Read Hmong Njua Nehemis 5 Bible Online

Nehemis 5 - Hmong Njua bible

Nehemis 5

¹Tau ib ntus lug tom qaab nuav, cov pejxeem coob leej ntau tug tsi has quaspuj lossis txivneej, txawm pib ywg puab cov kwvtij Yudas.

²Muaj qee leej ywg has tas, “Peb cov kws tsev tuabneeg coob, peb xaav tau qoobloo kuas ntau txaus noj.”

³Muaj dlua ib paab ywg has tas, “Peb yuavtsum tau muag peb tej teb, tej vaaj txiv maab hab tej tsev nyob, mas peb txhaj le yuav muaj nyaj lug yuav zaub mov noj peb txhaj tsi tuag tshaib.”

⁴Tseem muaj dlua ib paab ywg has tas, “Peb tau moog txais nyaj lug them peb tej se teb hab se vaaj txiv maab rua fuabtais.

⁵Peb yog tuabneeg ib yaam le cov Yudas hab peb tej mivnyuas tub zoo ib le puab tej hab; tabsis peb tsua tau muab peb tej mivnyuas muag moog ua luas qhev. Peb cov ntxhais qee leej raug muag moog ua luas qhev lawm.”

⁶Thaus kuv nov puab tej lug ywg ntawd, ua rua kuv chim heev.

⁷Kuv txhaj le tshev cov thawjcoj hab cov numtswv kws saib cov pejxeem suavdlawg hab has rua puab tas, “Mej tsimtxom mej cov kwvtij dlhau hwv lawm!” Kuv txhaj hu kuas suavdlawg tuaj sis txoos ua ke

⁸hab has rua puab tas, “Peb tseem yuav moog txhwv kuas tau peb tej kwvtij Yudas kws raug muab muag rua cov tuabneeg txawv tebchaws coj moog ua qhev lawm rov lug. Nwgnuav mej tseem kuas mej cov kwvtij muab puab tej tuabneeg muag rua mej hab los? Puab tub yog mej cov kwvtij Yudas ntaag los sav!” Cov thawjcoj ntawd yoob taag hab tsi muaj lug teb le.

⁹Ces kuv txhaj has tas, “Yog vim le caag mej ua tej yaam tsi zoo le nuav? Tsimnyog mej yuavtsum fwm Vaajtswv hab ua mej lub neej kuas ncaaj nceeg. Mej tsi xob ua kuas peb cov yeebncuab kws yog lwm tsaav tuabneeg tau chaw txobthuam peb ib qho le.

¹⁰Kuv txhaj ca suavdlawg tuaj txais nyaj hab mov noj ntawm kuv, kuv cov kwvtij hab cov tuabneeg kws ua num rua kuv. Txij nuav moog peb ca le tseg kag qhov kws pheej kuas luas them nuj nqes rov rua peb ntawd.

¹¹Tso plhuav tseg qhov kws suav nuj nqes rua luas them ntawd, tsi has nyaj, qoobloo, cawv txiv maab, lossis roj txiv ntoo. Hab ca le thim puab tej laj tej teb, tej vaaj txiv maab, tej txiv ntoo roj hab puab tej vaaj tse rov rua puab taamsim nuav!”

¹²Cov thawjcoj teb has tas, “Peb yuav ua lawv le koj has. Peb yuav thim puab tej teb, tej vaaj tse rov rua puab hab tsi pub kuas puab tshuav peb nqe dlaabtsi hlo le.” Kuv txhaj le hu cov povthawj tuaj hab kuas cov thawjcoj lug coglug taabmeeg puab, hab cov thawjcoj yuavtsum ua lawv le tej lug kws puab tau cog tseg ntawd.

¹³Ces kuv txhaj hle hlo kuv txuj hlaab tshos hab muab kuv lub tsho luj nchus. Hab kuv has tas, “Vaajtswv yuav muab txhua tug kws tsi ua lawv le nwg tej lug cog tseg nchus le nuav ntaag. Vaajtswv yuav muab mej tej tsev hab txhua yaam kws yog mej tug rhu tawm ntawm mej moog povtseg hab tsi tseg ib yaam dlaabtsi rua mej hlo le.” Ces txhua tug tuabneeg kws tuaj nyob ntawd puavleej has tas, “Amees!” hab has tas ua tug TSWV tsaug. Hab cov thawjcoj tau ua lawv le puab tej lug cog tseg ntawd.

¹⁴Kuv ua tug tswv xeev kaav cov Yudas, yog xyoo neeg nkaum lug txug rua xyoo peb caug ob kws Ataxawxes ua fuabtais; kaum ob xyoos kws kuv tau ua tswv xeev ntawd lug txug taamsim nuav, tsi has kuv cov kwvtij lossis kuv, yeej tsi tau noj tej zaub mov kws cov pejxeem coj tuaj rua tug tswv xeev hlo le.

¹⁵Cov tswv xeev qub kws xub kaav ua ntej kuv lawm, tau quab yuam cov pejxeem ua num nyaav kawg le, hab kuas puab muab ib nub twg plaub caug lub nyaj rua cov tswv xeev coj moog yuav zaub mov hab cawv txiv maab. Txawm yog puab cov tubkhai los yeej tsimtxom cov pejxeem kawg le hab, tabsis kuv tsi ua le puab cov ntawd, rua qhov kuv fwm Vaajtswv.

¹⁶Kuv siv taagnrho kuv tug zug lug txhim khu tug ntsaa yeej, kuv yeej tsi tau ib yaam dlaabtsi hlo le. Txhua tug tuabneeg kws ua num rua kuv puavleej koom teg nrug kuv txhim khu tug ntsaa yeej nuav.

¹⁷Cov Yudas hab puab cov thawjcoj ib puas tsib caug leej, tau nrug kuv koom tsum noj mov txhua pluag. Dlua le ntawd tseem muaj cov tuabneeg txawv tebchaws kws nyob puagncig peb lub tebchaws kws pheej tuaj saib kuv, kuj tau koom nrug kuv noj mov hab.

¹⁸Ib nub twg kuv tua ib tug nyuj, rau tug yaaj kws zoo nkauj heev, hab ntau tug qab lug ua zaub noj. Hab kaum nub twg, kuv muab cawv txiv maab rua suavdlawg haus ib zag. Kuv yeej paub has tas yog lub nraa nyaav rua cov pejxeem suavdlawg lawm, yog le ntawd kuv txhaj tsi has kuas puab muab zaub mov tuaj rua kuv.

¹⁹Kuv thov Vaajtswv has tas, “Vaajtswv, kuv thov koj ncu ntsoov txhua yaam num kws kuv tau ua rua cov tuabneeg nuav lawm.”