Read Hmong Njua 1 Xwmtxheej Vaajntxwv 23 Bible Online

1 Xwmtxheej Vaajntxwv 23 - Hmong Njua bible

1 Xwmtxheej Vaajntxwv 23

¹Thaus Daviv laug heev lawm, nwg txhaj tsaa nwg tug tub Xalumoos ua vaajntxwv kaav lub tebchaws Yixalayees.

²Vaajntxwv Daviv coj cov tuabneeg Yixalayees cov thawjcoj, cov povthawj hab cov Levis tuaj sis sau ua ke.

³Suav taagnrho cov Levis kws noobnyoog muaj peb caug xyoo rov sau, cov txivneej muaj peb caug yim txheeb leej.

⁴Daviv has tas, “Tsaa neeg nkaum plaub txheeb leej, ua num huv tug TSWV lub Tuamtsev hab tsaa rau txheeb leej ua cov numtswv tu plaub ntug;

⁵tsaa plaub txheeb leej ua cov zuv roojvaag, plaub txheeb leej ua cov tshuab raaj hab ntaus nkauj nogncaas kws kuv npaaj tseg ca lawm ua tug TSWV tsaug.”

⁶Daviv muab puab faib ua tej paab lawv le Levis cov tub: Nkesoos, Kauhas hab Melalis.

⁷Nkesoos muaj ob tug tub: Ladas hab Sime-is.

⁸Ladas muaj peb tug tub: Yehiyees, Xethamas hab Yau-ees,

⁹Sime-is muaj peb tug tub: Selaumaus, Haxiyees hab Halaas. Puab puavleej yog cov thawjcoj ntawm Ladas caajceg.

¹⁰Hab Sime-is muaj plaub tug tub: Yahaj, Xinas, Ye-uses hab Npeliyas. Plaub leeg nuav puavleej yog Sime-is tub.

¹¹Yahaj yog tug thawjcoj, hab Xixas yog tug lwm thawj; tabsis Ye-uses hab Npeliyas tsi muaj tub coob pistsawg, vim le ntawd txhaj muab obtug suav ua ib cuab kwvtij lawm xwb.

¹²Kauhas muaj plaub tug tub: Amalas, Ixahas, Henploos, hab Uxiyees.

¹³Kauhas tug tub hlub, Amalas yog Aloos hab Mauxes obtug txiv. (Muab Aloos hab nwg cov xeebntxwv ua cov saib tej khoom tseemceeb, hlawv tej tshuaj tsw qaab huv chaav pehawm tug TSWV ua tug TSWV teg num hab tuav tug TSWV lub npe foom koob moov rua suavdlawg.

¹⁴Tabsis Mauxes kws yog Vaajtswv tug tuabneeg cov tub, puavleej muab suav nrug cov Levis lawm.)

¹⁵Mauxes muaj ob tug tub: Nkesoos hab Eli-exes.

¹⁶Senpuyees ua Nkesoos cov tub tug thawjcoj.

¹⁷Eli-exes tsuas muaj tuab tug tub kws hu ua Lehanpiyas xwb, tabsis Lehanpiyas muaj tub coob kawg le.

¹⁸Ixahas kws yog Kauhas tug tub ob, muaj ib tug tub hu ua Selaumis, yog tug thawjcoj ntawm nwg cuab kwvtij.

¹⁹Henploos kws yog Kauhas tug tub peb, muaj plaub tug tub: Yeliyas, Amaliyas, Yehaxiyees hab Yekame-as.

²⁰Uxiyees cov tub: Minkas yog tug thawjcoj hab Isiyas yog tug lwm thawj.

²¹Melalis muaj ob tug tub: Mahalis hab Musis. Mahalis los muaj ob tug tub hab xwb: Ele-axas hab Kises,

²²tabsis Ele-xas tuag thaus nwg tsi tau muaj tub lawm, nwg muaj ib paab ntxhais xwb. Nwg cov ntxhais txhaj moog yuav puab cov nug kwvtij kws yog Kises cov tub.

²³Melalis tug tub ob kws hu ua Musis, muaj peb tug tub: Mahalis, Edeles hab Yelemaus.

²⁴Cov nuav puavleej yog Levis cov xeebntxwv lug ntawm puab tej cuab kwvtij hab tej tsev tuabneeg, puab txhua tug puavleej tuaj sau npe lawv le puab tej caajceg. Levis cov xeebntxwv txhua tug kws noobnyoog muaj neeg nkaum xyoo rov sau, puavleej muab tsaa ua num nyob huv tug TSWV lub Tuamtsev.

²⁵Daviv has tas, “Tug TSWV kws yog cov Yixalayees tug Vaajtswv tau muab txujkev thaajyeeb pub rua nwg tsaav tuabneeg, hab nwg yuav nyob huv lub nroog Yeluxalees moog ibtxhis.

²⁶Cov Levis yuav tsi tau kwv tug TSWV lub Tsevntaub hab tej khoom siv pehawm Vaajtswv ntxiv lawm.”

²⁷Vim Daviv tej lug saamfwm thaus kawg, puab txhaj sau cov Levis kws noobnyoog muaj neeg nkaum xyoo rov sau npe ua cov kws ua Vaajtswv teg num;

²⁸hab tsaa puab ua tej num nuav: paab cov povthawj kws yog Aloos cov xeebntxwv ua num nyob huv tug TSWV lub Tuamtsev, ua cov saib cov tshaav puam, cov chaav huv lub Tuamtsev, hab ceev txhua yaam khoom tseemceeb huv Vaajtswv lub Tuamtsev;

²⁹ua cov paab saib tej ncuav kws coj tuaj tso rua sau rooj fij rua Vaajtswv, tej moov nplej kws coj tuaj ua khoom fij, tej ncuav tsi xyaw keeb, tej mov kws cub ua khoom fij, tej moov nplej kws zuaj xyaw roj txiv ntoo; tej khoom kws muab luj hab yeem tuaj fij huv lub Tuamtsev;

³⁰hab txhua taagkig puab yuavtsum sawv ntxuv moog qhuas hab ua Vaajtswv tsaug, thaus yaav tsaus ntuj los puab ua ib yaam nkaus,

³¹hab txhua zag kws hlawv khoom fij rua tug TSWV, tsi has nub Xanpataus, thaus hli xab hab lwm yaam kevcai, los puab yuavtsum ua kuas lawv le tej kevcai kws tub teev tseg lawm pub rua tug TSWV moog ibtxhis le.

³²Puab lub luag num yog ua cov saib hab tu tug TSWV lub Tsevntaub sis ntsib hab lub Tuamtsev, hab paab puab cov kwvtij kws yog Aloos cov xeebntxwv kws ua povthawj, huv lub Tuamtsev qhov chaw pehawm Vaajtswv.