Read Hmong Njua 2 Xwmtxheej Vaajntxwv 7 Bible Online

2 Xwmtxheej Vaajntxwv 7 - Hmong Njua bible

2 Xwmtxheej Vaajntxwv 7

¹Thaus Vaajntxwv Xalumoos thov Vaajtswv taag, suavtawg txawm poob sau ntuj lug kub tej khoom kws puab coj tuaj fij hab tug TSWV tug tshwjchim kws ci ntsaa ab puv nkaus huv lub Tuamtsev.

²Rua qhov tug TSWV tug tshwjchim ci ntsaa ab puv nkaus huv lub Tuamtsev, cov povthawj txhaj moog tsi tau rua huv.

³Thaus cov Yixalayees pum suavtawg poob sau ntuj lug hab tug TSWV tug tshwjchim ci puv nkaus huv lub Tuamtsev, puab txhus caug ua ntsejmuag ti nkaus rua huv aav pehawm Vaajtswv hab qhuas nwg txujkev ua sab dlawb sab zoo hab txujkev hlub kws nyob moog ibtxhis.

⁴Ces Xalumoos hab cov pejxeem txawm muab tsaj tua fij rua tug TSWV.

⁵Nwg muab neeg nkaum ob txheeb tug nyuj fij hab ib puas neeg nkaum txheeb tug yaaj tua fij ua kev sis raug zoo. Yog le ntawd vaajntxwv hab cov pejxeem txhaj muab lub Tuamtsev fij rua Vaajtswv.

⁶Cov povthawj moog sawv ntawm qhov chaw kws npaaj tseg rua puab. Cov Levis sawv tig xubndlag rua ntawm puab, tshuab tej raaj tej xyu kws Vaajntxwv Daviv tub npaaj tseg, hab hu nkauj qhuas tug TSWV has tas, “Thov kuas nwg txujkev hlub nyob moog ibtxhis!” lawv le Daviv tau has tseg rua puab lawm. Thaus cov povthawj tshuab raaj tshuab xyu hab cov pejxeem suavdlawg sawv ntsug.

⁷Xalumoos muab thaaj aav huv plawv lub tshaav puam kws nyob ntawm hauv ntej lub Tuamtsev ua kevcai ntxuav kuas huv, nwg muab tej tsaj tua hlawv fij taagnrho, muab tej qoobloo fij hab muab tej paavywj fij ua kev sis raug zoo. Nwg ua le ntawd rua qhov lub thaaj tooj kws nwg ua miv heev, tsi txaus hlawv tej khoom fij ntawd.

⁸Xalumoos hab cov pejxeem Yixalayees ua Kevcai Nyob Tsev Pheebsuab hab noj haus tau xyaa nub. Tej tuabneeg coob kawg le tuaj peg lub Dlawm Hamas, hab nraag nrim tebchaws Iziv tuaj huv tuabsi.

⁹Puab ua Kevcai fij lub thaaj tau xyaa nub txwm nkaus hab puab tseem ua rooj noj rooj haus tau xyaa nub ntxiv. Hab puab xaus rooj noj rooj haus rua nub kawg,

¹⁰hab nub tom qaab kws yog lub xyaa hli ntuj nub neeg nkaum peb, Xalumoos maam tso cov pejxeem moog tsev. Puab zoo sab heev rua tej koob moov kws tug TSWV pub rua Daviv, Xalumoos hab nwg tsaav tuabneeg Yixalayees.

¹¹Tom qaab kws Vaajntxwv Xalumoos ua tau lub Tuamtsev, lub loog hab txhua yaam kws nwg npaaj sab ua tav taag lawm,

¹²muaj ib mos tug TSWV rov lug tshwm rua Xalumoos pum. Tug TSWV has rua Xalumoos has tas, “Kuv tub nov koj tej lug thov, hab kuv leeg yuav lub Tuamtsev nuav ua qhov chaw fij khoom rua kuv.

¹³Thaus twg kws kuv tsi tso naag lug lossis tso kooj txomfaav lug noj tej qoobloo lossis kuv tso kaab mob kis lug rua kuv tsaav tuabneeg,

¹⁴yog puab thov kuv hab puab hloov sab tso puab tej kev phem kev qas kws puab ua tseg, ces kuv yuav nyob sau ntuj noog puab tej lug thov, zaam txim rua puab hab pub kuas puab lub tebchaws rov vaammeej dlua.

¹⁵Kuv yuav saib ntsoov lub Tuamtsev hab noog puab tej lug thov ntawm qhov chaw nuav.

¹⁶Rua qhov kuv xaiv qhov chaw nuav hab tshwj ua qhov chaw rua suavdlawg tuaj pehawm kuv moog ibtxhis. Kuv yuav saib hab tiv thaiv txhua lub sijhawm.

¹⁷Yog koj muaj lub sab ncaaj nceeg pehawm kuv ib yaam le koj txiv Daviv, coj lawv le kuv tej kevcai hab ua txhua yaam lawv le kuv tub saamfwm rua koj lawm,

¹⁸kuv yuav ua lawv le tej lug kws kuv cog tseg rua koj txiv Daviv thaus kws kuv has rua nwg tas, nwg cov xeebntxwv yuav tau ua cov tswjfwm cov Yixalayees moog ibtxhis le.

¹⁹Tabsis yog koj hab koj cov pejxeem tsi ua lawv le kuv tej kevcai hab tej lug saamfwm kws kuv muab rua mej lawm, hab moog pe luas tej vaajtswv,

²⁰ces kuv yuav muab koj ntab tawm huv lub tebchaws kws kuv muab rua mej lawm, hab kuv yuav muab lub Tuamtsev kws kuv leeg yuav ua qhov chaw tseemceeb rua suavdlawg tuaj pehawm kuv tso povtseg. Tej tuabneeg nyob txhua qhov yuav luag cov Yixalayees plig hab saib lub Tuamtsev tsi muaj nqes.

²¹“Nwgnuav luas qhuas lub Tuamtsev nuav heev, tabsis muaj ib nub tej tuabneeg kws dlua kev moog lug yuav xaav tsi thoob hab nug has tas, ‘Vim le caag tug TSWV txhaj ua le nuav rua lub tebchaws hab lub Tuamtsev nuav?’

²²Tej tuabneeg yuav teb has tas, ‘Vim puab tso tug TSWV kws yog puab tug Vaajtswv kws coj puab cov yawmkoob tawm nraag tebchaws Iziv lug tseg lawm. Puab moog pe luas tej vaajtswv. Yog le ntawd tug TSWV txhaj tso kev puamtsuaj lug rua puab.’ ”