Read Hmong Njua 2 Xwmtxheej Vaajntxwv 13 Bible Online

2 Xwmtxheej Vaajntxwv 13 - Hmong Njua bible

2 Xwmtxheej Vaajntxwv 13

¹Thaus Yelaunpau-aas ua vaajntxwv kaav tebchaws Yixalayees tau kaum yim xyoo, Anpiyas maam le ua vaajntxwv kaav tebchaws Yudas,

²hab nwg nyob huv lub nroog Yeluxalees kaav tau peb xyoos, nwg nam hu ua Ma-akas kws yog Uliyees kws nyob huv lub nroog Nkipe-as tug ntxhais. Anpiyas hab Yelaunpau-aas obtug ib leeg ua rog rua ib leeg.

³Anpiyas txhij tau plaub puas txheeb leej tubrog, hab Yelaunpau-aas txhij tau yim pua txheeb leej tubrog tuaj sis tua.

⁴Anpiyas cov tubrog hab Yelaunpau-aas cov tubrog tuaj sis ntsib ntawm lub laaj roob Efalayees. Vaajntxwv Anpiyas txawm moog tuaj sau Roob Xemalayees qw nrov nrov rua Yelaunpau-aas hab cov Yixalayees has tas, “Mej ca le noog kuv has,

⁵mej puas paub has tas, tug TSWV kws yog cov Yixalayees tug Vaajtswv yeej coglug ruaj khov rua Daviv lawm has tas, Daviv cov xeebntxwv yuav tau ua vaajntxwv kaav tebchaws Yixalayees moog ibtxhis, tsi muaj leejtwg yuav rhuav tau le nua los?

⁶Txawm le ntawd los Nenpas tug tub Yelaunpau-aas tau ntxeev sab rua Xalumoos kws yog nwg tug vaajntxwv.

⁷Tom qaab ntawd, Yelaunpau-aas yum ib paab tuabneeg tsi tseemceeb tuaj yuam Xalumoos tug tub Lehaunpau-aas kws tseem tsi tau paub qaabhau, nwg txhaj tawmtsaam tsi yeej puab.

⁸Nwgnuav mej xaav has tas mej muaj peevxwm tuaj tua tug TSWV lub tebchaws kws nwg muab rua Daviv cov xeebntxwv, rua qhov mej muaj tubrog coob hab muaj tej mlom nyuj kws Yelaunpau-aas muab kub nchuav ua mej tej vaajtswv.

⁹Mej tau muab tug TSWV cov povthawj kws yog Aloos cov xeebntxwv hab cov Levis ntab tawm tsiv. Mej xaiv dlua ib cov lug ua povthawj hloov puab chaw, mej ua lawv le lwm tsaav tuabneeg ua, yog leejtwg caab ib tug nyuj lossis xyaa tug yaaj tuaj rua mej, mej txawm tsaa tug ntawd ua povthawj rua mej cov vaajtswv.

¹⁰Tabsis peb tseem pehawm tug TSWV kws yog peb tug Vaajtswv hab peb tsi tso nwg tseg le. Cov povthawj kws yog Aloos cov xeebntxwv tseem ua puab teg num, hab cov Levis los tseem paab puab.

¹¹Puab naj taagkig hab naj mo hlawv moov tshuaj tsw qaab hab tua tsaj hlawv taagnrho fij rua tug TSWV. Puab muab ncuav tso rua sau lub rooj kws tub ua kevcai ntxuav huv lawm, hab txhua mo puab taws cov teeb kws muab kub ua cov ncej. Peb tseem ua le tug TSWV tej lug saamfwm, tabsis mej tso tug TSWV tseg lawm.

¹²Vaajtswv yog peb tug thawjcoj hab nwg cov povthawj tuav rawv xyu nyob rua ntawm nuav npaaj yuav tshuab txhib peb cov tubrog tuaj tua mej. Cov Yixalayees, mej tsi xob ua rog rua tug TSWV kws yog mej cov yawmkoob tug Vaajtswv. Mej yuav tsi yeej nwg le!”

¹³Thaus Yelaunpau-aas hab nwg cov tubrog tseem nyob ntawm cov Yudas hauv ntej, nwg tub tso ibtxha nyaag tom qaab tuaj tua cov Yudas lawm.

¹⁴Cov Yudas tig saib, ua caag luas tub tuaj vij puab taag lawm. Puab quaj thov tug TSWV paab, hab cov povthawj txawm tshuab xyu.

¹⁵Cov Yudas qw nrov nrov hab moog tua cov Yixalayees, thaus puab qw ntawd, tug TSWV paab Anpiyas hab cov Yudas tua yeej Yelaunpau-aas hab cov Yixalayees.

¹⁶Cov Yixalayees tsiv cov Yudas, tabsis Vaajtswv muab puab cob taag rua cov Yudas teg.

¹⁷Anpiyas hab nwg cov tubrog tua cov Yixalayees tej tubrog kws ua tau heev tuag taag lawm tsib puas txheeb leej.

¹⁸Cov Yudas tua yeej cov Yixalayees, rua qhov puab muab sab npuab tug TSWV kws yog puab cov yawmkoob tug Vaajtswv.

¹⁹Anpiyas caum Yelaunpau-aas cov tubrog tua hab txeeb tau Yelaunpau-aas cov nroog nuav: Npethees, Yesanas, Efeloos hab tej zog kws nyob ibncig cov nroog ntawd.

²⁰Yelaunpau-aas tsi muaj nub kovyeej Anpiyas moog txug thaus kws Vaajtswv muab Yelaunpau-aas tua tuag.

²¹Anpiyas muaj fwjchim heev zuj zug, nwg muaj kaum plaub tug quaspuj, neeg nkaum ob tug tub hab kaum rau tug ntxhais.

²²Anpiyas lub neej, tej kws nwg has tej kws nwg ua puavleej muab sau ca rua huv Idaus kws yog tug cev Vaajtswv lug Phoo Ntawv Keebkwm lawm.