Read Hmong Njua 1 Vaajntxwv 6 Bible Online

1 Vaajntxwv 6 - Hmong Njua bible

1 Vaajntxwv 6

¹Thaus Xalumoos ua vaajntxwv kaav tebchaws Yixalayees tau plaub xyoos, xyoo plaub thaus lub ob hlis ntuj kws hu ua hli Xiv, Xalumoos txawm pib ua lub Tuamtsev, suav txij thaus cov Yixalayees tsiv nraag tebchaws Iziv lug txug lub sijhawm kws Xalumoos ua lub Tuamtsev ntawd, tau plaub puas yim caum xyoo.

²Lub Tuamtsev saab huv nruab nrog ntev rau caum tshim, dlaav peb caug tshim, hab sab peb caug tshim.

³Chaav ntawm lub qhovrooj moog rua huv, tub kaum tshim, ntev neeg nkaum tshim, hab dlaav ib yaam le Chaav Dlawbhuv.

⁴Lub Tuamtsev muaj qhovrais thoob plawg txhua saab phaab ntsaa. Tej qhovrais ntawd saab nrau nqaim dlua saab huv.

⁵Lub Tuamtsev saab nrau tseem muaj dlua peb txheej rua saab qaum tsev hab ob tog, ib txheej twg sab tsib tshim.

⁶Txheej huv qaab kawg, ib chaav twg dlaav tsib tshim. Txheej nruab nraab ib chaav twg dlaav rau tshim, hab txheej kawg sau u ib chaav twg dlaav xyaa tshim. Lub Tuamtsev tej phaab ntsaa ob txheej sau xov nyag dlua txheej huv qaab. Tej chaav ntawd ib txheej txawb rua ib txheej tsi muaj laag ntoo ntsa tuav tej phaab ntsaa ntawd le.

⁷Tej pobzeb kws ua lub Tuamtsev ntawd, yeej txaug tau zoo zoo ntawm qhov chaw txaug lug lawm, yog le ntawd thaus coj lug ua txhaj tsi muaj suab rauj, suab taus lossis lwm yaam cuabyeej nrov le.

⁸Lub qhovrooj txheej huv qaab kws nyob ntawm lub Tuamtsev saab nraag, muaj ntaiv nce moog rua sau txheej ob hab txheej peb.

⁹Xalumoos muab tej txag ntoo thuv lug ntsa vuv thoob plawg saab huv. Yog le ntawd, Vaajntxwv Xalumoos txhaj ua lub Tuamtsev tav lawm.

¹⁰Peb txheej kws nwg ua ncig lub Tuamtsev saab nrau, ib txheej twg sab tsib tshim, hab muab tej txag ntoo thuv lug ntsa npuab khov kho rua.

¹¹Tug TSWV has rua Xalumoos has tas,

¹²“Has txug lub Tuamtsev kws koj taabtom ua ntawd, yog koj ua lawv le kuv tej kevcai hab noog kuv tej lug saamfwm, kuv yuav paab koj lawv le tej lug kws kuv tau cog tseg rua koj txiv Daviv lawm.

¹³Kuv yuav nrug nraim kuv tsaav tuabneeg Yixalayees nyob huv lub Tuamtsev kws koj ua nuav, hab kuv yuav tsi tso puab tseg ib zag le.”

¹⁴Xalumoos ua lub Tuamtsev tav lawm.

¹⁵Saab phaab ntsaa huv lub Tuamtsev puavleej muab tej txag ntoo thuv xov huv taw moog nto plawg rua sau qaab nthaab, hab muab tej txag ntoo cab lug pua thoob plawg lub plaag tsev.

¹⁶Chaav huv nruab nrog kws hu ua Chaav Dlawbhuv Kawg nkaus, yog chaav kws nyob tom qaab huv lub Tuamtsev, chaav ntawd qhov ntev muaj neeg nkaum tshim hab puavleej muab txag ntoo thuv xov huv taw moog nto plawg rua sau qaab nthaab.

¹⁷Chaav kws nyob ntawm hauv ntej Chaav Dlawbhuv Kawg nkaus ntev plaub caug tshim.

¹⁸Tej txag ntoo thuv kws xov lub Tuamtsev mas puavleej muab txaug txaij nraug zeeg ua dluab plhaub taub hab ua dluab paaj ntoos huv tuabsi; saab huv nruab nrog xov txag ntoo thuv thoob plawg tsi pum ib qhov ntsaa pobzeb tshwm le.

¹⁹Chaav kws ua rua huv lub Tuamtsev tom qaab kawg nkaus, yog chaav kws muab lub Phijxaab kws ntim Vaajtswv tej lug cog tseg coj moog tso rua huv.

²⁰Chaav nuav ntev neeg nkaum tshim, dlaav neeg nkaum tshim hab sab neeg nkaum tshim, yog muab kub vuam thoob plawg. Xalumoos muab txag ntoo thuv ntsa npuab thoob plawg lub thaaj.

²¹Muab kub vuam thoob plawg lub Tuamtsev saab huv, hab muab tej saw kub caab hlaa txujkev kws moog rua huv Chaav Dlawbhuv kws muab kub vuam thoob plawg ntawd.

²²Xalumoos muab kub vuam lub Tuamtsev saab huv thoob plawg, ib yaam le lub thaaj kws nyob huv Chaav Dlawbhuv Kawg nkaus.

²³Muab ntoo roj txaug ua ob tug qhelunpees kws muaj tis coj moog txawb rua huv Chaav Dlawbhuv Kawg nkaus, ib tug twg sab kaum tshim.

²⁴Ob tug qhelunpees ntawd luj sis luag zog hab zoo ib yaam nkaus. Hab puavleej muaj tis, ib saab tis twg ntev tsib tshim, saab ntsis tis tom nuav moog rua saab ntsis tis tom u ntev kaum tshim.

²⁷Puab muab ob tug qhelunpees ntawd coj moog txawb sis ncaag zog rua huv Chaav Dlawbhuv kawg nkaus, kuas ob tug qhelunpees ntawd nthuav tis tuaj sis cob rua huv nruab nraab, hab dlua le ob saab tis nthuav moog ti nkaus rua tim phaab ntsaa.

²⁸Ob tug qhelunpees ntawd puavleej muab kub vuam thoob plawg huv tuabsi.

²⁹Cov phaab ntsaa huv Chaav luj hab Chaav Dlawbhuv, mas luas muab txaug ua dluab qhelunpees, ua tej tsob toovlaaj hab ua paaj ntoos txaij raug zeeg zoo nkauj kawg le.

³⁰Txawm yog lub plaag tsev los yeej vuam kub thoob plawg hab.

³¹Muab ntoo roj ua ob dlaim txag qhovrooj rua lub qhovrooj kws moog huv Chaav Dlawbhuv kawg nkaus; lub qhovrooj ntawd sau kawg luas muab txaug ua tsib ceg.

³²Ob dlaim txag qhovrooj ntawd los yeej muab txaug ua dluab qhelunpees, ua dluab toovlaaj hab ua paaj ntoos txaij raug zeeg zoo nkauj kawg le. Luas muab kub vuam rua cov dluab qhelunpees hab cov dluab toovlaaj kws txaug rua ntawm ob dlaim txag qhovrooj ntawd huv tuabsi.

³³Luas muab ntoo roj ua ob tug ncej qhovrooj rua lub qhovrooj kws moog rua huv Chaav luj, lub qhovrooj ntawd ua plaub faab.

³⁴Luas muab ntoo cab ua ob dlaim txag qhovrooj kaw tuaj sis twb

³⁵hab muab txaug ua dluab qhelunpees, ua dluab toovlaaj hab ua paaj ntoos txaij raug zeeg zoo nkauj kawg le, hab muab kub vuam rua huv tuabsi.

³⁶Chaav luj nyob huv lub Tuamtsev hauv ntej, mas luas xov peb txheej pobzeb, ib txheej pobzeb twg, xov ib txheej txag ntoo thuv quas.

³⁷Xalumoos ua vaajntxwv tau plaub xyoos, ces xyoo plaub thaus lub ob hlis ntuj kws hu ua hli Xiv, nwg txawm pib ua lub Tuamtsev.

³⁸Xalumoos ua vaajntxwv kaav tau kaum ib xyoos rua thaus lub yim hli ntuj kws hu ua hli Npules, ces nwg ua lub Tuamtsev tav rua thaus ntawd lawv le nwg tau npaaj tseg lawm. Xalumoos ua lub Tuamtsev ntawd tau xyaa xyoo txhaj le tav.