Read Hmong Njua 2 Xamuyees 9 Bible Online

2 Xamuyees 9 - Hmong Njua bible

2 Xamuyees 9

¹Muaj ib nub Daviv nug has tas, “Xa-ules tsev tuabneeg puas tshuav ib tug seem nyob qhov twg hab? Yog muaj kuv yuav paab nwg, vim kuv tau coglug rua Yaunathaas lawm.”

²Muaj ib tug txivneej npe hu ua Xinpas, nwg yog Xa-ules tsev tuabneeg ib tug tubkhai, puab txhaj khaiv tuabneeg moog coj Xinpas tuaj cuag Daviv. Vaajntxwv nug nwg has tas, “Koj puas yog Xinpas?” Nwg teb has tas, “Vaajntxwv, kuv yog koj tug tubkhai ntaag.”

³Vaajntxwv txhaj nug Xinpas ntxiv has tas, “Xa-ules tsev tuabneeg puas tshuav ib tug nyob qhov twg? Kuv yuav moog ua ncaaj hab ua sab dlawb sab zoo rua nwg, lawv le kuv tau coglug rua Vaajtswv lawm has tas, kuv yuav ua le ntawd.” Xinpas teb has tas, “Yaunathaas tshuav ib tug tub, tabsis nwg saav ceg lawm.”

⁴Vaajntxwv nug has tas, “Nwg nyob qhov twg?” Xinpas teb has tas, “Nwg nyob huv Amiyees tug tub Makhis tsev kws nyob huv lub nroog Laudenpas.”

⁵Yog le ntawd, Vaajntxwv Daviv txhaj khaiv tuabneeg moog tog nwg tuaj.

⁶Thaus Yaunathaas tug tub Mefinpauses kws yog Xa-ules tug xeebntxwv ntawd tuaj txug, nwg txhaj nyo ntshis hawm Daviv. Ces Daviv has tas, “Mefinpauses,” Mefinpauses teb has tas, “Vaajntxwv, kuv yog koj tug tubkhai ntaag.”

⁷Daviv has tas, “Koj tsi xob ntshai, kuv yuav ua zoo rua koj, vim tej lug kws kuv cog tseg rua koj txiv Yaunathaas lawm. Kuv yuav muab tej aav kws yog koj yawm Xa-ules tug rov rua koj huv tuabsi hab kuv zoo sab ca koj nrug kuv koom noj koom haus sau kuv lub rooj mov moog le.”

⁸Mefinpauses rov nyo ntshis dlua ib zag hab has tas, “Vaajntxwv, kuv tub tsi muaj nqes npaum le ib tug dlev tuag! Vim le caag koj yuav ua zoo taag npaum le nuav rua kuv?”

⁹Vaajntxwv hu Xinpas kws yog Xa-ules tug tubkhai lug hab has rua nwg tas, “Txhua yaam kws yog Xa-ules hab nwg tsev tuabneeg tug, kuv yuav muab rov qaab rua koj tug tswv tug xeebntxwv Mefinpauses huv tuabsi.

¹⁰Koj, koj cov tub hab koj cov tubkhai yuav moog ua tej teb ntawd rua koj tug tswv Xa-ules tsev tuabneeg hab sau tej qoobloo lug ca, kuas puab muaj noj muaj haus. Tabsis Mefinpauses yuav nrug kuv koom noj koom haus sau kuv lub rooj mov moog le.” (Xinpas muaj kaum tsib tug tub hab neeg nkaum tug tubkhai.)

¹¹Xinpas teb has tas, “Kuv zoo sab ua txhua yaam lawv le vaajntxwv tau has rua kuv lawm.” Yog le ntawd, Mefinpauses txhaj tau nrug vaajntxwv noj mov sau vaajntxwv lub rooj mov, ib yaam le nwg yog vaajntxwv ib tug tub ntaag.

¹²Mefinpauses muaj ib tug tub ntxawg hu ua Mikas. Taagnrho Xinpas tsev tuabneeg puavleej ua Mefinpauses qhev.

¹³Yog le ntawd, Mefinpauses kws saav ob saab ceg huv tuabsi, txhaj tau nyob huv lub nroog Yeluxalees, hab nwg nrug vaajntxwv noj txhua pluag mov sau vaajntxwv lub rooj mov.