Read Hmong Njua Nehemis 2 Bible Online

Nehemis 2 - Hmong Njua bible

Nehemis 2

¹Tau plaub lub hlis tom qaab nuav, muaj ib nub thaus Fuabtais Ataxawxes tseem taabtom noj mov, kuv laub cawv txiv maab moog rua nwg haus. Yaav taag lug nwg tsi tau pum dlua kuv ua ntsejmuag mluag mlob le nuav,

²fuabtais txhaj le nug kuv has tas, “Vim le caag koj yuav mluag ua luaj? Koj tub tsi mob qhov twg ne, ua caag zoo le koj yuav nyuaj sab ua luaj?”

³Kuv poob sab nthaav, kuv txhaj teb nwg has tas, “Thov kuas fuabtais muaj sa nyob moog ibtxhis! Kuv yuav ua le caag zais tau kuv lub ntsejmuag kws muaj kev nyuaj sab rua lub tsaamthawj kws lub nroog kws yog thaaj chaw thaus u muab kuv cov yawmkoob log rua pob puag taag hab tej roojvaag nroog los raug luas muab hlawv kub nyab taag huv tuabsi lawm?”

⁴Fuabtais txhaj le nug kuv has tas, “Yog le ntawd koj xaav tau dlaabtsi?” Kuv thov Vaajtswv tug kws nyob sau ntuj,

⁵hab kuv has rua fuabtais has tas, “Yog koj txaus sab rua kuv hab yuav pub lawv le kuv tej lug thov, mas thov koj tso kuv rov moog rua tim tebchaws Yudas, moog rua huv lub nroog kws yog thaaj chaw log kuv cov yawmkoob, kuv yuav moog txhim khu lub nroog ntawd dlua tshab.”

⁶Fuabtais pum zoo le kws kuv tau thov. (Nam Fuabtais nyob ntawm fuabtais ib saab.) Fuabtais txhaj nug kuv has tas, “Koj yuav moog ntev le caag koj maam le rov lug?” Kuv txhaj qha lub sijhawm rua nwg paub.

⁷Ces kuv txhaj thov fuabtais sau ib tsaab ntawv rua kuv nqaa moog rua tug tswv xeev kws kaav lub xeev ntawm tug Dlej Efalates saab nubpoob; kuas kuv txhaj moog tau rua nraag tebchaws Yudas.

⁸Hab kuv tseem thov fuabtais sau ib tsaab ntawv rua Axas, tug kws zuv fuabtais tej haav zoov, kuas txav ntoo pub rua kuv coj moog ua cov roojvaag ntawm cov chaw faajxwm rua cov tuabneeg kws nyob zuv lub Tuamtsev, ua tej ntsaa yeej thaiv lub nroog hab ua ib lub tsev rua kuv nyob. Fuabtais ua txhua yaam rua kuv lawv le kuv tau thov, rua qhov Vaajtswv nrug nraim kuv nyob.

⁹Fuabtais tau tso ib cov tubrog moog kutaw hab ib cov tubrog caij neeg nrug kuv moog, ces kuv txhaj le sawv kev moog rua ntawm tug Dlej Efalates saab nubpoob. Thaus kuv moog txug lawm, kuv txhaj le muab fuabtais cov ntawv rua tug tswv xeev.

¹⁰Tabsis Xanpalas kws yog tuabneeg nyob huv lub nroog Npethes Hauloos hab Taunpias kws yog ib tug nom nyob huv lub xeev Amoos nov has tas, muaj ib cov tuabneeg tau lug paab ua num kuas cov Yixalayees tau zoo, mas obtug chim kawg le.

¹¹Kuv txhaj le moog kag rua huv lub nroog Yeluxalees, tau peb nub nkaus,

¹²kuv yeej tsi qha rua leejtwg paub txug qhov kws Vaajtswv tshoov kuv sab kuas kuv lug khu lub nroog Yeluxalees le. Ces thaus ib taag mo kuv txhaj le sawv hab coj kuv cov phoojywg qee leej nrug kuv tawm moog, tabsis tsi tau neeg txhua rua peb caij, tsuas tau ib tug neeg luav rua kuv caij xwb.

¹³Thaus tsaus ntuj kuv txhaj tawm huv lub nroog moog rua ntawm lub Roojvaag Haav kws nyob rua saab nubpoob hab kuv ncig moog rua saab qaabteb moog hlaa lub Qhovdlej Zaaj hab moog rua ntawm lub Roojvaag Quav Hlawv. Kuv moog tshuaj saib lub nroog Yeluxalees tug ntsaa yeej kws pob taag hab tej roojvaag kws kub nyab taag lawm.

¹⁴Ces kuv txhaj moog ntawm lub nroog saab nubtuaj nce moog rua saab qaumteb, moog txug ntawm lub Roojvaag Qhovdlej hab ntawm vaajntxwv lub paag dlej; tabsis tug neeg luav kws kuv caij nrhav tsi tau kev moog le lawm,

¹⁵Yog le ntawd, kuv txhaj caij tug neeg luav nqeg moog rua huv lub Haav Kiloos hab moog saib tug ntsaa yeej. Ces kuv txhaj taug txujkev kws kuv tuaj rov chaws lub Roojvaag Haav lug rua huv lub nroog lawm.

¹⁶Cov numtswv kws nyob huv lub nroog yeej tsi paub has tas, kuv moog qhov twg rua qhov twg lossis tsi paub txug tej kws kuv ua taag ntawd le. Kuv yeej tsi tau qha ib yaam dlaabtsi rua kuv cov phoojywg Yudas, cov povthawj, cov thawjcoj, cov numtswv lossis lwm tug kws muaj feem yuav tau lug nrug koom tuav lub luag num nuav hlo le hab.

¹⁷Tabsis nwgnuav kuv has rua puab tas, “Mej tub pum tej teebmeem kev ntxhuv sab kws muaj nyob huv peb nuav lawm, vim has tas lub nroog Yeluxalees puamtsuaj taag nphob quas xuav ca hab tej roojvaag los tub pob puag taag lawm! Peb ca le pib txhim khu tug ntsaa yeej kws thaiv lub nroog nuav dlua tshab, peb txhaj tsi txaajmuag rua luas nplajtog qaumpeg.”

¹⁸Kuv qha tej kws Vaajtswv nrug nraim kuv, paab kuv hab tej lug kws vaajntxwv has rua kuv ntawd rua puab noog. Puab txhaj le leeg has tas, “Ca le pib khu taamsim nuav ntaag!” Ces puab txawm nqeg teg pib ua num.

¹⁹Thaus Xanpalas, Taunpias hab ib tug tuabneeg Alav kws hu ua Nkesees nov has tas, peb npaaj ua num lawm, puab txawm luag peb hab has tas, “Mej xaav le caag mej txhaj yuav ua? Mej tawmtsaam fuabtais los?”

²⁰Kuv teb puab has tas, “Vaajtswv tug kws nyob sau Ntuj Ceebtsheej yuav paab peb ua kuas tav. Peb yog nwg cov tubkhai hab peb taabtom pib txhim khu lawm ntaag. Mej tsi muaj feem nyob huv lub nroog Yeluxalees nuav, hab mej tsi muaj feem koom ib yaam dlaabtsi kws nyob huv lub nroog nuav hlo le.”