Read Hmong Njua 2 Vaajntxwv 7 Bible Online

2 Vaajntxwv 7 - Hmong Njua bible

2 Vaajntxwv 7

¹Elisas teb has tas, “Ca le noog tug TSWV tej lug! Tug TSWV has le nuav: ‘Pigkig taav lub caij nuav, luas yuav muag ob sab moov nplej lossis plaub sab moov qeb twg yog ib dlaim nyaj nyob ntawm roojvaag nroog Xamalis.’ ”

²Tug tubrog kws nrug nraim vaajntxwv teb Elisas has tas, “Tej kws koj has ko yeej tsi muaj le. Txawm yog tug TSWV qheb rooj ntug los yeej tsi muaj le ntawd!” Elisas teb has tas, “Koj lub qhovmuag yuav pum, tabsis koj yuav tsi tau noj.”

³Muaj plaub tug tuabneeg mob ruas nyob ntawm lub roojvaag nroog Xamalis saab nrau, puab sis thaam has tas, “Peb yuav ua le caag nyob ntawm nuav tog moog txug nub tuag?

⁴Yog peb moog huv lub nroog los peb yuav tuag tshaib; txawm yog peb nyob ntawm nuav moog le los peb yeej yuav tuag ib yaam nkaus. Yog le ntawd, peb ca le moog rua huv cov Xilias lub yeej; yog puab tseg los peb dlim, yog puab tua los peb tuag.”

⁵Thaus tsaus ntuj zuag, puab txawm moog rua huv cov Xilias lub yeej, tabsis thaus puab moog txug tsi muaj ib tug tuabneeg nyob huv le.

⁶Rua qhov tug TSWV tub ua rua cov tubrog Xilias nov suab neeg hab tsheb neeg dlha nrov nroo ntwg tuaj ib yaam le paab tubrog kws coob heev. Cov Xilias xaav has tas, yog cov Yixalayees tug vaajntxwv moog ndlav cov Hitis cov tubrog hab cov Iziv tug vaajntxwv cov tubrog tuaj tua puab.

⁷Thaus tsaus ntuj zuag, cov Xilias txhaj tsiv taag tso puab tej tsevntaub, tej neeg hab tej neeg luav tseg rua huv lub yeej, tsuav puab dlim xwb.

⁸Thaus cov tuabneeg mob ruas moog txug ntawm ntug yeej, puab txawm moog rua huv ib lub tsevntaub, puab muab tej zaub tej mov huv noj, hab puab muab tej nyaj, tej kub hab rig tsho nqaa moog zais, puab tsua moog rua lwm lub tsevntaub, hab ua ib yaam le ntawd.

⁹Ces puab txawm sis thaam has tas, “Peb tsi xob ua le nuav. Peb muaj xuv zoo tsi tsimnyog muab npog ca, yog peb tog txug pigkig kaaj ntug peb maam le qha, peb yuav raug txim. Taamsim nuav, peb ca le moog qha rua vaajntxwv cov numtswv paub!”

¹⁰Puab txhaj rov ntawm cov Xilias lub yeej lug rua huv lub nroog Xamalis, hab hu cov kws zuv roojvaag has tas, “Peb tub moog huv cov Xilias lub yeej lug lawm, tabsis tsi pum muaj ib tug tubrog lossis tsi nov leejtwg has lug le; tsuas pum tej neeg, hab tej neeg luav khi pawg lug ca xwb. Tej tsevntaub hab tej khoom los nyob huv tuabsi.”

¹¹Cov zuv roojvaag txawm qw hab muaj tuabneeg moog qha zaaj nuav rua huv vaajntxwv lub loog.

¹²Vaajntxwv txawm sawv tsaus ntuj nti lug has rua nwg cov numtswv has tas, “Kuv qha cov Xilias lub tswvyim rua mej! Puab paub has tas peb tshaib plaab, puab txhaj tsiv moog nkaum rua saab nrau ntug yeej. Puab xaav has tas, peb yuav tawm moog nrhav noj saab nrau, hab puab yuav rov lug nteg peb hab txeeb peb lub nroog.”

¹³Tabsis nwg cov numtswv ib tug has tas, “Cov tuabneeg kws nyob huv lub nroog nuav yeej yuav tuag taag ib yaam le cov kws tub tuag lawm hab. Yog le ntawd, ca le tso tuabneeg caij tsib tug neeg kws seem ntawd moog saib puas muaj le ntawd tag.”

¹⁴Puab txawm muab ob lub tsheb neeg hab cov neeg lug. Vaajntxwv kuas puab moog saib muaj xwm dlaabtsi rua cov tubrog Xilias tag.

¹⁵Puab cov ntawd caum cov tubrog Xilias moog ti nkaus ntawm ntug Dlej Yauladees, puab pum tej rig tsho hab tej cuabyeej kws cov Xilias muab tso povtseg pawg lug taug kev xwb, ces puab txawm rov lug qha rua vaajntxwv.

¹⁶Cov tuabneeg huv lub nroog Xamalis txhaj pluav moog nqaa txhua yaam huv cov Xilias lub yeej. Puab txhaj muab ob sab moov nplej lossis plaub sab moov qeb muag ua ib dlaim nyaj lawv le tug TSWV tau has lawm.

¹⁷Cov tuabneeg txawm muab tug tubrog kws vaajntxwv tsaa zuv roojvaag tsuj tuag rua ntawm roojvaag, lawv le Elisas has nub kws vaajntxwv tuaj nteg Elisas ntaag.

¹⁸Elisas xub has rua vaajntxwv lawm tas, nub tom qaab thaus taav lub caij nuav, luas yuav muag ob sab moov nplej lossis plaub sab moov qeb twg yog ib dlaim nyaj ntawm lub roojvaag nroog Xamalis nuav,

¹⁹Ces tug tubrog kws nrug nraim vaajntxwv has tas, “Tej kws koj has ko yeej tsi muaj le. Txawm yog tug TSWV qheb rooj ntug los yeej tsi muaj le ntawd.” Elisas teb has tas, “Koj lub qhovmuag yuav pum, tabsis koj yuav tsi tau noj.”

²⁰Ces txawm muaj lawv le ntawd tag, rua qhov cov tuabneeg muab nwg tsuj tuag rua ntawm lub roojvaag nroog lawm.