Read Hmong Njua Nehemis 3 Bible Online

Nehemis 3 - Hmong Njua bible

Nehemis 3

¹Ntawm nuav yog kev rov txhim khu tug ntsaa yeej kws thaiv lub nroog. Tug Povthawj Hlub Eli-asis, hab nwg tsoom kwvtij kws yog cov povthawj khu lub Roojvaag Yaaj fij rua Vaajtswv, hab coj lub roojvaag moog dlhos rua. Puab tseem muab tug ntsaa yeej txij ndlua ntawm lub chaw tsomfaaj Ib Puas moog txug ntawm lub chaw tsomfaaj Hananees fij rua Vaajtswv huv tuabsi.

²Ntu kws txuas nkaus ntawm cov povthawj ntu, mas yog cov tuabneeg Yelikaus ua cov txhim khu. Hab ntu kws txuas nkaus ntawd moog yog Imelis tug tub Xakules ua tug txhim khu.

³Haxena-aas cuab kwvtij, ua cov txhim khu lub Roojvaag Ntseg. Puab muab ob tug ncej roojvaag hab ob dlaim txag roojvaag coj moog dlhos rua. Muab cov ntsa moog ntsa, hab muab ob tug nqaaj moog laag lub roojvaag.

⁴Ntu kws txuas nkaus puab paab ntawd, yog Uliyas tug tub Melemaus kws yog Hakaus tug xeebntxwv ua tug txhim khu. Ntu kws txuas nkaus ntawd moog yog Npelekhiyas tug tub Mesulas kws yog Mexexanpees tug xeebntxwv ua tug txhim khu. Ntu kws txuas nkaus ntawd moog, yog Npa-anas tug tub Xadaus, ua tug txhim khu.

⁵Ntu kws txuas nkaus ntawd moog, yog cov txivneej Tekau-as ua cov txhim khu. Tabsis tug thawjcoj cov tuabneeg kws nyob huv lub nroog ntawd tsi kaam ua lawv le tug qauv kws cov thawj saib num ntawd muab cob rua puab ua.

⁶Paxe-as tug tub Yauyadas hab Npexaudeyas tug tub Mesulas ua ob tug txhim khu lub Roojvaag Yesanas. Obtug muab ob tug ncej moog txhus, hab muab ob dlaim txag roojvaag coj moog dlhos rua, muab cov ntsa coj moog ntsa, hab muab ob tug nqaaj coj moog laag lub roojvaag.

⁷Ntu kws txuas nkaus ntawd moog txug ndlua rua tim tug tswv xeev kws kaav lub xeev nyob ntawm tug Dlej Efalates saab nubpoob, tej vaaj tse, yog Melatas kws yog tuabneeg nyob huv Nkinpe-oos, Yadoos kws yog tuabneeg nyob huv Melunaus hab cov tuabneeg kws nyob huv Nkinpe-oos ua cov txhim khu,

⁸Ntu kws txuas nkaus ntawd moog, yog Halehayas tug tub Uxiyees kws yog ib tug txawj nchuav kub ua tug txhim khu. Ntu kws txuas nkaus ntawd moog, yog Hananiyas kws yog ib tug ua tej tshuaj tsw qaab, ua tug txhim khu moog txug ndlua ntawm tug ntsaa yeej Dlaav.

⁹Ntu kws txuas nkaus ntawd moog, yog Hules tug tub Lefayas kws kaav ib nraab cheebtsaam huv lub nroog Yeluxalees, ua tug txhim khu.

¹⁰Ntu kws txuas nkaus ntawd moog, yog Halumas tug tub Yedayas ua tug txhim khu, hab ntu ntawd nyob ze rua ntawm nwg lub tsev ntaag. Ntu kws txuas nkaus ntawd moog, yog Hasaneyas tug tub Hatus ua tug txhim khu.

¹¹Ob ntus kws txuas nkaus ntawd moog, hab lub chaw Tsomfaaj Qhovtxus, yog Halees tug tub Makhiyas hab Pahas Mau-am tug tub Hasus ua obtug txhim khu.

¹²Ntu tom ntej kws txuas nkaus ntawd moog, yog Haluhes tug tub Salumes kws kaav ib nraab cheebtsaam lub nroog Yeluxalees ua tug txhim khu. (Hab nwg cov ntxhais paab nwg ua.)

¹³Hanoos hab cov tuabneeg kws nyob huv lub nroog Xanau-as txhim khu lub Roojvaag Haav. Puab muab ob tug ncej roojvaag moog txhus, muab ob dlaim txag moog dlhos rua, muab cov ntsa moog ntsa, hab muab ob tug nqaaj moog laag lub roojvaag. Hab khu tug ntsaa yeej ntev ib txheeb tshim ntxiv moog txug ndlua ntawm lub Roojvaag Quav Hlawv.

¹⁴Lekhas tug tub Makhiyas kws kaav Cheebtsaam Npethes Hakhelees ua tug txhim khu lub Roojvaag Quav Hlawv. Nwg muab ob tug ncej roojvaag moog txhus, muab ob dlaim txag moog dlhos rua, Muab cov ntsa coj moog ntsa, hab muab ob tug nqaaj moog laag lub roojvaag.

¹⁵Kauhauxes tug tub Salumes kws kaav Cheebtsaam Mixepas ua tug txhim khu lub Roojvaag Qhovdlej. Nwg muab ob tug ncej roojvaag moog txhus rua, muab ob dlaim txag moog dlhos, muab cov ntsa moog ntsa hab muab ob tug nqaaj coj moog laag lub roojvaag. Nyob ntawm lub Paag Dlej Selas, nwg khu tug ntsaa yeej kws txuas nkaus rua ntawm vaajntxwv lub vaaj moog txug ndlua rua tom tug ntaiv kws nqeg sau Daviv lub nroog lug.

¹⁶Ntu kws txuas nkaus ntawd moog, yog Anpukes tug tub Nehemis kws kaav ib nraab Cheebtsaam Npethexus ua tug txhim khu moog txug ndlua ntawm Daviv lub ntxaa, lub paag dlej hab lub tsev kws cov tuabneeg sab tawv nyob.

¹⁷Ob peb ntus kws txuas ntu ntawd moog, yog muab rua cov Levis txhim khu lawv le nraag nuav: Ntu kws txuas nkaus ntu ntawd moog, yog Lehumes tug tub Npanis ua tug txhim khu. Ntu kws txuas nkaus ntawd moog, yog Hasanpiyas tug kws kaav ib nraab Cheebtsaam Ke-ilas ua tug txhim khu. Nwg khu cheebtsaam kws nwg kaav ntawd ntaag.

¹⁸Ntu kws txuas nkaus ntawd moog, yog Npavais tug kws kaav dlua ib nraab Cheebtsaam Ke-ilas ua tug txhim khu.

¹⁹Ntu kws txuas nkaus ntawd moog kws yog ntu nyob ntawm hauv ntej lub txhaab rau tej cuabyeej ua rog, yog Yesuas tug tub Exes tug kws kaav lub nroog Mixepas ua tug txhim khu moog txug ndlua ntawm lub kaum ntsaa yeej kws nkhaus hlo.

²⁰Ntu kws txuas ntawd moog txug ndlua rua tom txujkev kws moog rua ntawm tug Povthawj Hlub Eli-asis lub tsev, yog Xanpais tug tub Npalus ua tug txhim khu.

²¹Ntu kws txuas nkaus ntawd moog, yog Uliyas tug tub Melemaus kws yog Hakus tug xeebntxwv, ua tug txhim khu moog txuas nkaus rua ntawm Eli-asis lub tsev.

²²Ob peb ntus kws txuas nkaus ntawd moog, yog muab tu rua cov povthawj ua cov txhim khu lawv le nraag nuav: Ntu kws txuas nkaus ntawd moog, yog cov povthawj kws nyob ibncig lub nroog Yeluxalees ua cov txhim khu.

²³Ntu kws txuas nkaus ntawd moog, yog Npeenyamees hab Hasus ua ob tug txhim khu. Obtug khu ntu kws nyob ncaaj ntawm obtug tsev ntaag. Ntu kws txuas nkaus ntawd moog, yog Ma-axeyas tug tub Axaliyas kws yog Ananiyas tug tub xeebntxwv ua tug txhim khu. Nwg khu ntu kws nyob ncaaj ntawm nwg lub tsev.

²⁴Ntu kws txuas nkaus ntawd Axaliyas lub tsev moog cob nkaus rua ntawm tug ntsaa yeej nkhaus, yog Hanadas tug tub Npeenau-is ua tug txhim khu.

²⁵Ntu kws txuas nkaus ntawd moog, yog Uxais tug tub Palas ua tug txhim khu. Nwg pib khu ntawm lub ceg kaum ntsaa yeej hab lub chaw tsomfaaj kws nyob ntawm lub loog theem sab kws ze lub tshaav puam ntawm lub chaw faajxwm. Ntu kws txuas nkaus ntawd moog, yog Palus tug tub Pedayas ua tug txhim khu moog txug ndlua rua saab nubtuaj kws ze rua ntawm lub Roojvaag Dlej, hab ntawm lub chaw tsomfaaj kws zuv lub Tuamtsev. (Qhov nuav yog nyob ze rua ntawm ib saab nroog kws hu ua Aufees, yog qhov chaw kws cov tuabneeg ua num huv lub Tuamtsev nyob.)

²⁷Ntu kws txuas nkaus ntawd moog, yog ntu ob kws cov tuabneeg Tekau-as, puab yog paab ob kws ua cov txhim khu, puab pib kag ntawm ntu kws nyob ncaaj lub Chaw Tsomfaaj Luj kws zuv lub Tuamtsev moog ti nkaus rua ntawm saab ntsaa yeej Aufees.

²⁸Ntu kws txuas nkaus ntawd moog, yog cov povthawj ua cov txhim khu. Puab pib khu ntawm lub Roojvaag Neeg nce toj moog, hab puab nyag khu ntu kws nyob ncaaj ntawm nyag lub tsev.

²⁹Ntu kws txuas nkaus ntawd moog, yog Imeles tug tub Xadaus ua tug txhim khu, nwg khu ntu kws nyob ncaaj ntawm nwg lub tsev. Ntu kws txuas nkaus ntawd moog, yog Sekaniyas tug tub Semayas kws zuv lub Roojvaag Nubtuaj, ua tug txhim khu.

³⁰Ntu kws txuas nkaus ntawd moog, yog ntu ob kws Selemiyas tug tub Hananiyas hab Xalas tug tub Hanus kws yog tug rau ua ob tug txhim khu. Ntu kws txuas nkaus ntawd moog kws ncaaj Npelekhiyas tug tub Mesulas, yog Mesulas ua tug txhim khu.

³¹Ntu kws txuas nkaus ntawd moog, yog Makhiyas kws yog tug nchuav kub ua tug txhim khu. Nwg khu moog txug ndlua rua tom cov tuabneeg kws tu lub Tuamtsev hab cov tuabneeg kws ua laag ua luam nyob kws yog ncaaj rua ntawm lub Roojvaag Mifekas kws yog kev moog rua huv lub Tuamtsev, ze rua chaav kws nyob ntawm ceg kaum ntsaa yeej saab nubtuaj qaumteb.

³²Ntu kws txuas nkaus ntawd moog, yog ntu kawg kws nyob nruab nraab ntawm ceg kaum ntsaa yeej hab lub Roojvaag Yaaj, ntu nuav yog cov tuabneeg nchuav kub hab cov tuabneeg ua laag ua luam ua cov txhim khu.