Read Hmong Njua 2 Xwmtxheej Vaajntxwv 2 Bible Online

2 Xwmtxheej Vaajntxwv 2 - Hmong Njua bible

2 Xwmtxheej Vaajntxwv 2

¹Vaajntxwv Xalumoos ua lub Tuamtsev ua qhov chaw rua suavdlawg tuaj pehawm tug TSWV hab ua ib lub loog rua nwg.

²Nwg muaj xyaa caum txheeb leej txivneej ua cov nqaa pobzeb, yim caum txheeb leej txivneej ua cov txaug pobzeb hab peb txheeb rau pua leej ua cov saib hab qha puab ua num.

³Xalumoos xaa xuv moog rua Vaajntxwv Hilaas tug kws kaav lub nroog Tiles has tas, “Thov koj xaa ntoo cab tuaj rua kuv ib yaam le thaus koj tau xaa tuaj rua kuv txiv kws yog Vaajntxwv Daviv ua nwg lub loog lawm.

⁴Kuv taabtom ua lub Tuamtsev rua tug TSWV kws yog kuv tug Vaajtswv, hab muab fij rua nwg ua qhov chaw rua kuv hab cov pejxeem pehawm nwg, hlawv moov tshuaj tsw qaab, fij tej ncuav tsi xyaw keeb hab tua tsaj hlawv fij thaus sawv ntxuv hab thaus yuav tsaus ntuj, Nub Xanpataus hab rooj noj rooj haus Nub Hlis Xab. Hab tej nub su kws ua kevcai qhuas tug TSWV kws yog peb tug Vaajtswv. Tug TSWV saamfwm kuas cov Yixalayees ua le nuav moog ibtxhis le.

⁵Kuv npaaj ua ib lub Tuamtsev kws zoo heev, rua qhov peb tug Vaajtswv yog tug kws muaj fwjchim luj dlua tej vaajtswv huv tuabsi.

⁶Tabsis yeej tsi muaj leejtwg yuav ua tau lub tsev kws txaus Vaajtswv nyob, txawm yog lub ntuj lub teb los tub tsi txaus nwg nyob. Yog le ntawd lub Tuamtsev kws kuv ua nuav, tsuas yog ua qhov chaw hlawv moov tshuaj tsw qaab fij rua Vaajtswv xwb.

⁷Koj xaa ib tug tuabneeg kws txawj nchuav kub, nchuav nyaj, nchuav tooj, nchuav hlau hab txawj ntus ntaub xav, ntaub paajyeeb ntshaa, hab ntaub lab tuaj rua kuv. Nwg yuav ua num nrug cov kws txua ntoo nyob huv tebchaws Yudas hab huv lub nroog Yeluxalees kws kuv txiv Daviv tau xaiv tseg lawm.

⁸Kuv paub has tas, koj muaj cov kws txawj txua ntoo heev. Yog le ntawd, thov koj xaa ntoo cab, ntoo thuv hab ntoo thwjsuab peg roob Lenpanoos tuaj rua kuv. Kuv tub npaaj yuav xaa kuv cov tuabneeg tuaj paab koj cov tuabneeg

⁹txav kuas tau ntoo ntau heev tuaj rua kuv, rua qhov lub Tuamtsev kws kuv yuav ua ntawd luj hab zoo heev.

¹⁰Kuv yuav xaa ib puas txheeb kawm moov qeb, ib puas txheeb kawm moov nplej, neeg nkaum ob txheeb thoob cawv txiv maab, hab neeg nkaum ob txheeb thoob roj txiv ntoo tuaj rua koj cov tuabneeg ua num noj.”

¹¹Vaajntxwv Hilaas sau ntawv tuaj teb Vaajntxwv Xalumoos has tas, “Tug TSWV hlub nwg tsaav tuabneeg, nwg txhaj tsaa koj ua vaajntxwv.

¹²Ca le qhuas tug TSWV kws yog cov Yixalayees tug Vaajtswv kws tsim lub ntuj hab lub nplajteb! Nwg pub Daviv muaj ib tug tub txawj ntse, muaj laajlim tswvyim hab thoob tsib to nrog kws nwgnuav taabtom ua lub Tuamtsev rua tug TSWV hab ib lub loog rua nwg.

¹³Kuv yuav xaa ib tug tuabneeg kws txawj txua ntoo tuaj rua koj. Nwg lub npe hu ua Hulaas.

¹⁴Nwg nam yog xeem Daas hab nwg txiv yog tuabneeg nyob huv lub nroog Tiles. Hulaas txawj nchuav nyaj, nchuav kub, nchuav tooj, nchuav hlau, txawj txaug pobzeb hab txaug ntoo. Nwg txawj ntus ntaub xav, ntaub paajyeeb ntshaa, ntaub lab hab ntaub maag. Nwg txawj txaug txhua yaam lawv le tej qauv kws luas muab rua nwg ua. Ca nwg ua num nrug koj cov tuabneeg txua ntoo kws ua num rua koj txiv kws yog Vaajntxwv Daviv.

¹⁵Nwgnuav koj xaa tej moov qeb, moov nplej, roj txiv ntoo hab cawv txiv maab tuaj rua kuv lawv le koj tau coglug tseg lawm.

¹⁶Peb yuav moog txav tej ntoo cab sau Roob Lenpanoos kws koj xaav tau muab paav hab tso rua huv havtxwv, hab yuav muab nkuam tuaj rua ntawm lub nroog Yaupas, koj maam tuaj coj moog rua huv Yeluxalees.”

¹⁷Vaajntxwv Xalumoos txheeb cov tuabneeg txawv tebchaws kws nyob huv tebchaws Yixalayees tej npe. Qhov kws Xalumoos txheeb npe nuav, nwg ua ib yaam le nwg txiv Daviv tau ua lug lawm. Puab txheeb tau ib puas tsib caug peb txheeb rau pua leej tuabneeg txawv tebchaws nyob huv puab lub tebchaws.

¹⁸Xalumoos muab xyaa caum txheeb leej ua cov kws nqaa pobzeb, yim caum txheeb leej ua cov txaug pobzeb sau tej roob, peb txheeb rau pua leej ua cov saib hab qha cov tuabneeg ua num kuas tav.