Read Hmong Njua 2 Vaajntxwv 2 Bible Online

2 Vaajntxwv 2 - Hmong Njua bible

2 Vaajntxwv 2

¹Thaus txug sijhawm kws tug TSWV tso khaub zeeg cua lug tog Eliyas moog sau ntuj, Eliyas hab Elisas taabtom taug kev tawm huv lub nroog Nkilenkas moog rua lwm qhov, hab

²thaus obtug taug kev moog, Eliyas has rua Elisas has tas, “Koj nyob tuabywv ntawm nuav tog, kuv yuav moog rua huv lub nroog Npethees lawv le tug TSWV has.” Tabsis Elisas teb has tas, “Kuv coglug rua tug TSWV kws muaj sa nyob has tseeb rua koj tas, kuv yuav si ncaim koj moog qhov twg le.” Ces obtug txawm ua ke moog rua huv lub nroog Npethees lawm.

³Thaus obtug moog txug, cov cev Vaajtswv lug kws nyob huv lub nroog tuaj cuag Elisas hab has rua nwg tas, “Koj puas paub has tas, nub nua tug TSWV tub yuav coj koj tug xwbfwb moog?” Elisas teb has tas, “Ua tuabywv tsi xob has lug, kuv tub paub lawm.”

⁴Eliyas has rua Elisas has tas, “Koj nyob tuabywv ntawm nuav tog; kuv yuav moog rua huv lub nroog Yelikaus lawv le tug TSWV has.” Tabsis Elisas teb has tas, “Kuv coglug rua tug TSWV kws muaj sa nyob has tseeb rua koj has tas, kuv yuav tsi ncaim koj moog qhov twg le.” Ces obtug txawm ua ke moog rua huv lub nroog Yelikaus lawm.

⁵Thaus obtug moog txug, cov cev Vaajtswv lug kws nyob huv lub nroog Yelikaus tuaj cuag Elisas hab has rua nwg tas, “Koj puas paub has tas, nub nua tug TSWV tub yuav coj koj tug xwbfwb moog?” Elisas teb has tas, “Ua tuabywv tsi xob has lug, kuv tub paub lawm.”

⁶Eliyas has rua Elisas has tas, “Koj nyob tuabywv ntawm nuav tog; kuv yuav moog rua nraag tug Dlej Yauladees lawv le tug TSWV has.” Tabsis Elisas teb has tas, “Kuv coglug rua tug TSWV kws muaj sa nyob has tseeb rua koj tas, kuv yuav tsi ncaim koj moog qhov twg le.” Ces obtug txawm ua ke moog,

⁷hab muaj tsib caug leej cev Vaajtswv lug lawv obtug qaab moog txug nraag tug Dlej Yauladees. Eliyas hab Elisas moog sawv ntawm ntug dlej hab tsib caug leej cev Vaajtswv lug ntawd txawm moog sawv ib caag saib.

⁸Eliyas hle hlo nwg lub tsho ntev hab muab dlov ua ib caaj nplawm dlej; dlej txawm faib hlo rua ob saab ua kev qhuav qhawv rua Eliyas hab Elisas moog rua saab tim u.

⁹Thaus obtug moog txug saab tid lawm, Eliyas has rua Elisas has tas, “Tsheem Vaajtswv tsi tau coj kuv moog, yog koj xaav tau dlaabtsi, koj ca le thov.” Elisas teb has tas, “Thov faib koj lub fwjchim rua kuv, ca kuv ua tug hloov koj chaw.”

¹⁰Eliyas teb has tas, “Koj thov yaam kws muab nyuaj kawg le. Txawm le caag los xij, yog koj pum Vaajtswv coj kuv moog, ces koj yuav tau lawv le koj thov. Tabsis yog koj tsi pum kuv moog, koj yuav tsi tau ib yaam dlaabtsi le.”

¹¹Thaus obtug tseem sis thaam tujtawg taug kev, txawm muaj ib cov neeg fuab cua hai ib lub tsheb neeg suavtawg cig nplaim lab ploog lug phua plhawv obtug moog, ces khaub zeeg cua txawm nqaa hlo Eliyas moog rua sau ntuj lawm.

¹²Elisas saib dlheev pum Eliyas hab hu has tas, “Kuv txiv, kuv txiv! Tug muaj fwjchim luj kawg nkaus kws paab cov Yixalayees! Koj txawm moog lawm tag los!” Ces Elisas txawm tsi pum Eliyas le lawm. Elisas tu sab heev, nwg txawm muab nwg lub tsho ntev dlua rhe ua ob dlaim.

¹³Nwg txhaj moog khaws nkaus Eliyas lub tsho ntev kws poob lug, hab rov moog sawv ntawm ntug Dlej Yauladees.

¹⁴Nwg muab Eliyas lub tsho nplawm dlej hab hu has tas, “Tug TSWV kws yog Eliyas tug Vaajtswv, koj nyob qhov twg?” Nwg rov muab lub tsho nplawm dlej, dlej txawm faib hlo rua ob saab, Elisas txhaj rov lug lawm.

¹⁵Thaus tsib caug leej cev Vaajtswv lug kws tuaj huv lub nroog Yelikaus tuaj pum le ntawd, puab txhaj has tas, “Elisas tau Eliyas lub fwjchim lawm!” Puab suavdlawg dlha moog tog Elisas hab txhus caug ndlua pe nwg,

¹⁶hab has tas, “Peb tsib caug leej nuav puavleej yog cov kws khov kho xwb. Thov ca peb moog nrhav koj tug xwbfwb. Tej zag tug TSWV tug ntsujplig coj nwg moog rua sau tej roob lossis tom tej haav lawm.” Elisas teb has tas, “Mej tsi xob moog nrhav!”

¹⁷Tabsis puab pheej thov taag zug le, Elisas ua tsi tau le caag, nwg txhaj ca puab moog nrhav. Puab tsib caug leej ntawd txhaj moog nrhav Eliyas rua peg tej roob hab tej haav tau peb nub tabsis tsi pum le.

¹⁸Puab rov lug cuag Elisas huv lub nroog Yelikaus. Nwg tseem nyob huv tog puab, hab nwg has rua puab tas, “Kuv tub has rua mej has tas, tsi xob moog nrhav nwg nua ne!”

¹⁹Cov tuabneeg kws nyob huv lub nroog Yelikaus muaj qee leej moog has rua Elisas has tas, “Koj paub has tas, lub nroog nuav xis nyob kawg le, tabsis tej dlej tsi zoo hab ua rua cov quaspuj pheej nchuav cev.”

²⁰Elisas has rua puab tas, “Mej moog muab ib cov ntsev ntim rua huv ib lub taig tshab nqaa tuaj rua kuv.” Puab txawm ua le Elisas has.

²¹Elisas moog rua tom lub qhovdlej, nwg muab cov ntsev ntawd laub rua huv lub qhovdlej, hab has tas, “Tug TSWV has le nuav: ‘Kuv ua rua lub qhovdlej nuav zoo lawm, txij nuav moog cov dlej yuav tsi ua rua leejtwg tuag lossis pob mivnyuas lawm.’ ”

²²Txij thaus ntawd lug txug naj nub nua lub qhovdlej ntawd txawm zoo lawv le Elisas has.

²³Elisas tawm huv lub nroog Yelikaus moog rua peg lub nroog Npethees, thaus nwg taabtom taug kev moog, txawm muaj ib cov tub hluas tawm huv nroog tuaj qw thuam Elisas has tas, “Yawm laug dlo hau, koj ca le tsiv moog!”

²⁴Elisas tig hlo lug saib puab, hab tuav tug TSWV lub npe foom puab. Ces txawm muaj ob tug maum dlais tawm huv haav ntoo lug muab plaub caug ob leeg tub hluas ntawd tum tuag taag huv tuabsi.

²⁵Ces Elisas txawm moog rua sau lub Roob Kalemees, hab tom qaab ntawd nwg rov lug rua huv lub nroog Xamalis.