Read Hmong Njua 2 Xwmtxheej Vaajntxwv 31 Bible Online

2 Xwmtxheej Vaajntxwv 31 - Hmong Njua bible

2 Xwmtxheej Vaajntxwv 31

¹Tom qaab kws puab ua rooj noj rooj haus dlhau lawm, cov Yixalayees moog thoob plawg txhua lub nroog huv tebchaws Yudas hab tsoo tej ncej zeb, ntuv tug mlom quaspuj Aselas, rhuav tej thaaj fij hab tej chaw teev dlaab. Puab ua le ntawd moog thoob plawg huv tebchaws Yudas hab thoob plawg huv xeem Npeenyamees, xeem Efalayees, hab xeem Manaxes cheebtsaam aav huv tuabsi, ces puab maam rov lug tsev.

²Vaajntxwv Hexekiyas faib num rua cov povthawj hab cov Levis kuas nyag ua nyag lub luag num kws muab cob rua puab lawm. Puab teg num yog hlawv khoom fij, fij khoom ua kev sis raug zoo, ua Vaajtswv teg num huv lub Tuamtsev, qhuas hab ua Vaajtswv tsaug huv lub Tuamtsev.

³Tej tsaj kws hlawv fij thaus sawv ntxuv hab thaus tsaus ntuj, cov kws tua fij Nub Xanpataus, Nub Hli Xab hab lwm yaam kevcai lawv le tug TSWV txuj kevcai has tseg puavleej yog vaajntxwv muab.

⁴Dlua le ntawd, vaajntxwv has kuas cov tuabneeg kws nyob huv lub nroog Yeluxalees coj tej khoom fij kws yog cov povthawj hab cov Levis tug, tuaj rua puab, puab txhaj muaj sijhawm ua num lawv le tug TSWV txuj kevcai qha tseg.

⁵Thaus cov Yixalayees nov vaajntxwv tej lug saamfwm lawm, puab coj tej qoobloo kws zoo heev, tsi has nplej, txiv maab, roj txiv ntoo, zib ntaab hab lwm yaam kws puab cog hab sau tau lug ntawm puab tej qoobloo thawj phaum hab puab coj ib feem kaum ntawm txhua yaam kws puab muaj tuaj.

⁶Taagnrho tej tuabneeg kws nyob huv txhua lub nroog huv tebchaws Yudas coj puab tej nyuj, tej yaaj kws yog ib feem kaum hab puab tseem coj ntau yaam tuaj fij rua tug TSWV kws yog puab tug Vaajtswv.

⁷Thaus lub peb hlis, puab pib coj tej khoom pub ntawd tuaj teeb moog txug lub xyaa hli maam taag.

⁸Vaajntxwv Hexekiyas hab nwg cov numtswv pum suavdlawg coj khoom tuaj ntau heev lawm, puab txawm ua tug TSWV tsaug, hab foom koob moov rua cov pejxeem.

⁹Vaajntxwv qha tej khoom pub nuav rua cov povthawj hab cov Levis,

¹⁰hab tug Povthawj Hlub Axaliyas kws yog Xadaus tug xeebntxwv has rua vaajntxwv tas, “Txij thaus cov pejxeem pib nqaa puab tej khoom pub tuaj rua huv lub Tuamtsev, peb muaj noj muaj haus nplua mag. Peb tau txais txhua yaam nuav tub yog tug TSWV tau foom koob moov rua nwg tsaav tuabneeg.”

¹¹Vaajntxwv has kuas puab ua ib cov chaav rau khoom rua huv lub Tuamtsev,

¹²puab muab tej khoom pub hab cov ib feem kaum ntawd coj moog ca rua huv cov chaav ntawd. Puab tsaa ib tug Levis hu ua Kaunaniyas ua tug saib tej khoom ntawd hab tsaa nwg tug kwv Sime-is ua tug paab nwg.

¹³Vaajntxwv Hexekiyas hab tug Povthawj Hlub Axaliyas tsaa cov Levis kaum leej kws yog: Yehiyees, Axaxiyas, Nahas, Axahees, Yelimaus, Yauxanpas, Eliyees, Imakiyas, Mahas hab Npenayas ua cov paab Kaunaniyas hab Sime-is.

¹⁴Imenas kws yog xeem Levis tug tub Kaules, nwg yog tug thawj kws saib lub Roojvaag Nubtuaj ntawm lub Tuamtsev, ua tug kws txais tej khoom pub kws suavdlawg coj tuaj fij rua tug TSWV hab muab tej khoom ntawd faib.

¹⁵Edees, Minimees, Yesuas, Semayas, Amaliyas hab Sekaniyas kws yog cov povthawj nyob rua tej lub nroog, faib tej zaub mov rua cov Levis sis npaug zog lawv le puab teg num,

¹⁶tabsis tsi yog faib lawv le tej cuab kwvtij. Puab faib rua cov txivneej txhua tug kws noobnyoog peb caug xyoo lossis laug dlua ntawd kws naj nub tuaj ua num huv lub Tuamtsev lawv le puab teg num xwb.

¹⁷Luas faib num rua cov povthawj lawv le tej cuab hab luas faib num rua cov Levis kws noobnyoog neeg nkaum xyoo rov sau lawv le puab tej paab.

¹⁸Puab coj puab tej quaspuj mivnyuas moog sau npe, rua qhov puab yog cov kws muaj lub sab ncaaj nceeg hab tswj puab kuas ua tau tuabneeg dlawbhuv.

¹⁹Cov povthawj kws yog Aloos cov xeebntxwv kws nyob huv tej nroog lossis tom puab tej teb hab huv tej zog kws nyob ibncig tej nroog. Puab yog cov kws faib zaub mov rua cov txivneej kws yog cov povthawj tsev tuabneeg hab txhua tug kws sau npe zwm rua cov Levis txhua cuab.

²⁰Vaajntxwv Hexekiyas ua nwg teg num ncaaj nceeg thoob plawg tebchaws Yudas hab ua hum tug TSWV kws yog nwg tug Vaajtswv sab.

²¹Txhua yaam kws vaajntxwv ua, tsi has ua lub Tuamtsev, lossis ua lawv le tug TSWV tej kevcai, nwg muab sab rau nrhav Vaajtswv, hab muab sab npuab Vaajtswv kawg sab kawg ntsws, nwg teg num txhaj vaammeej.