Read Hmong Njua 1 Xwmtxheej Vaajntxwv 24 Bible Online

1 Xwmtxheej Vaajntxwv 24 - Hmong Njua bible

1 Xwmtxheej Vaajntxwv 24

¹Aloos cov xeebntxwv yog muaj lawv le nraag nuav. Aloos muaj plaub tug tub: Nadas, Anpihus, Ele-axas hab Ithamas.

²Nadas hab Anpihus xub tuag ua ntej dlua obtug txiv, hab obtug tsi muaj ib tug mivnyuas le, yog le ntawd, obtug ob tug kwv kws yog Ele-xas hab Ithamas txhaj tau lug ua povthawj.

³Vim muaj Xadaus kws yog Ele-axas tug xeebntxwv, hab muaj Ahimelej kws yog Ithamas tug xeebntxwv paab Daviv, nwg txhaj sau tau Aloos cov xeebntxwv lug ua tej paab lawv le puab tej luag num.

⁴Vim cov txivneej kws yog Ele-axas cov xeebntxwv ua thawjcoj coob dlua Ithamas cov xeebntxwv, puab txhaj muab Ele-axas cov xeebntxwv faib ua kaum rau paab, hab muab Ithamas cov xeebntxwv faib ua yim paab.

⁵Ele-axas hab Ithamas obtug cov xeebntxwv kws ua thawj huv lub Tuamtsev hab coj saab ntsujplig, puab rhu ntawv saib tau teg num twg ua.

⁶Ele-xas hab Ithamas cov xeebntxwv tuaj moog rhu ntawv ib tug dlhau rua ib tug. Puab tuaj sau npe rua ntawm Nethanees tug tub Semayas kws yog ib tug Levis. Muaj vaajntxwv hab nwg cov numtswv, tug povthawj Xadaus, Ahimelej tug tub Anpiyathas, cov thawjcoj ntawm cov povthawj hab cov Levis caajceg ua timkhawv.

⁷Rhu ntawv thawj zag tau rua Yehauyalis, rhu zag ob tau rua Yedayas,

⁸zag peb tau rua Halees, zag plaub tau rua Xe-aulees,

⁹zag tsib tau rua Makhiyas, zag rau tau rua Miyamees,

¹⁰zag xyaa tau rua Hakauxes, zag yim tau rua Anpiyas,

¹¹zag cuaj tau rua Yesuas, zag kaum tau rua Sekaniyas,

¹²zag kaum ib tau rua Eli-asis, zag kaum ob tau rua Yakees,

¹³zag kaum peb tau rua Hupas, zag kaum plaub tau rua Yesenpe-as,

¹⁴zag kaum tsib tau rua Npilenkas, zag kaum rau tau rua Imeles,

¹⁵zag kaum xyaa tau rua Hexiles, zag kaum yim tau rua Hapixes,

¹⁶zag kaum cuaj tau rua Pethahiyas, zag neeg nkaum tau rua Yehexekees,

¹⁷zag neeg nkaum ib tau rua Yakhees, zag neeg nkaum ob tau rua Nkamules,

¹⁸zag neeg nkaum peb tau rua Delayas hab zag neeg nkaum plaub tau rua Ma-axiyas.

¹⁹Cov tuabneeg nuav nyag muaj nyag teg num ua huv tug TSWV lub Tuamtsev lawv le puab yawmkoob Aloos tub muab cob rua puab hab lawv le tug TSWV kws yog cov Yixalayees tug Vaajtswv tau saamfwm tseg rua nwg lawm.

²⁰Levis cov xeebntxwv lwm paab muaj lawv le nuav: Yedeyas, yog Amelas ib tug xeebntxwv kws yog Senpuyees caajceg;

²¹Isiyas yog tug thawjcoj, nwg yog Lehanpiyas tug xeebntxwv;

²²Yahaj, yog Ixehas ib tug xeebntxwv kws yog Selaumaus caajceg.

²³Yeliyas Amaliyas, Yehaxiyees hab Yekamees yog Henploos cov tub lawv le puab tej noobnyoog;

²⁴Samiles, yog Uxiyees ib tug xeebntxwv kws yog Mikas caajceg;

²⁵Xakhaliyas yog Uxiyees ib tug xeebntxwv kws yog Mikas tug kwv Isiyas caajceg;

²⁶Mahelis, Musis hab Yaxiyas yog Melalis cov xeebntxwv.

²⁷Yaxiyas muaj peb tug tub: Sauhas, Xakules hab Inpelis.

²⁸Mahelis tug tub: Ele-axas tsi muaj tub le;

²⁹tabsis Mahelis tug tub Kises muaj ib tug tub hu ua Yelamees.

³⁰Musis muaj peb tug tub: Mahelis, Edeles hab Yelemaus. Cov nuav puavleej yog Levis caajceg lawv le puab cov yawmkoob.

³¹Txhua tug thawj ntawm txhua tsev tuabneeg hab ntawm nwg tug kwv ntxawg puavleej tau rhu ntawv ib yaam nkaus le puab cov kwvtij kws yog Aloos cov xeebntxwv taabmeeg Vaajntxwv Daviv, Xadaus, Ahimelej hab txhua tug thawjcoj ntawm cov povthawj hab cov Levis.