Read Hmong Njua 1 Vaajntxwv 13 Bible Online

1 Vaajntxwv 13 - Hmong Njua bible

1 Vaajntxwv 13

¹Tug TSWV saamfwm kuas ib tug cev Vaajtswv lug kws nyob huv lub xeev Yudas moog rua peg lub nroog Npethees thaus Yelaunpau-aas tseem taabtom hlawv khoom fij ntawm lub thaaj

²lawv le tug TSWV tej lug qha, tug cev Vaajtswv lug has tas, “Lub thaaj, lub thaaj, ib tug mivnyuas tub npe hu ua Yauxiyas yuav yug lug rua huv Daviv tsev tuabneeg. Nwg yuav muab cov cevlug kws pheej moog hlawv khoom fij rua sau tej chaw sab tua rua sau, hab nwg yuav muab tej pobtxhaa tuabneeg lug hlawv rua sau koj.”

³Tug cev Vaajtswv lug txhaj has ntxiv has tas, “Lub thaaj nuav yuav qaug tawg ntsoog ntxawg, hab tej moov tshauv kws nyob sau lub thaaj yuav nchuav taag. Ces koj yuav paub has tas tej kws tug TSWV tau has rua kuv lawm, yeej muaj tseeb tag.”

⁴Thaus Vaajntxwv Yelaunpau-aas nov tej lug nuav, nwg txawm taw teg nki rua tug cev Vaajtswv lug hab has tas, “Ca le nteg tug tuabneeg nuav moog!” Taamsim ntawd vaajntxwv txhais npaab ca le qhuav kag nkaum tsi tau rov qaab le lawm.

⁵Taamsim ntawd lub thaaj ca le qaug ntawg tawg ntsoog ntxawg hab tej moov tshauv nchuav taag rua huv aav, lawv le tug cev Vaajtswv lug tau tuav tug TSWV lub npe has lawm.

⁶Vaajntxwv Yelaunpau-aas txhaj has rua tug cev Vaajtswv lug tas, “Thov tug TSWV kws yog koj tug Vaajtswv paab kuv, hab thov nwg khu kuv txhais npaab lauj!” Tug cev Vaajtswv lug txhaj thov tug TSWV, ces vaajntxwv txhais npaab txawm zoo lawm.

⁷Vaajntxwv has rua tug cev Vaajtswv lug tas, “Koj ca le nrug kuv moog tom kuv tsev hab kuv nrhav mov rua koj noj tsaiv. Hab kuv yuav pauj txaj ntsig rua koj tej kws koj tub ua pub rua kuv lawm.”

⁸Tug cev Vaajtswv lug teb has tas, “Txawm yog koj muab koj tej nyaj ib nraab faib rua kuv los kuv yuav tsi nrug koj moog lossis nrug koj noj haus ib yaam dlaabtsi hlo le.

⁹Tug TSWV yeej saamfwm rua kuv lawm, kuas kuv tsi xob noj lossis haus ib yaam dlaabtsi le, hab tsi xob taug txujkev kws kuv tuaj rov qaab moog tsev.”

¹⁰Yog le ntawd, nwg txhaj tsi taug txuj qub ke rov qaab, nwg txhaj moog dlua lwm txujkev lawm.

¹¹Lub sijhawm ntawd, muaj ib tug laug kws cev Vaajtswv lug nyob huv lub nroog Npethees. Nwg cov tub txawm lug pav tej kws nub ntawd tug hluas kws cev Vaajtswv lug tuaj nraag lub xeev Yudas tuaj ua huv lub nroog Npethees, hab tej lug kws nwg has rua Vaajntxwv Yelaunpau-aas rua puab txiv noog.

¹²Tug laug kws cev Vaajtswv lug nug puab has tas, “Thaus nwg sawv kev moog tsev nwg taug txujkev twg lawm?” Puab txhaj qha kev rua nwg,

¹³nwg txawm has rua puab tas, “Muab kuv tug neeg luav lug pem eeb rua kuv.” Puab txawm ua le nwg has, hab nwg caij tug neeg luav

¹⁴taug txujkev kws puab qha moog caum tug cev Vaajtswv lug kws tuaj nraag lub xeev Yudas tuaj hab moog caum cuag thaus nwg tseem su huv qaab tsob ntoo qheb. Tug laug kws cev Vaajtswv lug nug has tas, “Koj puas yog tug cev Vaajtswv lug kws tuaj nraag lub xeev Yudas tuaj?” Tug txivneej ntawd teb has tas, “Kuv yog los mas.”

¹⁵Tug laug kws cev Vaajtswv lug has tas, “Koj ca le nrug kuv rov qaab moog tom kuv tsev, hab moog nrug kuv noj mov tsaiv.”

¹⁶Tabsis tug cev Vaajtswv lug kws tuaj nraag lub xeev Yudas tuaj teb has tas, “Kuv yuav nrug koj moog tsi tau. Hab kuv yuav nrug koj noj haus ua ke qhov nuav tsi tau,

¹⁷rua qhov tug TSWV yeej saamfwm rua kuv kuas tsi xob noj lossis haus ib yaam dlaabtsi le, hab tsi xob taug txujkev kws kuv tuaj rov qaab moog tsev.”

¹⁸Ces tug laug kws cev Vaajtswv lug kws tuaj huv Npethees tuaj has rua nwg tas, “Kuv yog ib tug cev Vaajtswv lug ib yaam le koj hab. Tug TSWV tug timtswv lug has rua kuv kuas kuv tuaj coj koj nrug kuv moog tsev hab muab zaub mov rua koj noj.” Tabsis tug laug kws cev Vaajtswv lug dlaag xwb.

¹⁹Yog le ntawd, tug cev Vaajtswv lug kws tuaj nraag lub xeev Yudas tuaj txhaj nrug tug laug kws cev Vaajtswv lug rov moog rua tom nwg tsev hab nrug nwg noj mov ua ke.

²⁰Thaus kws obtug tseem taabtom nyob ntawm rooj mov, tug TSWV lug has rua tug laug kws cev Vaajtswv lug,

²¹ces nwg txhaj qw rua tug cev Vaajtswv lug kws tuaj nraag lub xeev Yudas tuaj has tas, “Tug TSWV has tas, koj tsi noog nwg lug hab tsi ua lawv le nwg tej lug saamfwm.

²²Koj tseem rov qaab lug noj mov rua huv qhov chaw kws nwg tsi pub koj noj. Vim le ntawd koj yuav raug tua tuag, hab yuav tsi coj koj lub cev moog log rua huv koj tsev tuabneeg lub qhov ntxaa.”

²³Ces thaus kws obtug noj mov taag lawm, tug laug kws cev Vaajtswv lug txhaj muab eeb moog pem rua sau tug neeg luav rua tug cev Vaajtswv lug kws tuaj nraag lub xeev Yudas tuaj

²⁴caij rov qaab. Muaj ib tug tsuv ntxhuav lug ntsib nwg tom kev hab muab nwg tum tuag lawm. Nwg lub cev pw xyaab leeg rua huv plawv kev, ces tug neeg luav hab tug tsuv ntxhuav sawv ib saab.

²⁵Muaj ib cov tuabneeg dlua kev tuaj pum lub cev tuag nyob huv plawv kev, hab tug tsuv ntxhuav sawv ze ntawd. Puab txawm moog rua peg lub nroog Npethees hab moog qha tej kws puab pum ntawd rua suavdlawg.

²⁶Thaus tug laug kws cev Vaajtswv lug nov dlheev le ntawd, nwg txawm has tas, “Tug ntawd tub yog tug cev Vaajtswv lug kws tsi noog tug TSWV tej lug saamfwm ntaag! Yog le ntawd, tug TSWV txhaj tso tug tsuv ntxhuav ntawd lug tum hab dlua kuas nwg tuag, lawv le tug TSWV tub has lawm tas, nwg yuav tuag le ntawd.”

²⁷Ces nwg txawm has rua nwg cov tub has tas, “Muab eeb moog pem rua sau kuv tug neeg luav rua kuv.” Puab txawm ua le nwg has,

²⁸Ces nwg txhaj caij neeg luav moog pum tug cev Vaajtswv lug ntawd tuag xyaab leeg rua huv plawv kev, tug neeg luav hab tug tsuv ntxhuav sawv nreg nreeg rua ib saab. Tug tsuv ntxhuav yeej tsi noj tug cev Vaajtswv lug ntawd lub cev ib qho hab tsi tum tug neeg luav le.

²⁹Tug laug kws cev Vaajtswv lug ntawd muab tug cev Vaajtswv lug kws tuaj nraag lub xeev Yudas tuaj tsaws rua sau tug neeg luav hab coj rov lug paam rua huv Npethees hab muab log lawm.

³⁰Tug laug kws cev Vaajtswv lug coj tug tuag ntawd moog log rua huv nwg tsev tuabneeg lub qhov ntxaa, nwg hab nwg cov tub quaj has tas, “Kuv tug kwv! Kuv tug kwv.”

³¹Tom qaab kws puab muab tug tuag log taag lawm, tug laug kws cev Vaajtswv lug has rua nwg cov tub has tas, “Yog thaus twg kuv tuag, ces mej muab kuv log rua huv lub qhov ntxaa nuav hab muab kuv lub cev tso rua ntawm nwg ib saab.

³²Tug TSWV tej lug saamfwm kws tug cev Vaajtswv lug moog has tawmtsaam lub thaaj huv lub nroog Npethees hab tej chaw teev dlaab huv Xamalis, yeej muaj tseeb le ntawd tag.”

³³Cov Yixalayees tug Vaajntxwv Yelaunpau-aas tsi tso txujkev ua phem ua qas tseg le, nwg pheej xaiv tej caajceg kws yog tuabneeg dlog dlig tsaa ua povthawj tu tej thaaj kws nwg ua. Leejtwg xaav ua povthawj ces nwg pheej laam muab tug ntawd tsaa lug ua le.

³⁴Txujkev txhum kws nwg ua nuav txhaj le coj kev puamtsuaj lug raug nwg, nwg tsev tuabneeg hab nwg caajceg huv tuabsi.