moog txug rua thaus lub sijhawm kws nwg teem tseg. Txij ndlua saab tebchaws tom nuav moog ti nkaus rua saab tebchaws tom u, cov Yixalayees tuag xyaa caum txheeb leej.

¹⁶Thaus Vaajtswv tug timtswv taabtom yuav rhuav lub nroog Yeluxalees, tug TSWV hloov sab qhov kws nwg rau txim rua cov tuabneeg kws nyob huv hab has rua tug timtswv kws tua puab ntawd has tas, “Tso tseg! Txaus lawm!” Thaus ntawd tug timtswv taabtom lug ncaaj rua sau Alaunas kws yog cov tuabneeg Yenpus lub tshaav ntaus nplej.

¹⁷Daviv pum tug timtswv kws lug tua cov tuabneeg ntawd, nwg txhaj has rua tug TSWV has tas, “Kuv yog tug ua txhum. Kuv tuab leeg txhaj yog tug ua txhum xwb. Cov tuabneeg txomnyem nuav tau ua txhum dlaabtsi hab? Koj ca le rau txim rua kuv hab kuv tsev tuabneeg nkaus xwb.”

¹⁸Nub ntawd Nkas moog cuag Daviv hab has rua Daviv has tas, “Koj ca le moog rua peg Alaunas lub tshaav ntaus nplej hab ua ib lub thaaj rua tug TSWV.”

¹⁹Daviv noog tug TSWV lug hab moog ua lawv le Nkas has rua nwg lawm.

²⁰Thaus Alaunas pum dlheev vaajntxwv hab cov numtswv tuaj cuag Alaunas. Alaunas txhus caug ndlua rua huv aav ntawm Daviv xubndlag

²¹hab nug has tas, “Vaajntxwv, vim le caag koj tuaj ntawm nuav?” Daviv teb has tas, “Kuv tuaj thov yuav koj lub tshaav ntaus nplej ua chaw teeb ib lub thaaj rua tug TSWV, thov kuas nwg tsi xob tso tej kaab mob aws lug rua peb ntxiv lawm.”

²²Alaunas has tas, “Vaajntxwv, kuv muab pub rua koj, kuas koj txhaj tau chaw fij khoom rua tug TSWV lawv le koj pum zoo. Koj ca le muab cov txiv nyuj nuav tua hlawv rua sau lub thaaj fij rua tug TSWV; koj muab cov nyuj nuav tej quabtwg hab tej txag ntaus nplej lug ua tawg rauv.”

²³Alaunas muab taagnrho tej ntawd rua vaajntxwv hab has rua vaajntxwv has tas, “Thov kuas Tug TSWV kws yog koj tug Vaajtswv leeg yuav koj tej khoom fij.”

²⁴Tabsis vaajntxwv teb has tas, “Tsi ua le ntawd, kuv yuav them nqe kuas txaus rua koj. Kuv yuav tsi muab yaam kws kuv tsi tau tshwm nqe fij rua tug TSWV kws yog kuv tug Vaajtswv le.” Ces vaajntxwv txhaj muab tau tsib caug dlaim nyaj yuav Alaunas lub tshaav ntaus nplej hab cov txiv nyuj ntawd.

²⁵Ces Daviv ua lub thaaj rua tug TSWV hab tua tsaj hlawv fij theej txhoj hab fij ua kev sis raug zoo. Tug TSWV teb Daviv tej lug thov, ces tej kaab mob aws mob ntshaa kws raug cov Yixalayees txhaj tseg kag lawm.