Read Hmong Njua 2 Xwmtxheej Vaajntxwv 30 Bible Online

2 Xwmtxheej Vaajntxwv 30 - Hmong Njua bible

2 Xwmtxheej Vaajntxwv 30

¹Cov tuabneeg tuaj ua tsi tau Kevcai Hlaa Dlhau rua thaus lub ib hlis ntuj lawv le lub sijhawm kws teem tseg, rua qhov cov povthawj kws tub ua kevcai ntxuav kuas huv tseem muaj tsawg hab tuabneeg tseem tsi tau tuaj txhij rua huv lub nroog Yeluxalees. Yog le ntawd, Vaajntxwv Hexekiyas, cov numtswv hab cov pejxeem kws nyob huv lub nroog Yeluxalees txhaj pum zoo ca ua Kevcai Hlaa Dlhau rua thaus lub ob hlis ntuj. Vaajntxwv txhaj xaa xuv moog thoob plawg cov Yixalayees hab cov Yudas hab vaajntxwv xaa ntawv moog caw xeem Efalayees hab xeem Manaxes, kuas tuaj rua ntawm lub Tuamtsev huv lub nroog Yeluxalees hab ua Kevcai Hlaa Dlhau qhuas tug TSWV kws yog cov Yixalayees tug Vaajtswv.

⁴Vaajntxwv hab cov pejxeem suavdlawg txaus sab rua qhov kws puab npaaj ntawd,

⁵yog le ntawd, puab txhaj caw taagnrho cov Yixalayees, txij ndlua peg lub nroog Daas moog txug nraag lub nroog Npesenpas kuas tuaj rua huv lub nroog Yeluxalees hab ua Kevcai Hlaa Dlhau lawv le txuj kevcai. Zag nuav tuabneeg tuaj coob tshaaj txhua zag.

⁶Cov tuabneeg xaa xuv txawm moog thoob plawg cov Yixalayees hab cov Yudas lawv le vaajntxwv hab cov numtswv kuas puab moog caw suavdlawg has tas, “Cov pejxeem Yixalayees, mej tub tsiv dlim ntawm cov Axilias lawm, yog le ntawd, mej ca le lug cuag tug TSWV kws yog Anplahaas, Ixaj hab Yakhauj tug Vaajtswv, nwg txhaj yuav lug cuag mej.

⁷Mej tsi xob ua ib yaam le kws mej cov yawmkoob hab mej cov kwvtij Yixalayees kws tsi muab sab npuab tug TSWV kws yog puab tug Vaajtswv. Mej tub pum ntsoov nwg rau txim rua puab nyaav kawg le.

⁸Mej tsi xob ua tuabneeg tawv ncauj le puab, tabsis mej yuavtsum noog tug TSWV lug. Mej ca le tuaj rua ntawm lub Tuamtsev huv lub nroog Yeluxalees, qhov chaw kws tug TSWV kws yog mej tug Vaajtswv muab ua qhov chaw dlawbhuv, hab pehawm nwg moog ibtxhis, yog le ntawd, nwg txhaj yuav tsi chim rua mej lawm.

⁹Yog mej rov lug cuag tug TSWV, cov tuabneeg kws nteg mej tej kwvtij moog lawm, yuav hlub puab hab tso puab rov lug tsev. Tug TSWV kws yog mej tug Vaajtswv, nwg yog tug sab dlawb sab zoo hab muaj kev hlub tshua. Yog mej lug cuag nwg, nwg yuav leeg yuav mej.”

¹⁰Cov tuabneeg xaa xuv moog thoob plawg txhua lub nroog huv xeem Manaxes, hab huv xeem Efalayees cheebtsaam aav, hab moog txug peg xeem Xenpuloos kws nyob saab qaumteb, tabsis puab luag cov tuabneeg xaa xuv plig hab muab puab tso dlaaj tso luag.

¹¹Txawm le ntawd los tseem muaj qee leej kws nyob rua huv xeem Aseles, Manaxes hab Xenpuloos kws txaus sab yuav tuaj rua huv lub nroog Yeluxalees.

¹²Vaajtswv tseem nyob nrug cov Yudas kuas puab ua tau ib lub sab noog nwg lug hab ua lawv le vaajntxwv hab nwg cov numtswv tej lug saamfwm.

¹³Thaus lub ob hlis ntuj tuabneeg tuaj coob heev rua huv lub nroog Yeluxalees, hab ua Kevcai noj Ncuav tsi xyaw Keeb.

¹⁴Puab muab tej thaaj kws hlawv khoom fij hab hlawv tshuaj tsw qaab huv lub nroog Yeluxalees coj moog pov rua huv lub Haav Kiloos.

¹⁵Lub ob hlis ntuj nub kaum plaub, puab tua cov thaav yaaj fij ua Kevcai Hlaa Dlhau. Cov povthawj hab cov Levis kws tsi tau ua kevcai ntxuav kuas huv, puab txaajmuag kawg le, puab txhaj ua kevcai ntxuav kuas huv hab tua tsaj hlawv fij rua huv lub Tuamtsev.

¹⁶Puab rov moog ua puab teg num huv lub Tuamtsev, lawv le Mauxes kws yog Vaajtswv tug tuabneeg txuj Kevcai. Cov Levis muab cov taig ntshaav rua cov povthawj coj moog nchus rua lub thaaj.

¹⁷Rua qhov tseem tshuav tuabneeg coob tsi tau ua kevcai ntxuav kuas huv, cov Levis txhaj tua cov thaav yaaj fij ua Kevcai Hlaa Dlhau rua cov kws tsi tau ua kevcai ntxuav ntawd.

¹⁸Dlua le ntawd, xeem Efalayees, xeem Manaxes, xeem Ixakhas, hab xeem Xenpuloos tseem muaj cov kws tsi tau ua kevcai ntxuav kuas huv coob heev, yog le ntawd, qhov kws puab tuaj ua Kevcai Hlaa Dlhau, puab ua tsi lawv le txuj kevcai. Vaajntxwv Hexekiyas txhaj thov Vaajtswv paab rua puab has tas,

¹⁹“Tug TSWV kws yog peb cov yawmkoob tug Vaajtswv, koj yog tug muaj lub sab dlawb sab zoo, thov koj zaam txim rua cov tuabneeg kws tuaj ua kevcai ntxuav kuas huv nuav.”

²⁰Tug TSWV teb Hexekiyas tej lug thov hab zaam txim rua puab.

²¹Suavdlawg tuaj ua Kevcai noj Ncuav tsi xyaw Keeb huv lub nroog Yeluxalees tau xyaa nub, puab zoo sab kawg le, cov povthawj hab cov Levis naj nub qhuas tug TSWV kawg puab tug dlaag tug zug.

²²Vaajntxwv Hexekiyas qhuas cov Levis qhov kws puab txawj coj suavdlawg pehawm tug TSWV tau zoo heev. Puab noj tej zaub mov kws ua kevcai hab tua tsaj fij rua tug TSWV kws yog puab cov yawmkoob tug Vaajtswv hab ua nwg tsaug tau xyaa nub,

²³ces puab pum zoo rov ua rooj noj rooj haus xyaa nub ntxiv. Yog le ntawd, puab txhaj ua rooj noj rooj haus lomzem hab zoo sab heev.

²⁴Vaajntxwv Hexekiyas muab ib txheeb tug txiv nyuj, xyaa txheeb tug yaaj, hab cov numtswv muab ib txheeb tug txiv nyuj hab kaum txeeb tug yaaj rua cov pejxeem tua noj. Cov povthawj kws ua kevcai ntxuav kuas huv muaj coob heev.

²⁵Yog le ntawd, puab txhua tug zoo sab heev, tsi has cov Yudas, cov povthawj, cov Levis hab cov pejxeem Yixalayees kws tuaj peg qaumteb tuaj, hab cov tuabneeg kws nyob huv tebchaws Yixalayees hab tebchaws Yudas.

²⁶Suavdlawg muaj kev lomzem zoo sab thoob plawg huv lub nroog Yeluxalees, rua qhov txij thaus Vaajntxwv Xalumoos kws yog Daviv tug tub lug tsi tau muaj dlua rooj noj rooj haus luj le nuav.

²⁷Cov povthawj hab cov Levis thov tug TSWV foom koob moov rua cov pejxeem suavdlawg. Vaajtswv nyob sau ntuj kws yog nwg qhov chaw dlawbhuv nov puab tej lug thov hab foom koob moov rua puab.